Eenamanana doSwapo otadi twikile koGrootfontein

Ongudu yovaleli voSwapo koGrootfontein otai lundile ongudu oyo ya pewa oilonga ya kwatakanifwa nelelo longudu kutya itai liufa kekotamhango notai eta omatopauko mongudu eshi kwa teelelika omahoololo ongudu.

Ovaleli ve li lwopo22 ova shangela presidente Netumbo Nandi-Ndaitwah omukanda, tava nyenyeta kombinga yomaliumbato ongudu yovanhu ava ve lineekelelwa oilonga va hoololwa kuhamushangandjai Sophia Shaningwa opo ikale tai wilike omahoololo oikandjo, oitai nosho yo oshooongalele shopashikandjohoololo shokuhoolola ovalaleli vongudu.

Omukanda okwa li wa nyolwa konima yomafiku atanho eshi ongudu yovanhu ava kwa li ya tumwa okudja kombelewa yaShaningwa momafiku 15 Apilili.

Oshinima eshi oshe ya pefimbo opo omafeekelo a ninga ahapu kutya ongudu ei yovanhu oya tumwa shi na sha noshoongalele shoSwapo osho tashi ka kala ko momudo 2027.

Ovaleli ava ve li 22 otava ti kutya ongudu oyo ye lineekelelwa oilonga itai fimaneke eenghono davo notai longo i li kondje yekotamhango longudu.

“Itatu likale nande oukwashili naasho tashi linyenge, ashike ongudu ei ya tumwa oye ya okukuna okutopauka mokati koilyo yoSwapo yomoshitopolwa shetu pakulundulula omikanda doveta yongudu shi nasha nomauwa avo vene, e shiivike ashike kuvo,” Osho va ti momukanda ngaho.

Nandi-Ndaitwah, Shaningwa nomunashipundi wovaleli voSwapo, ova tuma ovanhu ava koshitopolwahoololo shaTjozondjupa, Pohamba Shifeta naye okwa li a tumbulwa mo momukanda.

Ongudu ei okwa li ya tumwa i ka ninge omalilongekido omahoololo opaitai okuhoolola okandidate youkamusela koGrootfonten.

Mongudu ei okwa li mwa kwatelwa, mokati ashike kavakwao, omupedu mayola mukulu waVenduka Ian Subasubani nomuyakuli waShaningwa, Teddeus Shithigona.

Moilyo ikwao vati omwa kwatelwa ovakwaita vatatu ve li moshipundi shetulumuko noilyo yopolifi.

Oilyo yokomitiye yongudu wiliki yopashitopolwa momukanda wayo oya ti kakwa li ya pitikwa i tye sha pefimbo kwa li ongudu oyo ya tumwa koshitopolwa oko ya ninga oshoongalele.

Ova ti ovanhu vamwe ovo va tumwa oko ove va lombwela nemanguluko kutya kakwa li va hoololwa pashitopolwa nonghee nee kave na efiku va tale kenyenyeto tali di koilyo yokomitiye yongudu wiliki yopashitopolwa osho.

EDUNDAKANO
Ova lundila yoo vali ongudu oyo ya tumwa koshitopolwa shavo kutya oya eta edundakano moshitopolwa.

Momafiku 21 Apilili, omuunganeki woshikandjo shoGrootfontein James Shipunda vati okwa li a lombwela oilyo yewiliko loshikandjo okupitila mokatumwalaka kokoWhatsApp kutya onguduilonga oyo, okwa li ya hala okushakena navo potundi 18h00 omutenya oo, noshoongalele shokuhoolola ovaleli vongudu koshikandjo oko otashi ka ningilwa mohotela i li eekilomita 10 pondje yaGrootfontein konima yaasho.

“Mupya munene, etumwalaka eli kakwa li la tambulwa ko nawa shaashi okwa li la yandjwa moule wokafimbo kaxupi, ndee noPeace Garden oi li hamungala eekilomita 10 pondje yaGrootfontein, opu na oupyakadi wosheendifo,” Osho va ti ngaho.

Shipunda okwa ti okwa li a lombwelwa kutya inava pumbwa okushakena nongudu oyo ya tumwa koshikandjo shavo.

‘OSHIKUMUNGU OSHA POTOKONONWA’

Shipunda Omaandaxa okwa lombwela oThe Namibian kutya oshikumungu eshi osha potokononwa nale, ashike okwaanya okupopya ngee omilandu da pumbiwa oda shikulwa ngaa.

“Pula ava ve kupa ehokololo,” Osho a ti ngaho.

The Namibian okwa uda kutya Nandi-Ndaitwah okwa li a ifana oilyo yongudu wiliki yoSwapo koGrootfontein keumbo lepangelo konima kwa li a shangelwa omukanda tau popi vati “omaliumbato inaa yuka nekotamhango inali landulwa” a ningwa kongudu oyo kwa li ya tumwa owina i ka longe osho ya lombwelwa.

Okwa li va holoka komesho yongudu wiliki yongudu moshoongalele sha li ko momafiku 28 Apilili konguloshi.

Oshoongalele eshi okwa li ashike she ya pexulilo potundi 04h00 yefiku la landula.

‘OMOLWASHIKE’

Shaningwa Omaandaxa okwa pula kutya oshike ovanhu vomoGrootfontein tava nyenyeta ashike paife konima eekandidate da nyolifwa nale.
“Omikalo di li ngaho ove di hanga peni?” Osho a pula ngaho.

Oilyo imwe yoSwapo koGrootfontein oya ti ongudu otashi dulika iha findane omahoololo oo taa ka ningwa momafiku 17 Juni, shaashi inava hafela omukalo oo okandidate kwa li ya hoololwa.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.