Oovene veembwa kOshakati inava hafa eshi elelodoolopa tali va pula va fute oishoshela yeembwa davo.
Eleldoolopa otali pula keshe omunhu e na ombwa mOshakati a nyolife ombwa yaye opo a kale he i futile komudo.
Okudja peemwedi hamano, ofuto oshimaliwa shi fike poN$82.89 kutya nee ombwa onghadi ile ondume.
Pakuweda po, oovene veembwa ova pumbwa okuyandja okakalata kombwa kutya ohai mono eevenda dayo, pamwe neekopi domikanda dayo.
Omupopiliko welelodoolopa Martin Kapuka okwa lombwela oThe Namibian Etivali kutya kakele nee kokunyolifa eembwa, oovene vado ova pumbwa oku di fila oshisho ndee tava kwashilipaleke kutya odi li meehoofa da idila.
“Okuyandja omikanda keembwa kOshakati okwa li kwa totwa okupitila momulandu wokuwilika eembwa welelodoolopa laShakati, oo kwa li wa pitifwa paveta momafiku 12 Desemba 2018.
Omilandu edi oda ningwa koshi yokatendo komalelo eedoolopa, komudo 1992,” osho a ti ngaho.Kapuka okwa ti oishoshela yeembwa otai lalakanene okuxwepopeka onghalonawa yeembwa modoolopa nokukwatela po oukoshoki.
Eshi a pulwa ngee ovakalimo ova kundafanwa ngaa navo, okwa ti pefimbo lokutota po omilandu dokuwilika eembwa, ovakufimbinga vomondjila okwa li va kundafanwa navo, mwa kwatelwa opolifi, oministili youndjolowele nomayakulo opanghalafano noshikondo shouhaku woinamwenyo shi li koshi yoministili younamapya nounaimuna, eeshi, omeva nomatendululo omadu.
“Omulandu ou okwa li wa tala koundjolowele woshiwana, eameno nonghalonawa yoinamweny.
Omido da pita, Oshakati oya didilika oiningwanima ya pamba eembwa tai i pombada, mwa kwatelwa ovanhu tava lika keembwa, eembwa tadi endauka da manguluka modoolopa, ounona vofikola tava hale okumonifwa oiponga neenamanana pokati kovakalimo.
Oiningwanima ei oya kala nokulopotwa keshe efimbo kelelodoolopa noya nyika oshippnga koundjolowele woshiwana neameno, unene ngaa kombinga yeembwa tadi li ovanhu,” Kapuka osho a ti ngaho.
“Keshe mwene wombwa modoolopa okwa teelelwa a fendele ombwa yaye kodula. Ngee owa dopa okuninga oshinima eshi otashi talika ko kutya oshimbuluma.
Konima wa monika ondjo, omunhu ota ka futa oshimaliwa shi fike poN$2 000, ile a ye modolongo oule weemwedi hamano, ile a ninge aishe, ngaashi sha tongwa momilandu,” osho a ti ngaho.
Okwa weda po kutya eembwa tadi li ovanhu oshinima sha nyika oshiponga neenghono koundjolowele woshiwana noshi na oilanduli ihe fi iwa nandenande.
“Okukongela eembwa omikanda otaku pitike elelodoolopa li wilike nawa oumwene weembwa, okuwilika oinamwenyo oyo tai eta omikundu nokufaneka okuxwepopeka omayakulo ngaashi eenghendabala dokumaleka po oundjolowele woinamwenyo, eepolohama domalutulo nenhele doshiwana di na eameno.
Nande omalunduluko luhapu kee holike, oiyemo oyo tai ongelwa okudja moishoshela ei otai shunifwa mokuyambula po oshiwana, mwa kwatelwa oinima oyo tai xwaxwameke ovanhu va kale ve umwene woinamwenyo yavo nosho yo omaushiinda aamenwa,” osho a ti ngaho.
Elelodoolopa ola ti, ovanhu ve li 104 okwa li va lika keembwa okudja muOktoba fiyo omuDesemba momudo 2025.
Ashike nande ongaho, ovakalimo ova holola ehandu kombinga yoishoshela yeembwa oyo inai kundafwa noshiwana tete mangha inai totwa, voo natango kave uditekeo omilandu edi dipe.
Taimi Nangolo, omukalimo womolukanda oneshila kOshakati, okwa pula nghee etulomoilonga losishoshela yeembwa tali ka ningwa shaashi odoolopa oi na eembwa dihapu neenghono dihe na oovene.
“Omolwashike tu na okufuta oishoshela yeembwa? Eembwa detu ohatu dipe okulya fyee vene ndee paife ova hala twa futa shaashi ashike tu na oinamwe yomeumbo? Oshike naana tu na okufuta oishoshela yeembwa mangha omaumbo etu taa kungululwa po? Ou omunyeka womoshanga shomutenya,” osho a ti ngaho.
Okwa pula elelodoolopa opo li xwepopeke omayakulo alo ndee talio yambula po odoolopa nomatungo opamufika.
Omukalimo umwe a nyemata womEkuku, Linekela Shekudja, okwa ti oishoshela yeembwa omukalo umwe wokuninga oshimaliwa welelodoolopa.
“Itandi futu oishoshela yombwa.
Eembwa dange ovaameni vange vopaumwene. Ohava kelele omaliko ange ngee ndihe po nohandi longifa oimaliwa ihapu ndi di landele omiti neevenda,” osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
