Eemangestrata oshilonga ashishe oda xulifa po oilonga konima yehandu leemwedi dihapu la etwa kedopo lepangelo lokutula moilonga omauwa omaumbo noyeendifo oo a diminwa – oshinima osho omukalelipo wado wopaveta okwa ti osha eta opo ovanambelewa woikwaveta va ninge etokol eli.
Exulifepo loilonga ola landula elombwelo lopambelewa lekangha la ningwa kehangano leemangestrata novapanguli laNamibia Etine la dja ko, osho shi li onghatu yotete yoludi eli mosystema yoikwaveta.
Eshi kwa li ta popi noDesert FM Omaandaxa omukalelipo wehangano, Florian Beukes, okwa ti eenamanana oda dja kekateko lepangelo tali twikile lokutula moilonga pambelewa omauwa oule wefimbo li dule podula.
Omauwa eemangestrata omaumbo noyeendifo okwa li a kolekwa kokomisi yeemangestrata muOktoba 2023 ndee Beukes okwa ti oministili youyuki noipambele yoilonga oya undulila oshinima eshi sha kolekwa koministili yoshimaliwa momafiku 12 Novemba neudo.
Beukes okwa ti nande opa tulwa oshimaliwa shi fike peemiliyona N$8 neenghundafana da yooloka okwa li da ningwa, inapa kala nande pu na efatululo la shangwa okudja koministili yoshimaliwa nghee kwa yandjelwe elombwelo lekangha.
Okwa ti eemangestrata oda kufa onghatu ya mana mo konima da kendabala okulandula omilandu adishe domeni da pumbiwa.
Okwa weda po vali ta tis ha landula eshi minista wouyuki Wise Immanuel a kufa mo eindilo lomeendelelelo momhangu yopombada momafiku 14 Novemba, eembinga adishe okwa li da shaken mmafiku 19 Novemba kombelewa yomunambelewa akula woipambele yoilonga va di kundafane etulomoilonga lomauwa.
Eudafano lokutwikila nomauwa okwa li nale la ningwa momafiku 07 Novemba pokati eemangestrata, okomisi yeemangestrata nombelewa yoikwaveta.
“Pakutala kutya aa kala nokuuya okudja momudo 2023 […] ndee paife ee li ashike naminista woshimaliwa, puhe na nande oitya ya sha, osho nee sha fininika eemangestrata di kufe onghatu ei,” Beukes osho a ti ngaho.
Eemangestrata otadi longifa okatendo 21(f) kekotamhango, oko ka yandja oufemba kushe omunhu a kaleke oilonga yaye. Ashike nee, Beukes okwa yeleka kutya oufemba ou nau yelekwe nokatendo 12 kekotamhango oko taka yandje oufemba opo keshe umwe a mone oihokolola i li pauyuki.
“Eshi eemangestrata tadi longo, ovanhu itava dulu okuya komesho neemhangu, ndee omaufemba avo nao otashi dulika a kumwe,” osho a ti ngaho.
EEMHANGULILO ITADI LONGO
Beukes okwa koleka kutya eemangestrata oda xulifa po oilonga Omaandaxa ongula, puhe na oihokolola nokuholoka keemhangulilo.
Ekangha ola eta nale oipofa ihapu i kale inai pwa, osho a ti ngaho.
Opo kupitikwe eemhangulilo, neemangestrata dopaikondo otadi dulu okuulika ovakalelipo ovo ve na ashike eenghono da ngabekwa, tadi dulu ashike okuundulila komesho nokuyandja eebooloha ngee ovatamaneki ve shi tambula ko.
Itava kwatele komesho oihokolola ile omaindilo eebooloha opambelewa.
Beukes okwa anya omapopyo oo taa ti eemangestrata itadi dulu okuya mekangha paveta, ta ti ovanambelewa voikwaveta kave shi nande koshi yovanailonga ovo hava yandje omayakulo a fimana.
“Onde lineekela keshe umwe ota dulu okuuya ndee te tu ulikile oveta yepangelo oyo,” osho a ti ngaho.
“Eendokotola, ovapangi, ovadimi vomindilo, ova tulwa koshi yomayakulo a fimana. Ashike kandi shii nande ngee ovanambelewa voipambele yoveta navo ova tulwa koshi yomayakulo a fimana.”
Beukes okwa ti onghalo otai ulike kutya mokatendo keemangestrata omu na ounghundi, unene ngaa kombinga yexwaxwameko lepangelo ngee tashi ya keendjabi.
Okatendo otaka ti, eendjabi nomauwa eemengestrata naa tokilwe kokomisi yeemangestrata peenghundafana nominista youyuki, nepitikioo tali di koministili yoshimaliwa.
Beukes okwa ti omalongekido aa okwa eta oudjuu notashi dulika a ete oupyakadi wopakotamhango.
Eshi a pulwa kutya ngee eenghundafana oda dopa otapa ningwa shike, Beukes okwa ti eemangestrata inadi dilaadila nande di twale oshinima eshi kokule ashike okwa yeleka kutya inadi hala onghalo ei i ninge ii unene.
Ekangha eli ola teelelika li twikile fiyo minista woshimaliwa a nyamukula.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
