Eehombo dounona moitopolwa imwe moshilongo otadi i komesho

Omufuko weedula 12 e li pomunghulo wainamweno, a dingonokwa kovakulukadi vakwao noukadona vOuhimba hava ifanwa Otjikandero.

Oshipala shomufuko ou mu shona osha tuvikwa neexwiki dopamufyuululwakalo da ningwa neengodi odo da tulwa kumwe pombado yomutwe waye.

Omesho, omakutwi, eyulu nokanya kaye kake wetike.

Okwa mwena e li omutumba puinamweno.

Okakadona aka taka hombolwa ka dja komukunda umwe u lili oke na okukala take liufa keemhango depata oule weemwedi hamano fiyo odula ke li ashike meumbo omo nava kwao efimbo alishe olo.

Omushamane waye ke po ashike naye omakula waye.

“Eeno oku li pokuhombolwa. Ovahimba otava dulu okuya mohombo okudja peedula mbali,” Omukwateli komesho wosheendo Gottfriet Ekandjo osho a ti ngaho.

Ekandjo okwa li a twala ongudu yovatoolinghundana komukunda ou petameko lodula ei, omukunda ou shiivike nawa kutya ohau nane ovatalelipo, ou li eekilometa 20 kokule nOkamanjaba.

Ovakulukadi noukadona vOvahimba okwa li va ninga ongonga tava hokolola nghee hava ningi eehango dounona, omanga Ekandjo ou a kala mongeshefa youmatalelepo efimbo lile kwa li ta fatulula.

“Ashike ngee okwa hombolwa omanga mu shona, ita kala ta i moixulo nomushamane waye.

“Omushamane ou okuna okufila okakadona aka oshisho. Ndee tava tameke okuya moixulo nawa,” Ovakulukadi osho va ti ngaho.

Okwa li va dama lela meitavelo kutya eehombo dounona odi li pamufyuululwakalo wOvahimba, oo ovanhu vamwe vehe udite ko.

“Okudja peedula mbali wa yuka pombada ovakulunhu otava dulu okulongekida ohombo,” Ekandjo osho a ti ngaho.

Okwa ti ohombo yokaana ke na eedula di li 12 okwa li ya longekidwa. Okwa li ke na okudjala eexwiki odo da ningwa neengodi komutwe da tuvika koshipala fiyo omukunda aushe otau ka shiiva nawa, osho a ti ngaho.

“Oha djala eexwiki odo fiyo ota ikilile keshe umwe momukunda. Ohashi kwata eemwedi hamano fiyo odula, opo nee ta dulu okudikufa ko,” Osho a ti ngaho.

“Eedula kadi na sha,” Ekandjo osho a ti ngaho kombinga yeedula domushamane wakakadona.

Oyoonda ohai i yandjwa.

“Ohava futu. Ovadali vomushamane ohava yandje eengobe odo tadi ka tomwa komukunda oko, neengobe vali dimwe mbali dovadali vomufuko,” Osho a ti ngaho.

KASHILI PAVETA

Ehoombo dounona moNamibia inadi ufwa, eshi oshi li koshi yokatendo 3 komomudo 2015 oko taka amene ounona moNamibia.

Engabeko eli ola kwatela mo eehombo dovakwashiwana, dopamifyuululwakalo nodopangeleka.

Nande nee pu na oshinima shi li ngaha, olopota yeehombo dounona moNamibia oya holola kutya eehombo dounona voukadona dihapu okwa li da ningwa moshitopolwa shaKavango di fike peepelesenda 39,7, kwa landula oshitopolwa shaKunene shi na eepelesenda 24.

Kamanjaba oi li moshitopolwa shaKunene.

OUSHILI
Oshilyo shongudu yoPopular Demcratic Movement (PDM) shomopaliamente, Vipuakuje Muharukua ou naye a dja koHimba, okwa ti okwa mona ounona vavo momapandaanda, konima eshi eehombo dounona da ngabekwa.

“Ou na okukala wa dimbuluka oinima ivali kombinga yOvahimba: Katu na ounona ve li momapandaanda. Eeno, paife otu na shaashi kapu na vali eehombo dounona. Oshinima eshi ihashi ningwa vali unene.

“Oshitivali, Ovahimba ihava dala ounona kondje yohombo. Keshe okaana ke li kOhimba oke na xe, ashike osho osha etwa keehombo dounona,” Osho a ti ngaho.

Muharukua okwa ti okaana ka shona ile inaka dalwa otaka dulu okuudanekelwa omulumenhu ndee tava hombola eshi ke na odula ile mbali.

Ohombo oya pumbwa okuningwa peedula dopedu, osho a ti ngaho.

“Ngee okaana oko ka dalwa, oke shiivike nale kutya omukulukadi womulumenhu wonumba.

Unene meme womulumenhu oha kala mumwaina watate womukulukadi,” Osho a ti ngaho.

EEVETA DI LI OMINGE NEEHOMBO DOUNONA

Omukonaakoni woimbuluma yovakwanepangelo, Basilius Dyakugha Etitano la dja ko okwa ti oinima yomifyuululwakalo ya nyika oshiponga nai xulifwe po.

“Okatendo keameno lounona oka ti omunhu okwa kula ashike ngee e na eedula 18. Paife otava dulu okuninga eshi va hala kombinga yomalutu avo,” Osho a ti ngaho.

Natango omukonaakoni okwa ti okuya moixulu nomunhu eli koshi yeedula 14 oshi li ekwatongonga.