eetundi oda tameka keefikola di li nhatu odo di li peenhele pu hadi omeva efundja moshikandjohoololo shaKabbe South moshitopolwahoololo shaZambezi sha landula etembu mexuliloshivike lopaasa.
Omukulunhu wehongo koZambezi, Alex Sikume, okwa koleka kutya eefikola, odo kwa li da fininikwa di pate molwomeva a ninga ahapu, paife otadi longele keenhele dado dopakafimbo oko da tembulilwa.
Sikume pefimbo lomapulaapulo noNampa okwa ti etembu eli oshinima shakula osho sha pula okututa oinima yeefikola nosho yo yopaumwene yovanailonga novanafikola okudja opo pwa dengwa kefundja kwa longifwa oumbautu, eeloli neebesa.
Etivali ongula, ovanafikola okwa li va tameka eetundi davo meetenda, tava ningi omalufo.
Nankutwe Combined School, Mpukano Primary School noMuzii Combined School odo eefikola kwa li da tembulwa konima omeva a pata eefikola davo.
Eeloli neembautu okwa li da tuta oilongifo, omanga ovanailonga novanafikola kwa li va enda meebesa.
Koshi yomalongekido ape, Muzii Combined School oku li koLusese, omanga Mpukano Primary School e li koKabbe, eekilomita di lwopo30 okudja opo hapa yelukile eembautu koLuhonono.
Nankuntwe Combined School okwa tulwa popepi noSchuckmannburg Combined School, eekilomita ashike dishona naapo hapa fikama eebautu moLuhonono.
“Eetundi oda tameka keefikola adishe, nande Mpukano ongula aishe okwa li ta longekida oinima konhele yavo ipe.
Ohatu fitike omukundu ou keshe efiku tu kwashilipaleke kutya elongo nokulihonga okwa twikila puhe na omikundu da sha,” Sikume ta ti.
Omukulunhuwiliki okwa weda po kutya eefikola edi odo tadi ka talwa tete kombinga yokupewa oikulya oyo yandja kokomitiye yokuungaunga nomikundu dopaulumomumbwe.
Etembu ola kuma ovanafikola ve li lwopo600 novanailonga aveshe kumwe.
Opo kufutilwe po efimbo leetundi olo la hepa pefimbo lefundja, Sikume okwa shiivifa kutya eefikola edi nhatu itadi ka ya mefudo olo tali ka tameka momafiku 30 Apiilili 2026, otadi twikile neetundi muMei opo ku kwashilipalekwe kutya ova mana ko oinima oyo ve na okuhongwa.
Etembu ola landula etalelepo lapresidente Netumbo Nandi-Ndaitwah, oo a ile koLuhonono a ka talela onghalo yefundja.
Presidente okwa pandulile nghee oshitopolwahoololo tashi nyamukula konghalo yefundja moshiwana nosystema yehongo.
-NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
