Du Plessis a nukila pomutenya kutya ita fiye po oshipofa shoFishrot

Onghendabala yokukufa omupanguli Marilize du Plessis moshipofa shoFishrot oya dopa momhangu yopombada kodolongo yevyulonghalo mOvenduka Omaandaxa.

Epangelo inali tameka natango okuyandja oumbangihokololo wombangi yalo yotete moihokolola yoFishrot konima oshipofa sha kala momhangu yopombada oule womido nhee netata, sha etwa komaindilo ahapu oo kwa li a ningwa moshikumungu omu, Du Plessis osho a ti ngaho metokolo laye meindilo olo tali pula a fiye po oshipofa kwa li la ningwa kovatamanekwa vavali moshipofa omu, haendendjai mukulu nokwa li minista wouyuki, Sacky Shanghala naJames Hatuikulipi, konima yoivike iheyali.

Omutamanekwa umwe moshipofa, omukulunhuwiliki mukulu woNational Fishing Corporation of Namibia (Fishcor) Mike Nghipunya, naye okwa yambida eindilo olo tali pula Du Plessis a fiye po oshipofa eshi, osho kwa li e lineekelelwa odula ya dja ko muJuli.

Metokolo laye, Du Plessis okwa popya kutya okwa anya eindilo leundulilokomesho loshipofa muJanuali neudo molwomakateko oo e wetike nale moshipofa.

Osho nda popya kombinga yomakateko moshipofa, kombinga yeundulilokomesho okwa li she likolelela koinima ya konakonwa nawa, yoshili kombinga yondjokonona yoshipofa eshi nokwa li oinima yoshili oyo ya konakonwa ndee kakwa li nande omaliudo ange, Du Plessis ta ti.
Omapopyo aa okwe a ninga manga ina kupulashi eindilo olo tali pula a fiye po oshipofa.

Shanghala momukandaano oo wa yandjwa komhangu ota ti omapopyo a ningwa kuDu Plessis pefimbo ovatamanekwa kwa li va holoka komhangu odula ya dja ko muAuguste nometokolo laye kombinga yokuundulila eindilo komesho muJanuali, aa holola kutya komaliudo aye omaindilo oo kwa li a ningwa nale kovatamanekwa aa kateka oihokolola, nokwa li e li olwaamambinga.

Du Plessis metokolo laye Omaandaxa okwa ti: “Okwa monika kutya eyokomesho loshipofa eshi ola kala nokukatekwa shoshili, kashi shii edilaadilo lopaumwene.

Omhangu kai na fiku ya popya kutya otai ka tambula ko keshe eindilo tai ka pewa ‘pamukalo wokukateka’.

“Pakutala kutya oihokolola yoshipofa eshi oya kala nale tai katekwa, omhangu otai kupulashi eindilo leundulilokomesho.”

Pamaliudo aye, omunhu e shii eshi ta ningi ita dulu okukala e wete kutya okwa li e li olwaamambinga eshi a mona kutya oshipofa osha kala shi hadi omakateko, Du Plessis osho a weda po ngaho.

Kombinga yomapopyo aNghipunya kutya na fiye po oshipofa shaashi okwa lombwela ovatamanekwa neehaende moshipofa omu kutya oku shii eembangi mbali depangelo, odo hadi di mOtjiwarongo, omo kwa li ha di efimbo a li mangestrata momhangu yoshitopolwahoololo, Du Plessis okwa ti oku “va shi kashona”, ashike kave shii ookaume yee ke na ekwatafano lopangeshefa navo.

“Kandi na ekwatafano navo olo ngeno tali xwaxwameke nghee ndi na okukonakona oumbangi wavo,” Du Plessis ta ti.

Umwe womoohaende moshipofa omu, Joas Neemwatya, oo a kalela po Otneel Shuudifonya, okwa lombwela omhangu kutya okwa hala okuninga etalululoindilo li li ominge netokolo laDu Plessis kombinga yeindilo leundulilokomesho loihokolola yoshipofa.

Eindilo laNeemwatya a pitikwe a tule mo etalululoindilo otali ka udika momafiku 13 Apilili.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.