Desert Radio ngashingeyi okuli koDStv nokoGoTV

Oradio yoDesert Radio, yehangano lyiikundaneki lyedhina The Free Press of Namibia, ngashingeyi otayi adhika komakuthikuthi gehangano lyomatumimawi-mombepo lyoMultiChoice.

‘The Bold Voice’, ngaashi oshilimbo sho-Desert radio tashi ti, otayi kala ngashingeyi tayi uvikwa ko-DStv kekuthikuthi lyonomola yo-839 omanga koGoTV otayi adhika ponomola yo-318.

Etokolo ndyoka olya ningwa ongoshitopolwa sheuvathanolongelokumwe pokati ko-The Free Press of Namibia osho wo oMultiChoice Namibia, naashoka oshe eta oDesert Radio yi kale tayi uvikiwa komatumomawi goDStv noGoTV.

Omukuluntu gwoDesert Radio, Charles Tjatindi okwa popi kutya onkatu yokutula oradio yawo metumomawi-mombepo lyoMultiChioce, onene mondjodhi yomilandu dhokwaandjaganeka omakuthikuthi goDesert Radio opo ga adha oshigwana ashihe. Okwa popi kutya shoka otashi ka pupaleka aapulakeni naayakulwa yoDesert Radio moshilongo osho wo pondje yoshilongo, ya vule okulandula nuupu oonkundana dhopethimbo, osho wo omainyanyudho.

“Otatu tsikile nokwiindjipaleka ethikitho lyoradio yetu kokule nokushilipaleka kutya otwa kwatathana naalanduli yetu, mpoka tatu vulu. O-Desert Radio kayi shi owala oradio – ndele oyo oshigwana shaantu mboka ye yi landula esiku kehe okumona oonkundana osho wo omauyelele ge na sha nomainyanyudho,” osho Tjatindi a popi ngaaka.

Oradio ndjoka yo-Desert Radio, oya totwa po mo2021, noyili oshitayi shehangano lyo-The Free Press of Namibia ndyoka tali tsikile nokunenepeka egandjo lyoonkundana, noyi na wo iitayi ngaashi oThe Namibian osho wo oshinyanyangidho sho-WordPress.

Omasiku ga zi ko oDesert Radio oya tameke nokugandja omawi monooli yoshilongo kekuthithi lyomOshakati lyo105.6 FM, ndyoka konyala lya kwata ko iitopolwa ayihe monooli yoshilongo.

Oradio ndjoka, ngashingeyi yi na owala omalaka gaali Oshiingilisa nOshiwambo, oya thaneka wo okwi indjipaleka omakuthikuthi kiitopolwa ngaashi shErongo noyaKavango.

“Omanga omvula ndjika inaayi pwa ko, oDesert Radio otayi ka kala tayi uvika komakuthithi goFM miitopolwa mbyoka. Otatu kaleke po aapulakeni naayakulwa yetu yomatseyitho gopaipindi noonkundana dhaashoka tashi inyenge,” osho Tjatindi a popi ngaaka.

Omuniilonga gwetulokumwe lyoonkundana moradio, Charmaine Ngatjiheue, okwa popi tati: “Ondi wete kutya otundji otwa li nomaipulo ishewe katwa li tushi ngele otatu thiki po ponkatu ndjika, okukala twa adha oshinima oshinene ngaashi okuthikitha omakuthikuthi monooli yoshilongo. Okukala ngashingeyi tatu adhika koDStv oshinima lela oshinene, notashi ulike kutya ongoDesert Radio otatu vulu okwa adha aantu oyendji, ndele hamoNamibia ashike, ashike kehe tuu mpoka pwa thika omakuthikuthi goDStv.”

Tiri Masawi gwoDesert Radio, okwa popi kutya shoka sha pondolwa po korardio otashi ulike kutya oradio otayi humu komeho notayi kambadhala okukala yi na ongushu kaapulakeni osho wo kaayakulwa. “Oshi li oshitopolwa shehumokomeho, kutya shampa ashike pu na ompito yokuthika kaantu yetu, nena otatu kala wa pandula oku yi longitha,” osho a popi ngaaka.

Mongashingeyi oDesert Radio komakuthikuthi goFM otayi adhika mOvenduka nomiitopolwa yopopepi ko95.3 FM osho wo miitopolwa yomonooli yoshilongo ko105.6 FM. Orardio ndjoka otayi vulu wo okupulakenwa pamalungula kondjukithi yo-desertradio.fm.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.