Ballotti ota dilaadila okufiya po oilonga

Omupedu minista wehongo, eduto loinima ipe, ovanyasha, omaudano, omaunghulungu nomifyuululwakalo Dino Ballotti vati okwa hala okufiya po oilonga yaye yopolitika konima a mona ondjabi ishona kwaayo kwa li e lineekela.

Ondjabi yaye oya dja poshimaliwa shi fike poN$150 000 fiyo opoN$65 000 komwedi (manga inai dja oishoshela).

Ballotti oku shiivikile nawa kehangano ledina Namibia Investment Promotion and Developmenet Board (NIPDB), ehangano lepangelo olo li shiivikile eendjabi di li pombada nosho yo oimaliwa yomalweendo.

Odula ya dja ko, Ballotti okwa li a ya mopolitika.

Euliko laye ongomupedu minista otali eta opo a kale ta mono ondjabi i fike poN$65 000 komwedi, okuyelakanifa naayo i fike poN$150 000 oyo kwa vati ha mono eshi a li omuyandjimayele koNIPDB.

The Namibian okwa uda kutya Ballotti omafiku aa okwa lombwela omaume aye kutya ondjabi yaye ipe itai mu wanene nofamili yaye. Okwa ti kutya otashi dulika a efe oilonga.

Natango inashi yela nawa ngee Ballotti ota ka fiya po oilonga. Eedjo dimwe odi udite kutya onghatu oyo otashi dulika i ka danene ondjokonona yaye yopolitika, unene ngaa eshi presidente Netumbo Nandi-Ndaitwah kwa li a yambidida ekwatelemo laye momusholondodo wongudu neuliko laye ongomupedu minista.

Nandi-Ndaitwah otaku tiwa okwa taalela omafininiko omeni longudu kwaavo kwa li tava kondjifa euliko laBallotti.

Omupedu minista Etitatu okwa koleka elunduluko loshimaliwa, ashike okwe likanyuna kutya ke na nande ondunge yokufiya po oilonga.
“Tetetete, paushili, omwaalu ou kwa li wa yandja kau li mondjila.

Ashike nee, tangi eshi wa tambula ko ekufombinga lange.

“Oshi li elunduluko lakula, ashike ondi na oshinakuwanifa shokuyakula oshilongo shange, ndee kapu na nande omwaalu woshimaliwa wonhumba tau dulu okwiimba nge ndi shi ninge,” Osho a ti ngaho.

Ballotti okwa koleka kutya oku na okuninga omalunduluko molwondjabi yaye oyo ya shuna pedu, ashike i na popya nande omwaalu u li mondjila ou tau popiwa. “Onda hoolola okulandifa otuwa ile mbali, notwa ninga omalunduluko amwe keumbo opo tu dule okulonga nawa naasho tu na.

Eli kali shi epulo liwa. Ngeno okwa li ndi na noimaliwa, ngeno inandi tambula ko oshinima eshi shokuyakula nokukufa ombinga moshikondo osho oministili yetu ya pewa i yambidide.”

Ballotti okwa ti okwe lilongekidila oilonga oyo noinakuwanifa yayo.
“Ngee oshikako shetu sheedula nhano sha pu ko, ohandi i nawanawa nda manguluka ngee inatu wanifa po omaudeneko oo twa ningila Ovanamibia vakwetu.

“Natango , ngee omufimanekwa okwa mono kutya ohandi dulu okutwikila, ohandi shi ningi nomwenyo aushe, kutya nee odjambi oi li ngahelipi. Okuyakula efimano noshinakuwanifa shinene nda pewa.”

Ongomupedu minista olusheno nomeva aBallotti ohaa kosho oshimaliwa shi fike poN$48 240, oshimaliwa sheumbo oshi fike poN$159 222, omanga oshimaliwa shongodi shi fike poN$1 080, ashike oimaliwa aishe ei otai kala tai futwa kepangelo.

Manga ina ya mopolitika, omupedu minista okwa li e na onghatu yakula koNIDPB, tete ongomukulunhuwiliki weengeshefa dishona nodopokati okudja momudo 2021 fiyo omuAguste 2024.

Konima yokafimbo kaxupi koFirst National Bank of Namibia, okutameka momafiku 15 Auguste 2024, okwa fiya po ombaanga sha landula eshi a hoololwa kuNandi-Ndaitwah ongokandidate yomutumba wopashiwana.

Otaku tiwa FNB okwa topoka naye shaashi okwa li e li mopolitika.

Konima omhito yaye yokuya momutumba wopashiwana kwa li ya kolekwa, okwa alukila nee koNIPDB muOktoba 2024 kokondalaka yokuyandja omayele yeemwedi hamano, kwa li ha mono oshimaliwa shi li lwopoN$150 000 keshe komwedi.

OILONGA YOMAUME

Odula ya dja ko oThe Namibian okwa li ya lopota kutya ehangano lokukonga nokunana ovanangeshefa okwa li tali popilwa okutota ‘oilonga yomaume’.

Eshi okwa li vati sha kwatela mo okupeulula Ballotti oilonga mehangano odula ya dja ko mwa kwa telwa omhito oyo kwa li a totelwa onomonenawina.

Eedjo okwa li da popya kutya okuyandjulula oilonga kuBallotti okwa li okulongifa oimaliwa yovafuti voishoshela ku kambaininwe Swapo.

“Konima nda lombwela omukulunhuwiliki woNIPDB Nangula Uaandja etokolo lange lokufiya po ombaanga, okwa pula ngee ohandi dulu okushuna ndee handi ka wilika eeproyeka dishona … ohandi kala handi longo oilonga yeekondalaka yaNIPDB,” Ballotti osho a lombwela oikundaneki odula ya dja ko ngaho.

Okwa ti okwa euliko laye okwa li eudafano okudja keembinga adishe.

“Konima yedina lange momusholondodo woSwapo, elelo lombaanga naame okwa li tu na eenghundafana omo kwa li kwa udafanwa kutya ohandi ku fwa mo mongeshefa opo kwaamenwe omaupyakadi onhumba, kombinga yoilonga yange, mongeshefa nomoshikondo shoikwambaanga,” Ballotti osho a ti ngaho odula ya dja ko.

Eshi aalukila koNIPDB okwa li sha talika kutya okwa ningilwa ko nawa kuUaandja, opo naye a dule okumona omauwa okudja kuye ngee a ningi omutotiveta ile oshilyo shOkabinete.

‘EULIKO LOPAHOLAMO’
Ongudu yomilameno yopambelewa ikulu, yoPopular Democratic Movemente (PDM) odula ya dja ko okwa li ya holola omalimbililo kombinga yelelo, efikopamwe nelongopauyelele lomahangano epangelo sha landula eshiivifo kutya Ballotti otaa lukile koNIPDB.

Momukanda wa yandjwa koikundaneki odula ya dja ko, presidente woPDM McHenry Venaani okwa li a popya kutya euliko okwa li la ningwa paholamo.

Okwa ti eelopota oda ti, oilonga yaBallotti yokuyandja omayele otashi dulika ya ha li po omanga kwa li ina ulikululwa, nokapwa li pu na omilandu dayela dokukuta dovanhu vamwe ovo navo ve na omauhongelwe nowino wa pumbiwa opo va dule okuninga omaindilo.

Omupopiliko woNIPDB Catherine Shipushu Etivali okwa ti ehangano okwa li la potokonona oshikumungu osho odula ya dja ko.

“NIPDB okwa li a yandja omukanda wayela kombinga yoilonga yaDino Ballotti. Lesha omukanda ou wa kopekwa oku u na ouyelele kombinga yoshikumungu eshi.”

Etitatu oThe Namibian okwa li ya hala okuuda kutya oN$150 000 okwa li ya tokolwa ngahelipi nokwa li ya yelakanifwa ngahelipi neendodo dikwao doilonga yokuyandja omayele moNIPDB ile moshikondo shepangelo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.