Omupedu minista womauyelele nomakwatafano opaungoba Modestus Amutse okwa ti ovaleli veengudu domilameno ova “lai” noshiwana inashi va pwilikina.
Natango okwa ti vali ovaleli veengudu domilameno kave li nawa momitwe.
Oshinima eshi Amutse okwe shi popya koshoongalele shoSwapo sha li kOshakati Oshoondaxa.
“Vamwe vomuvo opo va kala nale okudja ngaa manga emanguloko lihe po, ashike natango otave mu pula mu va hoolole. Onde va taataya mo momukunda wange.”
Amutse okwa pula ngee eengudu domilameno otadi dilaadila kutya Ovanamibia ova lai.
“Opo wa kala apa ashike ino eta po nande oveta imwe. Inandi mona nale oveta ya totwa keengudu domilameno. “Opu na ovo hava ti otava dulu okulela nawa ve dule vakwao. Va puleni kutya ova lela peni? Ondjokonona yavo oi li peni? Ondjokonona yavo oshike?”
Amutse omutoolinghundana mukulu wehangano lokwaandjakaneka omawi momhepo laNamibia oo a ninga oshilyo shopaliamente muMarsa 2020, konima eshi kwa li ha longo ongokamusela woshikandjohoololo shaShikuku okudja momudo 2010 fiyo 2019.
Okwa ti kapu na vali ongudu imwe iheshi Swapo tai dulu okulela Namibia.
Okwa ti okudja ashike pemanguluko, Swapo okwa kala e na oshinakuwanifa shokudeula ovahongifikola.
Okwa weda po vali kutya Namibia ota ka kala e na oshipambu shakula moshikondo shoikwamina, osho a tengeneka kutya otashi ka ya pombada fiyo opeepelesenda 50.
Vipuakuje Muharukua omunapaliamente noshilyo shikulu shongudu yoPopular Democratic Movement (PDM) eshi kwa li ta popi poshoongalele opo tuu opo okwa ti etokolo laye lokuwaimina Swapo muJuni okwa li la dindwa nawa nokakwa li ashike la kufwa noupu. Muharukua okwa kala omutotiveta wongudu yomilameno yopambelewa oule weedula omuwoyi omanga ina fiya po ongudu.
Okwa ti Swapo ota dulu okulele oshilongo.
“Oshinima eshi onde shi dilaadila efimbo lile. Kashi shi ashike kutya onda kala nokushiipula paumwene ashike novafimanekwa vahapu ove shi kundafana naame, ndee ehalo lange tali kulu, osho sha eta opo ndi kale ndi li apa.” Okwa pula oilyo yongudu novayambididi voSwapo va kwashilipaleke kutya oSwapo osha mona omawi ahapu nokwa yandja elineekelo laye mokandidate yoSwapo, Netumbo Nandi-Ndaitwah.
“Omunhu ota dulu okuuya kwoove ndee ta ti otwa pumbwa elunduluko, otwa pumbwa omuleli umwe, ile omuleli umwe ota ka ninga shonumba noshongadi, omaudaneko … Oto ka itavela ngahelipi oshinima osho ngee itava dulu nokuwilika omaumbo avo?”
Okwa ti manga ovanhu tava holola ehalo lelunduluko, ha malunduluko aeshe e na omauwa naavo tava ti otava dulu okuninga nawa itava dulu okulela nawa oshilongo. Hamushangandjai wevava lovanyasha loSwapo Ephraim Nekongo okwa ti ovo tava ti ongudu kai na eshi ya longa otava popi oipupulu shaashi Swapo okwa tunga oipangelo, eefikola nomalusheno komikunda.
Okwa ti ovanhu ovo tava udaneke oilonga navo kave na oilonga.
Pelesidente wongudu yoPDM McHenry Venaani okwa ti Amutse ke na nande owino wopolitika kakele ashike kokukala omutoolinghundana oo a xwaxwameka Swapo koNBC.
“Ova dopa. Ovanhu ova fya ondjala.” Venaani okwa ti oPDM oya hala oilonga, omaumbo e li pamufika, omaxupilo e li nawa nosho yo ounamapya nounaimuna.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
