Amushelelo ta pula opo ovapolifi ava va yasha ovalumenhu vatano kOkahandja va mangwe po

Oshilyo shoNamibia Economic Freedom Fighters, Michael Amushelelo, otashi pula kutya opolifi yaNamibia nai mange po ovanhu ovo va dipaya ovalumenhu vatano ovo kwa li tava feekelelwa omunyeka odula ya dja ko muApilili kOkahandja.
Amushelelo eshi okwe shi ninga okupitila momukandaindilo oo a yandja komupedu inspekta wopolifi yaNamibia komufala Elias Mutota, mOvenduka Etivali. Ovalumenhu vatano okwa li va yashwa kOkahandja oufiku wo25 Apilili odula yandja ko.
Opolifi konima yoshiningwanima oya ti kutya ovalumenhu ova yashwa konima eshi va kendabala va umbe ohauto yopolifi tete oyo ya li tai va shikula. Opolifi natango oya ti okwa li ta kufeekelwa kutya ovalumenhu ovo okwa li va hala okukaninga omunyeka wa homata konduda yokundombola kOkahandja. Ovalumenhu ava okwa li va dimbulukiwa, Erkki ‘Akawa’ Martin, Abed Andreas, Marius Ipinge, Malaik Kotokeni naFlavianus Endjala.
Amushelelo Etivali okwa ti oshiningwanima okwa li omahepeko opolifi nopolifi kai nakonasha noufemba womunhu. “Ohatu pula nakuninga oshinima eshi, ouyuuki, oshili nouyelele kopolifi,” Osho a ti ngaho.
Omanga ta lundile opolifi kutya otai longifa eenghono dayo nai, okwa ti vali: “Paife, opolifi yaNamibia otai liumbata vali ya fa epangelo lokatongotongo “Suidwest Africa police’ oyo kwa li ihe na noufemba womunhu noya teyaula po omaufemba ovanhu no inava pewa nande ehandukilo.” Amushelelo okwa weda ko vali ta ti ngeenge ovapolifi ovo va yasha ovanhu ava inava kwatwa po fiyo omEtitano, ota ka ninga vali ekangha momafiku 04 Marsa, fiyo otava mangwa po.
Amushelelo moivike yandja ko okwa lundila opolifi kutya otai holeke oshibofa noyadopa okukatukila onghatu ovapolifi ovo ve li moshinima shi li ngaho.
Oshivike sha dja ko moikundaneki, omukulunhu wopolifi moNamibia komufala Joseph Shikongo, okwa ti omahokololo avali oo kwa li a teelelwa okwa monika, paife okwa shaala ashike ehokololo lombangi imwe olo inali yandjwa.
“Mokuweda po, omufeekelwa omutihamano moshiningwanima okwa monika, konima yeemwedi hamano hamumbala, ashike ehokololo laye nalo ola monika. Onghene nee, okwa li kwa ongelwa omahokololo e li 51 aanenwa, mwa kwa telwa eembapila tadi koleke di li 14,” Osho a ti ngaho.
Shikongo okwa ti vali omakonaakono okolabora aa pwa nepeko olo li li momakonaakono opolifi li nasha noshiningwanima otali ka yandjwa komutamanekindjai oshivike eshi opo li ka talululwe.