Amushelelo a pewa esiku lyiihokolola yoshipotha shaaniilonga yomomapandaanda

Omunandjungu Michael Amushelelo opamwe naafekelwa yalwe yatatu okwa thanekwa ya ka holoke mOmpangu yaMangestrata gwaVenduka muMei omumvo twa taalela, sha landula sho kwa li ya kwatwa po mekwatathano nokuhwahwameka evundakano moshigwana.

Amushelelo naayopaleki yomomapandaanda mOvenduka, Immanuel Mbonda, Alfred Kashimbi Sabas osho wo Padelia Hamukwaya oya tseyithilwa kutya iihokolola yawo otayi tameke momasiku 15 Mei, sha landula sho ya holoka komeho gamangestrata Jozanne Klazen, mEtitatu.

Oya taalela iipotha ya kwathela mo okwahwameka evundakano moshigwana osho wo eyonagulo lyomaliko, kohi yOveta yi indika Omangundumano yo1956.

Oya tulwa miipandeko momasiku 15 Febuluali numvo, sha landula ekanka ndyoka kwa li lya ningwa kaayopaleki yomomapandaanda nokwa li lya hulile mevundakano ndyoka lye eta aayopaleki ya halakanithe iiyagaya momapandaanda gondolopa mOvenduka molwashoka inaya mbilipalelwa anuwa keyamukulo lyelelo lyondolopa.
Amushelelo otaku hokololwa oye kwa li a kwatela komeho ehololomadhiladhilo ndyoka.

Aayopaleki, pethimbo ndyoka, oya popi kutya oya kala taya longo muMuni gwaVenduka ongaayopaki uule woomvula dha konda po20, ashike onkene haya futwa oshimaliwa shi li pevi noonkondo, yo ishewe kaye na omauwanawa gaaniilonga ngaashi gopaunamiti, nopenzela.
Oya gwedha po kutya shoka hashi ya uvitha nayi noonkondo ooshoka kutya nonande oya longa mo ethimbo ele, onkene owala ye li pakontalaka.

Padelia Hamukwaya (54), okwa li a popi kutya okwa kala omwoopaleki gwaMuni gwaVenduka okuza mo1999, ashike sigo ongashingeyi oha pewa owala okontalaka yopakathimbo.

“Sho twa tameke okulonga muMuni gwaVenduka, inatu pewa omauwanawa ga sha ngaashi goopenzela nogopaunamiti, nohatu kwata owala ooN$3 300 komwedhi. Muule woomvula 24 dha piti onda kala owala handi pewa okontalaka kaayi na omauwanawa ga sha,” osho a popi ngaaka.

“Otatu nana lela nondatu, uuna twa kutha omikuli ohatu nyengwa oku dhi shunitha molwashoka ondjambi yetu ihayi gwana. Shika osho nee tashi tu thiminike tu kondjithe okupewa iilonga tayi kalele.”

Amushelelo okwa li a mangululwamo mondjeedhililo koshimaliwa shooN$3 000, konima sho a kala mondholongo uule woshiwike.
Mbonda, Sabas naHamukwaya oya mangululwa mo mondjeedhililo sho kehe gumwe a pewa oboloha yooN$1 000, konima yoshiwike ye li mongali.

Mompangu uunambo, shi ikwatelela keindilo lya gandjwa kuhahende gwaafekelwa, Samuel Kadhila, mangestrata Klazena okwa kutha po limwe lyomoompango ndhoka kwa li dha pewa Amushelelo sho a pewa oboloha, nokwe li pingenepo nompango yimwe ompe.

Shoka otashi ti, ompangu oya gandja elombwelo kutya Amushelelo ke na we okukala aluhe ti ilopota komukonakoni gwoshipotha she Omaandaha kehe, noya pingenwapo kompango opo a kale ta tseyithile omukonakoni gwoshipotha she aluhe ta zi mo momudhingoloko gwaVenduka.

Ompango yimwe ndjoka a kala a pewa, ishewe inayi lunduluka, oondjoka kutya ina uvikilwa sha oshikoya sha faathana naashoka ta tamanekelwa, moshitopolwa kehe shi li moongamba dhaNamibia.

KAKUKUTU GWOMAHOLOLOMADHILADHILO

Petameko lyomwedhi gwa zi ko, Amushelelo okwa mangululwa mo mondjeedhililo sha landula oomwedhi dhi li puheyali e li mondholongo, sho a kwatwa po pethimbo kwa li a kwatela komeho ehololomadhiladhilo lyi li ompinge nonkalo yokwaana iilonga moshilongo.

Amushelelo, omunandjungu Dimbulukeni Nauyoma, osho wo oshilyo shongundu Popular Democratic Movement megumbo lyopashigwana Inna Hengari oya tulwa miipandeko sho ya ungeneke

ehololomadhiladhilo ndyoka nonande okwa li lyi indikwa kopolisi kaali ningwe, mEsiku lyEmanguluko (21 Maalitsa).

Aafekelwa mboka yatatu okwa li ya taalela iipotha ya kwatela mo okwe eta evundakano moshigwana, okuyonagula omaliko gepangelo osho wo okukwahwameka evundakano moshigwana.

Omwedhi gwa zi ko, mangestrata Linus Samunzala okwa gandja etokolo kutya ompangu inayi mona omatompelo ge na omungo okumona ondjo aafekelwa, momatamaneko ngoka kwa li ya taalela.
Hengari moshipotha shoka okwa zi mo muAuguste sho omatamaneko ge ge ekelwahi, ashike Nauyoma naAmushelelo okwa li ya tsikile niipotha yawo sigo omomasiku 12 Kotoba 2023.

Omumvo gwa zi ko, Amushelelo opamwe nakuume ke Nauyoma oya kala mondholongo uule woomwedhi ndatu nolwanima oya mangululwa mo koboloha yooN$5 000 (kehe gumwe), sho ya tulwa miipandeko pethimbo ya li taya kambadhala okupatitha oositola dhAachina kehala lyomangeshefelo lya tseyika nawa China Town, mOvenduka.

Ayehe yaali okwa li ya patululilwa iipotha yokwe eta evundakano moshigwana, okuhwahwameka oshigwana shi pogole oveta osho wo edhengo okupitila momatilitho.

Lwanima iipotha mbyoka oye ekelwahi mOmpangu yaMangestrata gwaVenduka moKatutura, sha landula sho omutamanekindjayi a ndopa okuninga etokolo pethimbo.