Amushelelo a londodhwa nokwamangululwa

OMUNANDJUNGU ngoka wo e li oshilyo shongundu yoNamibia Economic Freedom Fighters (NEFF), mEtiyali, okwa londodhwa kopolisi nolwanima okwa mangululwa sha landula sho i ifala yemwene kopolisi konima sho a ningi onkambadhala yokupatila ositola yo-Rani Supermarket mOkuryangava mOvenduka.

Ondjayi yEtanga lyopolisi Joseph Shikongo okwa koleke kutya Amushelelo okwa pewa elondodho nokwa mangululwa. “Onda tseyithilwa kombinga yoshiningwanima shoka nonda lombwele opolisi yi kale tayi tonatele onkalo. Molwashoka inatu yakula oshipotha sha sha [a tulilwa mo], onda lombwele opolisi yi popye naye noku mu tseyithila a landule omilandu dhomondjila opo a ninge ehololomadhiladhilo,” osho Shikongo a popi ngaaka, uunambo.

• 

Amushelelo okwa li a tulwa miipandeko monakuziwa sho kwa li a ningi onkambadhala dhokupatitha oositola dhaachina koChina Town, osho wo okupatitha oositola dhilwe.

Mokavidio kokiikundaneki yopankalathano komalungula, mEtiyali, Amushelelo okuli mo ta lombwele aaniilonga osho wo ookastoma dhositola yoRani Supermarket kutya ositola oteyi patitha.

Okwa popi wo kutya ositola ndjoka itayi vulu nande okukala tayi longo omanga ya kutha miilonga aaniilonga ye li 100 koshitayi shokOshakati molwashoka ya kutha ombinga mehololomadhiladhilo taya pula onkalo yi li nawa miilonga.

Amushelelo okwa popi kutya kopolisi yaWanaheda okwa yi ko sho a dhengelwa ongodhi kopolisi i ifale yemwene sha landula sho a monika komalungula ta patitha oRani Supermarket. Ekutho miilonga lyopakathimbo lyaaniilonga yoRani, olya kolekwa kehangano lyokukuta aaniilonga lyedhina EmployeePlacement Services of Namibia (EPSN), sha landula sho anuwa aaniilonga mboka ya thigi po iilonga mEtitano inaaya laleka noku ka waimina ehololomadhiladhilo ndyoka kwa li lya kwatelwa komeho koNEFF.

EPSN ehangano ndyoka hali kutu aaniilonga noku ya tuma koositila dha yooloka, nonkene aaniilonga mboka taya longo koRani oye li kohi yelelo lyaEPSN.

Mwene gwo-EPSN, Gottlieb Ndjendjela, ngoka wo oye kansela gwoSwapo gwoshikandjohogololo shaTsumeb, okwa koleke kutya aaniilonga yehangano lye mboka haya longele koRani mOshakati oya kuthwa miilonga pakathimbo. “Uupyakadhi mpaka oomboka kutya olye ekupe uuthemba sho wa zi ko kiilonga yoye?” osho a popi ngaaka.

Nonande Amushelelo okwa popi kutya aaniilonga ya kuthwa miilonga pakathimbo oye li pe100, Ndjendjela okwa popi kutya aaniilonga mboka ya kuthwa miilonga pakathimbo oye li owala 20, nosha ningwa manga taku ningwa omakonakono.

EHOLOLOMADHILADHILO

Aaniilonga yehangano lyoRani Supermarket mOshakati oya ningi ehololomadhiladhilo pomatungo gehangano lyoRani Group of Companies momasiku 15 Desemba, mekwatelokomeho lyongundu yoNEFF, okukambadhala opo ku hulithwepo ondjambi onshona ndjoka haya kwata, eindilo opo ya pewe iilonga tayi kalelele, onkalo yiilonga yi li hwepo, osho wo okufutwa omalutaima.

“Tse aaniilonga katu na nande omakankameno giilonga yetu. Elelo ohali kala tali tu umbu omalaka. Oondjambi dhetu oonshona noonkondo, ishewe ohatu longo omasiku gaheyali moshiwike pwana olutaima nenge iifuta yomOsoondaha. Ohaye tu lombwela kutya ondjambi yetu oyu ukilila, ashike uuna omuntu a yi mefudho oha pewa owala etata lyondjambi,” osho omupopiliko Cornelius Nepela a popi ngaaka omanga inaa gandja omukandanyenyeto gwawo.

OKUZA KU-RANI

Ali Dharani gwehangano lyoRani oshiwike shika okwa popi kutya ongundu yoNEFF nayi gandje uumbangi ngele aaniilonga otaya monithwa iihuna shili.

“Ngele otwaya pambambo oveta yontumba moshilongo, nena taye tu lopote kuuministili mboka wu na oshinakugwanithwa. Tse ehangano hali iyutha kooveta,” osho a popi ngaaka.

Sho a pulwa kutya omolwashike ehanagano lyawo inaali kuta owala

aaniilonga paukililo peha lyokupitila mehangano lyokukuta aaniilonga, Dharani okwa yamukula tati: “Ndyoka ehogololo lyelelo osho wo lyehangano lyetu. Ngele otu na shoka twa ningwa kaashi li paveta, nena tu katukileni onkatu. Nongele hasho nena oshi li momake gehangano lyetu [okuhogolola kutya omukalo gu ni tatu longitha okukuta aaniilonga].”

Pokati mpoka, ehangano lyoohahende lyedhina Dr Weder, Kauta & Hoveka Inc ndyoka lya kalelapo oRani Supermarket olya gandja elondodho lya yaga kegonga kuAmushelelo opo kaa ninge we onkambadhala yokwiikuthila oveta momake a patithe oositola dhoRani, molwashoka otaye mu katukile onkatu yopaveta.