Omuleli wongudu yoAffirmative Repositioning (AR) Job Amupanda okwa ti ita pitike nande okutota po omhangu yeetendela.
Eshi oshe ya konima omupedu pelesidente Netumbo Nandi-Ndaitwah Omaandaxa a popya kutya opu na omumbwe yomhangu ye likalekelwa yokuungaunga neenamanana deetendela.
Nandi-Ndaitwah oshinima eshi okwe shi pula pefimbo lepatululo lopambelewa loEnviromental Crimes Court kOtjiwarongo, ta ti otashi mu luluma eshi oipangelo ihe na omiti molwo ashike eenamanana deetendela.
“Haende akula,pamwe nomutamanekindjai, onda hala opo mu tale oshinima eshi nelitulemo. Itatu dulu okukala tu na eemhangu dowina dokuungaunga neenamanana kombinga yeetendela?” Osho a pula ngaho.. Ashike nande ongaho, Amupanda, okwa ti epangelo shixwepo li nghonopaleke etotepo lomhangu yokuungaunga noinima ishona, oyo inali ninga nghee oshilongo sha mangulukile.
“Itatu ka pitika nande nokutambula ko omhangu yeetendela i totwe pu na nale oyo hai ungaunga noinima yoludi eli. Otwa hala omhangu yoinima ishona opo ovanhu va dule okukala hava i ko ngee pu na ou e na eengunga davo,” Osho a popya ngaho komalungula Etitatu.
Amupanda okwa ti epangelo ola tota po nale omhangu yokuungaunga noinima yoludi olo, oyo ta ti omhangu “yovakengeli”. “Ou omupedu pelesidente ngaa ou e li mepangelo omo a hala kutya opu na oupyakadi, ndee oupyakadi ou otau dulu okukandulwa po kwaasho taku ti omhangu yeetendela.
Otu na nale osho hashi ifanwa kutya omhangu yoinima yoludi olo, oko oibofa yakula hai ungaungwa nayo ndee keshe oshinima tashi pula eemiliyona oko hashi i komhangu oko.” Amupanda okwa ti okwa udifwa nai komapopyo omupedu pelesidente. “Okwa li nda uda nai eshi nda uda oshinima osho. Kandi shi ngee ovanhu otave mu pukifa ile itave mu tulile mo omadilaadilo nawa . . ,” Amupanda osho a ti ngaho. “Okuyadi ovanhu ve li popepi naye mepangelo ovo kwa li va pumbwa ve mulombwele kutya otu na nale omhangu yovakengeli oyo hai ungaunga noinima yoludi olo,” Osho a ti ngaho.
“Oupyakadi weetendela ohadi totwa kewilikongudu lokukonga oipumbiwa yepangelo.
Ou na etokolo lewilikongudu, po opu na ongudu yokutalulula po opo nee hava i komhangu yopombada opo. Otwa pumbwa okukala twa kotokela oinima oyo ovanhu hava popi molwomahoololo,” Amupanda osho a kunghilila ngaho.
“Ovanhu ovo nava fye ohoni tave mu efa a popye oinima aishe ei inai talwa nawa.
“Osho otashi ulike oupyakadi ou tu na nepangelo loSwapo nomukalo wavo wokuninga omatokolo nosho yo ovanhu ovo tava efa ashike ovanhukulunhu vetu ve lifife ohoni ngaashi ngaho,” Osho a ti ngaho.
OMAYAKULO A IWA MOSHIPALA
Nandi-Ndaitwah Omaandaxa okwa ti omanga eetendela tadi kondjelwa, okuyandja omayaku otaku iwa moshipala.
“Oshiholelwa shiwa osho sho shomiti oshinima osho sha fimana pokati komwenyo nefyo. Ohandi ku pula, haende omukulunhu, ngee ove nongudu yoye otamu dulu okutala koshikumungu eshi sha endelela opo oinima yeetendela i kale tai longwa mo diva opo tu dule okuyandja omayakulo awa kOvanamibia,” Osho a ti ngaho. Omunashipundi wehangano lokukonga oipumbiwa yepangelo ledina Central Procurement Board of Namibia, Amon Ngavetene, Etivali okwa ti opwa pumbwa okuningwa omilandu dimwe di na sha neetendela.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
