OSHIGONGI shOswapo shOpashitopolwa sha Shikoto shoka sha li ko mOlyomakaya ga zi ko pOnyaanya mOndonga mOshitopowla sha Shikoto, osha hogolulula, Armas Amukwiyu, pwaana omukondjithi, oye a kale natango Omukuluntuwiliki gwOswapo mOshitopolwa sha Shikoto muule woomvula ntano tadhi landula.
Oshigongi osho tuu shoka, osha hogolola Meya Omukulu gwa Shomeya , Engel Nawatiseb a kale Omudhiginini gwIiniewe yOswapo MOshitopowla sha Shikoto omanga David Mulunga a tseyika wo nawa nedhina Quito, a hogololwa a kale Amushanga gwOmauyelele nOmahwahwameko gOpapolotika mOshitopowla sha Shikoto.Omahogololo ngaka oga li mewiliko lyOministeli yOonakulwa Aakulu Omundohotola Nickey Iyambo notaku tiwa kutya oga li ga ende nawa unene. Gavena yOshitopolwa sha Shikoto, Penda yaNdakolo naye wo omo a li moshigongi shoka shomahogololo. Aahogololi oya li ya za kIitayi yi ili noyi ili yOswapo mOshitopolwa sha Shikoto.Oshigongi oshinene shOswapo (Congress) shoka tashi ka kala ko pehulilo lyomumvo nguka, ano mu Desemba, notashi ka hogolola ngoka taka landula Omupresidende Hifikepunye Pohamba mUupresidende kombinga yOswapo, otaku tiwa kutya manga inashi ningwa Omalelelo gOpevi goSwapo ngashi, oosectiona, oobrancha, oodistricta noshowo nee ngoka gOpaitopolwa, ano paerigiona, oge na okukala nale ga ninga omahogololo moka tamu ka za nee iilyo yokoshigongi oshinene (Congress) shoSwapo. Amukwiyu ota ti oshitopolwa she sha Shikoto osho shotango okuninga omahogololo gatya ngawo naandjoka ya ningile mOlyomakaya pOnyaanya mpoka lyOpashitopolwa, olyo kwa li lya hugunina momahogololo ngoka, ge na okuningwa mOshitopolwa kehe moNamibia manga Oshigongi oshinene shoSwapo inashi thika mu Desemba. Iitopolwa iikwawo omulongoniiyali onkee yi na okulandula ko natango manga Desemba ina thika. Kehe mOshikandjohogololo mOshitopolwa kehe, otamu zi aantu ya tatu mboka taya yi kOshigongi oshinene shoSwapo, mwa kwatelwa nee Omukuluntu gwOswapo mOshitopolwa moka noshowo Omudhiginini gwIiniwe naAmushanga gwOmauyelele nOmahwahwameko nayalwe yahetatu ya gwedhwa po ye li pa shitopolwa. Amukwiyu ota ti mOshikoto omu na Oodistricta, ano Iikandjohogololo yi li omulongo nomwa tegelelwa nee mu ze aakalelipo ye li omilongo ne. Ye oku li nale oshilyo shiikalekelwa, ita yalulilwa mo. Ta ti nokIitopolwa yilwe osho shi li nawo pamutungilo gwoSwapo, unene nge tashi ya pakukalelwapo kOshigongi oshinene shoSwapo. Amukwiyu ta pandula sho aakwaSwapo yakwawo yomOshikoto ye mu inekela noku mu hogolulula natango nomake agehe. Ta ti, ngashi shito Swapo mOshikoto onkee taka tala kutya Ooprograma dhEpangelo lyoSwapo odha tulwa miilonga naanaa ngashi sha thanekwa. Amukwiyu ta ti otaka hwahwameka oshigwana shomOshitopolwa sha Shikoto shi longe nuudhiginini nokukandula po oluhepo mokati kasho.Oonzo dhimwe otadhi ti kutya ehogololo lyomOshitopolwa sha Shikoto oli li esindano kOmundohotola Hage Geingob, molwashoka aniwa omo mu na oyendji mboka taye mu yambidhidha mehogololo lye lyUupresidende wa Namibia mOshigongi oshinene shoSwapo mu Desemba nuumvo.
