Ehokololo lakula la li koZambezi oshivike sha dja ko okwa li li kombinga yeekamusela delelo doolopa laKatima Mulilo tadi yandje po edu di pewe eetuwa mbali da longa nale nokuli, ouquad bike vavali vape, ouquad bike vatatu va longa nale, okadrone neekompiuta mbali dopeke.
Ndee okomisi yokulwifa oimbula yaNamibia yedina Namibia Anti-Corruption Commission (ACC) otai lombwele oikundaneki kutya oya katukila omunambelewa wopolifi onghatu shaashi a vaka oimaliwa i fike poN$750 okudja moimaliwa yomahandukilo omeepate.
Otashi holola ngahelipi nghee okomisi yokulwifa oulingilingi yaPaulus Noa tai teka po nokutwikila okulipopila ngee tai pewa omaushima kutya alushe oya tana ashike ‘oinima ei ishona’?
Oibofa ei ivali oya nyana ashike nghee okomisi yokulwifa oimbuluma yaNamibia ya nghundipala.
Okomisi yokulwifa oulingilingi, oyo luhapu hai kala tai nyenyeta kutya kai na oshimaliwa sha wana, ohai longifa oshimaliwa shayo osho i na tai kendabala okuyeleka oimbula ya nafangwa, omanga oulingilingi wakula ngaashi ongeshefa yedu inai yela oyo ya ningwa ashike komesho yavo ve itala ashike va tya filu.
Minista mupe womayambulepo eedoolopa noitopolwa yokomikunda James Sankwasa okwa li a nyana etokolo lelelo doolopa loSwapo laKatima Mulilo lokuyandja po edu lepangelo leehecta 31 komunangeshefa akula Sindila Mwiya opo va pewe oyeendifo neekompiuta.
Omanyamukulo pefimbo leenghundafana kombinga yoshikumungu eshi okwa holola nghee osystema ya nghundipala, tai kwatelwa komesho kovaleli inava hala okwiitavela sha, novapopili vonghalo.
Oshiningwanima shokoKatima Mulilo oshimwe ashike shomoiningwanima ihapu. Namibia keshi nande mupe moulingilingi moshikondo shedu.
Omido dihapu, eekamusela daNamibia oda kala nokuungaunga nedu loshiwana da fa tadi ungaunga noinima yado vene, tadi lipe eenhele noku di yandja po kookaume kavo puhe na nande oilanduli ya sha.
Oshinima eshi otashi dulika shi kale sha fa shopambelewa momikanda, ashike elalakano limwe alike.
Pakulongifa omikalo dopaveta da danenwa ngaashi okulipa omauwa paumwene, osystema oya kala nokulongifwa papuko okuyandja omadu oo ehe na oovene.
Osystema oyo tuu ei oya amena eekamusela koilanduli yeengeshefa davo dapuka, tai va pitike va ninge oinima yavo puhe na omahandukilo.
Ohatu tu kumwe napresidente wongudu yoNational Democratic Party noshilyo shopaliamente Martin Lukato, oo a ti kutya oshinima eshi osha puka.
“Edu nali alulwe ndee eenghatu domondjila tadi kufwa shaashi eshi oshikumungu shakula. Ovambelewa ve na oulingilingi ova kala efimbo lile ihava pewa omahandukilo, tava vake kepangelo,” Osho a ti ngaho.
Lukato naye okwa li e li mondjila eshi a ti kutya edu eli tali popiwa la landifwa po kali shi ashike ‘lomoshitopolwahoololo’, shaashi oshitopolwahoololo shaZambezi oshi shiivike nawa.
Ashike natango, nande opu na elongifo papuko li li wetikile, ACC okwa hoolola okulandula oibofa ishona ngaashi oshibofa shoN$750 shokatekete komopate.
KOshakati, eekamusela oda kala nokuyambapeka omunangeshefa Erastus ‘Chicco’ Shapumba navakwao eedula dihapu noku va landifa eenhele koumaliwa vanafangwa. Nomatala odoolopa okwa li ashike a yandjwa po kuShapumba koshimaliwa inashi hanga nometata longushu yonhele oyo.
KOpuwo, Shapumba okwa mona okapale komaudano komiliyona oshinghwanyu nhatu ndee konima te ka landifa po keemiliyona N$5 ina ninga mo nande elunduluko la sha.
Paife epangelo otali kondjifa okutunga okapale kamwe kaye ponhele yakakwao.
Eshi tashi kumwifa osheshi: Kapu na eshi sha ningilwa ovanambelewa ile eekamusela odo da yandja po omaliko epangelo. KOshakati nokOpuwo kapu na eshi sha ningwa po.
Oshinima eshi otashi ulike kutya osystema yoomuni tava wilikwa koSwapo oi na epuko. Oshiwa unene eshi Sankwasa a eta oshinima eshi pouyelele, ndee ovanambelewa ovo tava vake ove na okutwikila ngee inava katukilwa onghatu ile kapu na omalunduluko a ningwa mo mosystema.
Fiyo okeluwa eli ACC keshi eyooloko pokati koumbudi wanafangwa noulingilingi wakula.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
