acc okwa li a ningila minista Hengari nomukulukadi waye omakonakono

Okomisi yokukondjifa oulingililingi moshilongo yedina Namibia Anti-Corruption Commission (ACC) okwa li ya ningila omukunhuwiliki mukulu wehangano loNamibia Wildlife Resorts (NWR) Zelna Hengari omakonakono kombinga yomalundilo kutya okwa yandja eetendela komushamane waye, minista Hengari.

Hengari oku li minista mupe wounamapya nounaimuna, eeshi, omeva nomatendululo omadu.

Oshinima eshi oshe ya koluheela pefimbo ovanhu tava pula omapulo ngee presidente Netumbo Nandi-Ndaitwah okwa ninga ngaa omakonakono eshi ta hoolola eeminista dOkabinete.

Hengari okwa taalela nale omafeekelo ekwatongonga, oo e likanyuna filufilu.

Oshivike sha dja ko eenghendabala dokupopya nomukulukadi waye oda dopa.

Omupedu kulunhuwiliki wokomisi yokukondjifa oimbuluma moshilongo Erna van der Merwe oshivike sha dja ko, nande ongaho, okwa koleka kutya okomisi yokukondjifa oimbuluma okwa li ya ningila Hengari nomukulukadi waye omakonakono, ashike okwa ti oshibofa okwa li sha xula momudo 2023.

“Epeko eli okwa li la pata momudo 2023. Okwa li ashike omakonakono ashike kakwa li nande pu na oshinima shapuka kotendela oyo ya pewa omushamane,” Osho a ti ngaho.

Ombinga imwe yomakonakono okwa li ya tala kuZelna vati a yandja eetendela komahangano oo haa yandje oilonga komahangano a kwatafana nomushamane waye.

“Kandi shi kutya omafeekelo oo okwa dja peni. Eudafano okwa li la shainwa kuZelna Hengari ponhele yehangano ledina Mariental-Heat Construction,” Osho a ti ngaho.

Van der Merwe okwa ti okomisi yokukondjifa oimbuluma oye lilongekida okupatululula omakonakono ngee opu na oumbangi wa wana woku shi ninga.

Okwa ti eudafano pokati koNWR noMariental-Heat Construction CC okwa li ongeshefa i li mumwe. “Okwa li ovo va longa oproyeka yoHardap yoNWR.”

Ehangano loMariental Construction okwa li lomunhu umwe ashike ‘Petrus’ Van der Merwe osho a ti ngaho.

Etitatu oThe Namibian okwa li ya lopota kutya Nandi-Ndaitwah okwa hoolola okukala ina kwatela mo ehangano lokuninga omakonakono nokwoongela ouyelele wa fimana ile opolifi yaNamibia manga ina ulika oilyo yaye yOkabinete.

Okwa li unene e likolelela komulandu waye mwene wokudinda, ndee paife ota pewa omaushima eshi a hoolola ovanapolitika va kilikita.

Shito, ehangano lokwoongela ouyelele wa fimana olo hali dindi eekadidate deemhito da fimana depangelo ngaashi ovakulunhuwiliki novapedu kulunhuwiliki.

Ashike nee, omulandu ou wa totwa okwa li kwa lopotwa kutya vati kakwa li wa landulwa eshi kwa hoololwa eeminista dOkabinete.

Hengari Etine okwa lombwela oThe Namibian kutya kakwa li nande a kwatelwa momakonakono okomisi yokukondjifa oulingilingi nande efiku limwe.

“Omukulukadi wange okwa kala ehe li mombelewa yepangelo. Otendela ilipipo a pa nge? Shimwe vali, kapwa li nande efiku lasha nda dengelwa kokomisi yokukondjifa oimbuluma ndi nyamukule kombinga yoshibofa shonhumba,” Osho a ti ngaho.

Minista okwa ti oikundaneki oi li ominge naye.

“Ondi shi shi kutya The Namibian okwa kala a lambalala Zelna manga kwa li e li mombelewa ndee paife oshinima osho tuu osho osha fa sha yuka kwaame,” Osho a ti ngaho.

The Namibian okwa uda kutya okomisi yokukondjifa oimbuluma okwa li ya ningila ovanambelewa vakula omapulaapulo moministili yomidingonoko nomatalelepo.

ONDJOKONONA YAKAKA

Zelna okwa li a tulwa pedu okudja moNWR momudo 2019 konima kwa li ta popilwa kutya ota longo papuko nosho yo omapopyo kutya oku na omakwatafano taa nyikwaanyikwa nomahangano opaumwene.

Okwa li a tameka okuwilika oNWR momudo 2014, ashike oilonga yaye okwa li ya eta omakwatafano ehe li nawa novakulunhuwiliki novanailonga vamwe.

Efimbo laye la piiyana ola eta eeminista di li nhatu di kufe ko oministili yomidingonoko nomatalelepo, oko NWR ha lopota.

Natango pefimbo opo tuu opo onguduwiliki okwa li ya lundululwa oikando itatu – aveshe ve na ashike oupyakadi naZelna.

Eshi a ninga omukulunhuwiliki yee omunashipundi wonguduwiliki Jackie Asheeke muDesemba 2012 ota fiye po ehangano, pefimbo opo yee naAsheeke okwa li nale ve lipuma mumwe pefimbo Zelna a li hamushanga wehangano.

MuDesemba 2023 Zelna okwa li a hala okufutifa NWR, minista womidingonoko nomatalelepo, minista womahangano epangelo (paife e li koshi yoministili yeliko nomawiliko eependjela) oshimaliwa shi fike peemiliyona N$7.5 shi na sha nokukake oukwatya waye.

Omutumbawiliki woNWR okwa li wa pitifa omukanda wokoikundaneki muApilili 2019 mokati komapopyo kutya Zelna okwa li a manifa eudafano lokuya mumwe pokati koNWR nehangano, Sun Karros Lifestyle Safaris puhe na ediminino lomutumbawiliki woNWR.

Omhupanguli Boas Usiku okwa ekelashi oshibofa shaZelna ndee ta pula opo a fute oimaliwa yovakalelipo vopaveta oyo ya longifwa konguduwiliki yaNWR.

Okwa mona kutya nande omapopyo ombinga imwe yomukanda wokoikundaneki oo tau nyenyetwa kuZelna otai kakeke edina laye, okwa li oshili nokwa li a yandjwa mouwa woshiwana.

Usiku okwa ti oumbangi oo kwa li u li po owa ulika kutya Zelna okwa manifa eudafanao pokati koSun Karros omanga omutumbawiliki uhe shi shi, puhe na ediminino lomutumbawiliki.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.