Aavenduka yena oondjo dhaMunidha konda poomiliyona N$800

Aakalimo yomoshilandopangelo okwa lopotwa yena oondjo dhaMuni dha konda poomiliyona N$800 dhiifuta mwa kwatelwa ngaashi yomeya, yiihohela, yoompale dhokongulu osho wo yolusheno mbyoka ya kala itaayi futwa momukokomoko gwomimvo dha piti.

Uuyelele mboka owa tseyithwa komupopiliko gwaMuni gwaVenduka, Lydia Amutenya moonkundathana nonzonkundaneki yaNampa pethimbo ta popi kombinga yiilonga yomondolopa, egandjo lyomayakulo osho wo iipambele yoshimaliwa.

“Oondjo kumwe dhaMuni dhi li maakalimo yaVenduka odhiifuta yomeya, olusheno, iihohela osho wo iifuta yoompale nodha konda poomiliyona N$800,”osho a popi ngaaka.

Nonande oondjo ndhoka odhi li pombanda noonkondo, Amutenya okwa popi kutya Muni gwondolopa yawo kena nande oondjo dhaagandji yomayakulo gawo ngaashi okuza koNamPower naNamWater.

“Iifuta yomayakulo ngoka ohayi futwa pethimbo,”osho a popi ngaaka.

Omupopiliko okwa popi kutya onkalo yoondjo inaadhi futwa kaakalimo, ohayi eta uudhigu wompumbwe yoshimaliwa tashi pumbiwa mokugandja omayakulo, naashoka ohashi eta ekateko lyokutula miilonga ooprojeka ndhoka dha thanekwa kelelo lyondolopa, nohashi shongolitha wo egandjo lyomayakulo ngoka ga thanekwa.

Amutenya okwa popi kutya elelo lyondolopa yawo olyi itula mo mokweeta po omilandu dhokushilipaleka kutya oondjo ndhoka dhi li maakalimo odha futwa, naashoka osha kwatela mo okuya moonkundathana naakalimo opo ya tule po elandulathano lyokufuta, okutulapo omilandu dhokungambeka oondjo osho wo okutula miilonga omilandu ndhoka dhi li pautho lyooveta dhaMuni.

“Oonkambadhala dhokugongela oshimaliwa shoka shi li maakalimo odhi li metifa nodhili oshitopolwa shomilandu dhekondololo lyoshimaliwa shaMuni,”osho a popi ngaaka.

Oondjo, ndhoka kwa li dhi li poobiliyona N$1,2 mo2023, mongashingeyi odha shuna pevi okupitila momulandu gwelelo lyondolopa gwokudhima po oondjo ngoka gwa pitike oondjo dhoomiliyona N$724 dhi dhimwe po momukokomoko gwomimvo mbali dha piti.

Amutenya okwa koleke kutya sigo oompaka oondjo dhili poomiliyona N$380 odha kuthwa ko nale nokudhimwa po kelelo.

“Omwaalu ngoka ogu li kombinga yoondjo dhaakulupe osho wo omagumbo gokomalukanda ngoka ga adha iipumbiwa, nedhimepo lyoongunga ndhoka olyi li oshitopolwa sholweetho lwotango ndoka kwa li lwa pewa eziminino opo oondjo dhawo dhi dhimwe po.

Omwaalu ngoka gwa hupa ko inaagu dhimwa po natango otashi ningwa momukokomoko twa taalela sho taku tsikilwa nokuningwa omakonakono [gokukoleka mboka ya ninga omaindilo], taku tsikilwa nomaishangitho osho wo uuna omaziminino okuza kokomitiye ga manithwa, unene tuu kombinga yolweetho olutiyali lwaamboka ya adha iipumbiwa yoondjo dhawo dhi dhimwe po,”osho a popi ngaaka.

Olweetho lwotango olwa tameke, sha landula sho muNovemba 2023, elelo lyondolopa yaVenduka okwa li lya gandja eziminino lyokudhima po oondjo dhoomiliyona N$524.

Edhimo po lyoondjo ndhoka olyaakulupe mboka kwa li ya shangithwa, nolya kwatela mo eshuno pevi lyiihohela noopelesenda 50, okuyapukila omayakulo goambulansa osho wo iifuta yomeya goopomba dhaayehe momalukanda goombashu.

Okuza mpoka, muNovemba 2025, okwa gandjwa epitikilo ekwawo lyokudhima po oondjo dhoomiliyona N$200, ndhoka tadhi tala kaakulupe, aakalimo mboka ye na omaulema, oothigwa ndhoka tadhi lele omagumbo, osho wo omahangano ngoka kaageshi gokuninga iiyemo, nomongashingeyi okwiipyakidhilwa nokuninga omakonakona gokukoleka mboka ya ninga omaindilo.

Amutenya okwa gwedhapo kutya oya tula miilonga omulandu gokungambeka egandjo lyomayakulo kwaamboka itaaya futu iifuta yawo pethimbo kumuni; ashike ina vula okugandja omwaalu kondandalunde, molwashoka okuteta ko omeya nolusheno osho wo oku ga shuna ko ohashi ningwa konyala esiku kehe.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.