AAKALIMO yomomukunda Othingo muuzilo wOshakati mUukwambi mOshitopolwa sha Shana oya geela noonkondo Muni gwa Shakati sho a tula etoto lyokweekela iiyagaya momukunda gwawo, taya ti sho ta fike iiyagaya metoto moka otamu zi olwithi lu li oshiponga oshinene kuundjolowele wawo naanona yawo, na ishewe sho taya fike iiyagaya metoto moka ohamu zi omulilo tagu fike po oongumbu, oondhalate noopala dhawo, omakowe gawo moka hamu napa iimuna yawo noshowo omagumbo nomapya gawo.
Omasiku sho ga li 13 Oktoba 2011, ano Etine lyoshiwike sha zi ko, omulilo ogwa zi metoto lya Muni moka nokuya mepya lya, Laina Erastus ndyoka li li pooha dhetoto ndyoka nokufika po ekowe lye kumwe nondhalate yolugumbo lwe noopaala dhomwaalu gwontumba. Erastus ta lombwele The Namibian kutya ye mwene naanegumbo lye oya adhika ye li megumbo noya londodhwa kumushiinda shawo, Alina Kambau. Sho ya zi mo meendelelo megumbo lyawo, oya adha omulilo gwa fika po nale oshipambu oshinene shekowe lyawo. Taya ithana aanambelewa ya Muni manga yi ikwatela ko yoyene nokudhima omulilo ngoka. Aaniilonga ya Muni gwa Shakati, taya kwatelwa komeho ku, Iiyambo Ananias, sho ya thiki mpoka nohauto yawo yokudhima omulilo, oya adha omulilo ngoka tagu kondjithwa ku, Laina, aanegumbo lye naashiinda noye ya kwathele oku gu dhima nakadhimamulilo gwawo. Laina okwa lombwele The Namibian kutya shika oshikando oshitihamano omulilo tagu zi metoto lya Muni moka tagu fike po epya nekowe lyawo ngawo. Ta ti oshikando shimwe oye gu galula megumbo. Tashi ti gwa li hanga gu fike po negumbo lyawo, ashike oye shi pondola oku gu dhima manga inagu kwata kiiti yegumbo, koondunda nosho tuu. Aakalimo mOthingo, otaya nyenyeta wo kutya aanambelewa ya Muni gwa Shakati hoka haya ka lopota kutya etoto ndyoka kali li nawa nenge taya lopota omulilo kuyo, kaye yi ihumbatela nawa aniwa. Taya ti kaye na omayamukulo gombili naaluhe ohaye ya yamukula nomagandambadhi nopamukalo gokwaasimaneka aantu nenge uuntu womuntu. Nande ongawo oya pandula ongundu yaa dhimi yomulilo, ndjoka aluhe hayi matuka noku ya kwathela okudhima omulilo ngoka. Aathingo ota ya ti kutya onkalonawa yawo oya yonwa ketoto ndyoka lya tulwa mokati kawo, tali uhala tali tulwa iiyagaya yoludhi kehe. Tayi uhala tayi fikwa nolwithi lwayo talu uhala talu fenwa kaakalimo yaamoka, mwa kwatelwa aanona noomeme ye li momategelelo. Aakalimo taya ti kutya oyendji yomuyo oya kwatwa komukolo itagu eluka we gwa zi molwithi lwetoto ndyoka. Taya ti ya li kupopya, Muni gwa Shakati ke na ko nasha. Ota tsikile ashike nokweekela nokufika po iiyagaya metoto lye ndyoka, gwo olwithi talu uka mokati kawo, koshigwana momukunda moka. Kuyele, gumwe gwomAadiakoni yOngeleka ya Katoolika ka Roma, naye ha zi momukunda moka, Eddy Iyambo, naye okwa kondema noonkondo etoto lya Muni momukunda gwawo moka. Ta ti olya yona noonkondo onkalonawa nonkalo yuundjolowele woshigwana momukunda gwawo moka. Tate Iyambo ta ti Elelo lya Shakati nali kuthe mo etoto lyalyo momukunda moka nenge li li kaleke pomukalo ngoka itali kala we oshiponga koshigwana, komudhingoloko nokomaliko goshigwana. ‘ Tse aluhe shampa ye tu ithana tu ye tu dhime omulilo nguka, ohatu endelele noku gu dhima, ngashi twe ya tu gu dhime ngeyi sho ye tu lopotele,’ tate Ananias ta lombwele The Namibian ngawo manga i ipyakidhila nokudhima iiyagaya yimwe tayi pi metoto moka mEtine lyoshiwike sha zi ko.
