Aapolisi yane ya mangwa po molwuulingilingi

OKAKOMISI kokukondjitha iimbuluma niilonga yokudhengela ondhi peho oka kwata po aanambelewa yane yomoshikondo shoonzo dhopantu metanga lyopolisi yaNamibia, mwa kwatelwa omukuluntuwiliki gwoshikondo shoka, komufala Abed Kashihakumwa.

Komufala Kashihakumwa okwa mangwa po mEtitatu lyoshiwike shika, manga yakwawo yatatu – omunambelewa omukuluntu Nikanor Ashipala Tweumona; omunambelewa omukuluntu Anna Maria Klaudia Angula, nosho wo omushaga gwopevi Sakaria Ashipala – ya mangelwe po mEtiyali lyoshiwike shika.

Aanambelewa ayehe mbaka oya taalela iipotha yokulongitha oonkondo dhiilonga yawo pambambo nomokwiilikolela oombumbo, okulongitha omikanda dhiifundja nosho wo okukutila miilonga pawulingilingi metanga lyopolisi suwala yaKashihakumwa.

Kashihakumwa okwa holokele kiihokolola mompangu yamangestrata moKatutura uunambo nokwa pewa uuthemba wokwiikulila mondjedhililo noshimaliwa, a pulwa a fute N$5 000.

Iihokolola moshipotha she oyu undulilwa komasiku 25 Aguste nuumvo.

Aafekelwa yakwawo ayehe yatatu nayo oya pewa wo uuthemba wokwiifutila mo noya manguluwa pambeila.

Tweumona ota tamanekelwa okulongitha pambambo oonkondo dhombelewa ye, okwiilikolela oombumbo nokulongitha omikanda dhiifundja, manga Angula ta tamanekelwa okulongitha pambambo oonkondo dhombelewa ye, oombumbo, okulongitha omikanda dhiifundja nosho wo okudhima momalungula gopmbelewa uuyelele wu na sha nomakutilomiilonga gaanambelewa yetanga lyopolisi.

Otaku hokololwa kutya Ashipala ota fekelwa kutya oku udhitha uuyelele wa puka mofooloma yiilonga.

Kofooloma hoka otaku hokololwa kutya Angula okwa tula ko onzapo yuupondoli miilonga yiifundja.

Sigo onena otaku hokolwa kutya Ashipala, suwala yaKashihakumwa oku li miilonga yetanga lyopolisi yaNamibia.

Pamushangwa ngoka gwa tuminwa iikundaneki kokakomisi kokukondjitha iimbuluma niilonga yuulingilingi moshilongo, ACC, mEtitatu lyoshiwike shika, oshikondo shomakonaakono niihokolola mokomisi ndjoka oka tamekele nokukonaakona iilonga yuulingilingi nedhengelo lyondhi peho moshikondo shoonzo dhopantu metanga lyopolisi mo2015 mbyoka ya kala tayi longwa kaanambelewa mbaka.

Aanambelewa yopolisi ayehe mboka ya mangwa po ohaya longele moombelewa oonene dhopolisi moshilandopangelo.

Otaku hokololwa kutya aanambelwa mbaka otaya ya konaakonwa sho ya shuna miilonga yetanga lyopolisi Ashipala nando okwa monikile ondjo moshipotha shuulunga mo2010.

Ashipala okwa tidhilwe mo miilonga yuupolisi momasiku 6 Kotoba 2010 sho a monika ondjo moshipotha shuulunga nokwiikuthila.

Okakomisi kokukeelela iimbuluma otaka hokolola kutya olopota yopolisi itayi holola nando kutya Ashipala okwa kuthilwe omanyala molwiilonga yuulingilingi.

“Ashipala otaku hokolwa kutya okwa tulile mo eindilo lyiilonga opo a kutilwe metanga lyopolisi nokwa tula keindilo lye onzapo yuupondoli nomaihumbato golela, ndjoka ya holola kutya ina monika nando ondjo miipotha yiimbuluma, onkene pehala mpoka pwa pulwa ngele okwa monikile ondjo miilonga yuulingilingi okwa thigha po ashike omwaka,” ACC ta ti.

Otaku hokololwa kutya Kashihakumwa, Tweumana naAngula oya lundulula omishangwa opo ya ningile Angula pondhopi, a wape okukutululwa metanga lyopolisi.

Otaku hokololwa kutya opwa li pwa longekidhwa ombaapila yepopilo yi na edhina lyasuwala yaKashihakumwa, opo yi tuminwe komukuluntu gwoshikondo shoonzo dhopantu, Kashihakumwa, noye mwene e yi shayina.

Otaku hokololwa kutya Kashihakumwa okwa kala e na uuyelele wa gwana kutya suwala ye okwa kala a monika ondjo miipotha yuulingilingi.

Otaku hokololwa wo kutya epopilo ndyoka lya shayinwa ku Kashihakumwa olya nuka po oondondo dhopokati nolya falwa ashike kuamushanga omukuluntu gwuuminiteli opo a koleke ekutilomiilonga lyaAngula.

Konima sho a konaakona nawa epeko lyomalopotelo gaanambelewa mbaka yatatu, omutamanekindjayi gwiipotha yepangelo, Martha Imalwa, okwa tokola opo aanambelwa mbaka ya patulilwe iipotha shi ikwatelela kuulingilingi mboka ya longa.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.