Aapolisi ya konda po4 600 ya yelwa

Ondjayi yEtanga lyOpolisi yaNamibia, Joseph Shikongo okwa popi kutya opolisi ngashingeyi oyi li pokwa adha elalakano lyokukala yi na uuthekepamwe wopaukwashikekookantu moonkatu dhelelo, sho a popi kutya mongashingeyi aakiintu ye li poopelesenda 40 oye li moonkatu dhelelo mopolisi.

Aapolisi ye li 4 682 oya yelwa okuza momasiku 1 Desemba pethimbo lyolweetho lwotango lwokuyela aaniilonga yopolisi.

Momaalwu ngoka, ye li 2 638 aalumentu omanga ye li 2 044 aakiintu, naashoka otashi ti oopelesenda 44 dhaakiintu oya yelwa okupewa oonkatu dhopombanda.

“Otuli poku shi adha, molwashoka ngashingeyi otu na ko owala oopelesenda 10 opo tu adha uuthikepambwe wo50/50 okwiiyutha ketokolo lyOkabinete mokuyela aaniilonga ayehe paukwashikekookantu.”

Ndhoka Shikongo okwe dhi popi pethimbo lyoshituthi shondhelela yokugandja oonkatu nokuyela aapolisi sha ningilwa mokamba yopolisi ya-Israel Patrick Iyambo Police College mOvenduka, mOmaandaha.

Aapolisi ye li 1 930 otaya ka yelwa okuza ponkatu yuukonstable okuya puushisande 2; aapolisi ye li 1 445 otaya ka yelwa okuza ponkatu yuushisande 2 okuya puushisande 1; ye li 600 otaya yelwa okuza puushisande 1 okuya puuwarrant 2; omanga ye li 707 oya pewa onkatu yuuwarrant 1 okuza puuwarrant 2.

Shikongo okwa gwedha po kutya omutungilo omupe gwopolisi ogwa pewa eptikilo nogwa shainwa kuminista gwiikwameni, omatembu, egameno nepopilo lyoshigwana momasiku 21 Auguste, naashoka oshe eta omadhina goonkatu dhimwe ga lundululwe, yamwe ya yelwe, okutula mumwe oonkatu dhimwe, okwe eta po oompe osho wo okulundulula iinakugwanithwa miimpungu yimwe.

Omutungilo ngoka omupe ogwe eta pu holoke oompito dhiilonga mopolisi ndhoka tashi pewa mboka taye dhi opalele mopolisi.
Aapolisi ohaya yelwa shi ikwatelela keitulemo lyawo osho wo okulonga nuudhiginini miilonga yawo.

“Aapolisi ayehe mboka ya yelwa okwa tegelelwa ya tsikile nokulonga neitulemo, okukala lela ye na omikalo, taya longo pambelewa okuhwepopeka egandjo lyomayakulo osho wo okulonga iilonga yawo pondondo yopombanda ngaashi taya vulu,” osho Shikongo a popi ngaaka.“Kapu na omupolisi e na okulombwela omukwashigwana ta pula ekwatho kutya kapu na iihauto yokuya kuyi ishewe opolisi nayi yamukule mbala taya longitha oonzo ndhoka dhi li po opo ya kwathele oshigwana, peha lyokugandja omaipopilo,” osho a popi ngaaka.

Ookomanda otaya indilwa ye ete po omilandu dhokukeelela iimbuluma nondunge ompe yokushilipaleka kutya otaya longo ngaashi sha tegelelwa mopolisi.

Omupolisi Henny Kapiya ngoka e na onkatu yuuwarrant 2 noha longele koshimpungu shopolisi yaanenentu, okwa waimine opolisi mo1997, nokwa holola enyanyu nolupandu sho a pewa onkatu ompe nokwi indile aaniilonga pamwe mboka inaaya yelwa ya kale ya ngungumana nokutsikila taya longo neitulemo.

Omupolisi gulwe, Ashipala Tangeni, ngoka a yelwa nokupewa onkatu yuushisande 1 okwa popi tati: “Onda nyanyukwa okutala kutya okulonga kwandje nuudhiginini okwe eta epandulo nondu uvite nawa okupewa onkatu ndjika”. Lwahugunina opolisi kwa li ya yele aaniilonga oyendji, omuDesemba 2020. Olweetho olutiyali lwokuyela aapolisi opo talu ka tseyithwa.