…Sankwasa a koleke Shoombe oye a ninge elenga enene lyoshitunda
Omananathano oga tukuka mezimo lyelenga enene lyUukolonkadhi, sho taku hokololwa aapambele yaali taya kondjele oshipundi shuuleli womuthigululwakalo gwoshitunda shoka.
Ekondjelo lyoshipundi shelenga enene lyUukolonkadhi olyi li pokati komusamane Johannes Asino, nahekulu, Malakia Shoombe, sha landula omwaka ngoka gwa thigwa po kelenga enene nakusa Daniel Shooya.
Oshiwike sha zi ko, minista goondolopa nehumokomeho lyokomikunda James Sankwasa okwa shangele omunashipundi gwelelo lyopamuthigululwakalo gUukolonkadhi, Andreas Amunyela, moka a tseyitha kutya okwa gandja epitikilo opo Shoombe a pewe pambelewa oshipundi shelelo lyUukolonkadhi.
Ngoka a li elenga enene lyoshitunda shoka, nakusa Shooya, okwa mana oondjenda muKotoba 2024, konima sho a lele uule womimvo 39.
Moonkundathana noThe Namibian, Asino okwa hokolola kutya mo2007 oya tsakanene mombala nakusa elenga enene nokuulike ohokwe muye opo e mu pingenepo koshipundi uuna a zi ko.
“Okwa lombwele ndje kutya ongame tandi mu landula koshipundi uuna a hulu ko.
Noshinima shoka onda kala nde shi mwenena ngaashi naanaa a lombwele ndje kutya inandi shi popya pomuntu,” osho Asino a popi ngaaka.
Okwa gwedhapo kutya muKotoba 2020, nakusa Shooya okwe mu dhimbulutha natango kutya oye temu landula uuna a hulu ko, naashoka okwe shi ningi molwashoka omimvo dhe odhaya.
Asino okwa hokolola kutya molwashoka pethimbo ndyoka okwa li miilonga, okwa lombwele nakusa opo oshipundi shuuleli shi gandjwe kuShoombe pakathimbo.
“Nakusa okwa pula ndje ngele Malakia (Shoombe) onde shi mu tseyithila nale (opo a ye koshipundi pakathimbo). Onde mu yamukula kutya inandi shi mu lombwela ashike otandi ke shi mu tseyithila,” osho Asino a popi ngaaka.
Okwa yelitha kutya Shoombe okwa kala oye amushanga gwelenga enene okuza mo1996.
Asino okwa popi kutya okuza poonkundathana nanakusa, okwa yi kuShoombe nokwe mu tseyithile edhiladhilo lya ningwa.
Onda shuna kunakusa elenga enene opamwe naShoombe opo tumu tseyithile kutya otwa tsa kumwe opo (Shoombe) a keelelepo poshipundi shuuleli.
“Nakusa elanga enene okwe shi yeleke atuhe tulipo kutya ongame u ulike ndi mu landule koshipundi,” osho Asino a hokolola ngaaka.
Okuza mpoka okwa shanga ombapila okutseyithila minista gwoondolopa nomapendulopo gokomikunda kutya Shoombe oye ngashingeyi pambelewa ta kwathele ponkatu yuuleli woshitunda shUukolonkadhi.
Asino okwa gwedhapo kutya nakusa Shooya okwa li wo a tseyithile pambapila ongeleka, ombelewa yakansela osho wo hahende, kutya oku ulika Asino ongomuleli gwoshitunda ta landula ko uuna a hulu ko.
“Konima yeso lyaShooya, omuselekadhi okwa pendje embo moka wo (nakusa) a popya kutya ongame tandi pewa oshipundi,” osho Asino a popi ngaaka.
Poshigongi sha ningwa manga nakusa Shooya inaa fumvikwa, Asino okwa hokolola kutya Amunyela naye okwa popi nokukoleka kutya nakusa Shooya oku ulike Asino oye e mu landule kuuleli.
Asino okwa hokolola kutya muDesemba 2024, Shoombe okwa ningi oshigongi shaakwanezimo moka ya kundathana kombinga yoondjembo dha nakusa Shooya osho wo wo ngoka ta pewa uuleli woshitunda shUukolonkadhi.
Konima yoshigongi shoka Shoombe otaku hokololwa a lombwele Asino kutya omwa tokolwa kutya (Shoombe) oye ta ningi elenga enene molwashoka Asino onkatu ndjoka ineyi hala.
Oshigongi oshikwawo osha ningwa muJanuali omumvo gwa zi ko, moka mu ulikwa okakomitiye opo ku ulike Shoombe ongelenga enene tali landula koshipundi shelelo lyawo lyopamuthigululwakalo.
Asino okwa popi kutya ina tsa kumwe naandhoka molwashoka ominute dhiikundathanwa moshigongi shoka itadhi tsu kumwe nande netokolo ndyoka lyaShoombe oye a ninge elenga enene.
Okwa gwedhapo kutya Shoombe okwa li i indile opo a pewe oshipundi shoka shuuleli shi kale hashi taambathanwa konima yuule womimvo ntano.
“Onda tindi edhiladhilo ndyoka.
Onkatu yuuleli kayi shi ompito yiilonga. Ihe shoka oshinakugwanithwa hashi gandjwa okuza kunakusa elenga enene osho wo kaakwampungu yetu,” osho Asino a popi ngaaka.
Okwa gwedhapo kutya momasiku 14 Febuluali 2025, pethimbo lyoshigongi nelenga lyopombanda lyopamuthigululwakalo, Shoombe oye kwa li a kwathele komeho oshigongi shoka nonande omunashipundi gwelelo opo a li.
“Mpoka opo nee nda mono kutya opuna sha sha puka,” osho Asino a popi ngaaka.
Sho a kwatathanwa naye, Shoombe okwa popi kutya itati ko sha molwashoka elelo lyopamuthigululwakalo olina omupopiliko.
Momukanda Sankwasa okwa shanga kutya elelo lyopamuthigululwakalo gUukolonkadhi olya tegelelwa li gandje esiku, otundi nehala kombinga yelangeko pambelewa lyelenga enene.
“Konima yelangeko, minista opo ne ta manitha omulandu gwetaambeko lyuuleli pakatendo 6 kOveta yOmalelo goPamithigululwakalo,” osho Sankwasa a popi ngaaka.
Ashike, mombapila ndjoka ya shangelwa Sankwasa okuza kaakwanezimo yaali, Rebekka Amunyela naJonas Kambonde muKotoba omumvo gwa zi ko, oya yelitha kutya ngoka e li mondjila yokupewa oshipundi oAsino.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
