Aanona onkene taya tsikile nokusa omeya mOmusati

NONANDE opolisi omasiku ga zi ko oya gandja elondodho moshigwana opo shi kale sha lungama omolwomeya ngoka ge li moshitopolwa shaMusati, sha landula sho kwa li kwa lopotwa aanona ya si omeya, onkene omaso gaanona taga tsikile.

Shoka osha landula sho kakadhona gwomimvo 11 a hulitha sho a gwile mondama onene tayi ithanwa Etaka, sha ningwa mOsoondaha sho taku hokololwa kutya nakusa okwa li ta yogo omeya nayakwawo.

Omukwatakanithi gwomakonakono giimbuluma moshitopolwa shaMusati, Moses Simaho, okwa popi kutya nakusa okwa hololwa kutya oye Fransina Mukondeli gwomomukunda Omindamba moshikandjohogololo shaNesi.

Aapambele ye oya tseyithilwa nale onkundana yoluhodhi nomakononakono gopolisi otaga pula komeho.

Onkundana ndjoka oya landula owala yaanona yaali mboka ya hulitha petameko lyomwedhi nguka sho ya si omeya momukunda Onamanape momudhingoloko gwaKalongo moshitopolwa shaMusati.

Oshiningwanima shoka osha ningwa momasiku 7 Desemba.

Komanda gwopolisi yoshitopolwa shaMusati, Ismael Basson, okwa koleke oshiningwanima shoka sho a popi kutya aanona mboka okwa li ya thigwa ku yinakulu megumbo oyo awike komatango sho a yi kuundingosho lwopotundi 18h00.

Konima yowili netata sho omukulupe a galukile megumbo okwa adha aanona kaaye mo, nokwa kwatwa komalimbililo shoka she eta ya tameke nolukongo lwaatekulu ye.

Olukongo ndoka olwe eta aanona mboka yi itsuwike ya hulithila metale lyomeya, ongula yesiku lya landula.

Oonkusa oya hololwa kutya oyo Maria Andreas (2) naMagano Andreas (5).

Pokati mpoka, opolisi onkene yi ipyakidhila nolukongo lwaanona yaali mboka ya kanene mefuta mEtitano moHenties Bay sho taku hokololwa kwa li ya yi kefuta pwaana etonatelo lyaakuluntu.

Aanona mboka otaku hokololwa kutya ookuume nohaya zi mondolopa ndjoka, ashike onkundana ya piti ohela oya popi kutya gumwe gwomaanona mboka okwa kungululwa mo mefuta nokwi itsuwika koontuni.

Ongundu yaayogi ya kwatelamo yopolisi osho wo aakwashigwana oya ningi omasiku ye li molukongo okuza mEtitano.

Omupopiliko gwopolisi yoshitopolwa shErongo, inspekta Ileni Shapumba okwa koleke oshiningwanima shoka nokwa popi kutya opolisi onkene yi li metifa lyolukongo.

Otaku hokololwa kutya Hilia Rashmie naMary-Anne Mimie Mbok okwa li ya zi momagumbo gaandjawo pethimbo lyomwiha opamwe nookuume kawo yalwe opo ya ye kefuta.

“Otaku hokololwa kutya oya faalelwa kekuthikuthi enene omanga ya li momeya nooyakwawo. Aanona yalwe oye shi pondola okuza mo momeya, mboka yaali oya nyengwa okuza mo noya faalelwa,” osho a popu ngaaka.

Shapumba okwi indile aakuluntu naatonateli yaanona ya kale aluhe ya kotoka nokulodha aanona yawo kaayaye kefuta oyo ayeke.

Monkundana yilwe, kamatyona gwomimvo 14 okwa patululilwa oshipotha shedhipago sho a kutha omwenyo okanona koomvula mbali, sha ningilwa moshitopolwa shaHangwena.

Pauyelele wa gandjwa kuInspekta Raimbert Muronga, oshiningwanima shoka osha ningwa mOsoondaha, komatango momukunda Ombudia, moshikandjohogololo shaKongo.

“Otaku hokololwa kutya nakusa okwa li a thigwa kuyinakulu megumbo nomufekelwa, sho a yi puushiinda.

Okuza mpoka otaku hokololwa omufekelwa a tameke okudhenga nakusa noshiti naashoka oshe eta a hulithile mpoka. Nakusa okwa hololwa kutya oye Vilho Shishiveni,” osho a popi ngaaka.

Okwa gwedhapo kutya, omufekelwa ngoka gwomimvo 14, ita vulu okutulwa mondholongo molwashoka omushona nonkene okuli momake gaavali omanga wo omakonakono gopolisi otaga pula komeho.

Nakusa opamwe nomufekelwa okwa li haya zi megumbo limwe.

Pokati mpoka, omulumentu gwomimvo 39 okwa tulwa miipandeko mOlyomakaya sho a pumu omuntu molukanda lwUupindi mOshakati.
Omufekelwa okwa taalela oshipotha shokuhinga nuuhasha.

Pauyelele womunambelewa gwiipambele yOshigwana, Inspekta Frieda Shikole, omufekelwa okwa li ta hingi otuukala yoToyota, sho kwa li ta zi komukunda u uka kOshakati, nokwa pumu omweendi gwokoompadhi.

“Nakupumwa anuwa okwa matukile mopate ombadhilila,” osho a popi ngaaka.

Okwa gwedhapo kutya nakuninga oshihakanwa okuli monkalo ombwinayi, nokwa teka ngaashi komaako nokomagulu. Omufekelwa okwa tulwa nale miipandeko.