Aanegumbo 11 ya pewa egumbo mOmbaye

Aakalimo yomombaye ye li 11 mboka haya zi megumbo limwe oya li menyanyu enene mEtiyali sho ya tembudhilwa kegumbo epe mekwatelo komeho lyakansela gwaMbaye kUushayi, Donatus Tegako.

Aanegumbo 11, mwa kwatelwa Johny Amutenya (18) ngoka omunuulema noha kala mokatemba, oya kala haya zi mombashu nomootenda mbali sha landula sho okwa li ya tithwa megumbo moka kwa li haya thitha, oomwedhi 19 dha piti.

Kansela Tegako mEtiyali okwa popi kutya okwa li neikwato pomutima lyaanegumbo mboka molwashoka okwa kala ombepo onene komukulofuta muule womasiku ga zi ko.

Okwa popi kutya shoka okwa li she mu thiminike opo a ka popye namayola gwondolopa, Trevino Forbes a pitike opo ya tembudhile aanegumbo mboka megumbo lyokolela mbala ngaashi tashi vulika.

Megumbo moka ya tulwa otaku hokololwa lya adhika nale lya dhiladhililwa okupewa ofamili ndjoka, nolya tulwa kedhina lyaJohny.

“Okwa li nda popi na mwene gwegumbo moka aanegumbo mbaka kwa li haya zi opo e ya gululile mo, ashike okwa tindi. Onda pula elelo lyondolopa yaMbaye, nokwa li wo nda kwatathana noshimpungu shiipambele yaanuulema mombelewa yomupresitente. Otu na omagumbo ngoka kwa li ga tungwa po kohi yopolohalama yokutunga omagumbo ogendji ashike onkene omagumbo ngoka kaage na aantu. Okwa li twa tokola opo tu kuthe po egumbo limwe tu li gandje kuyo omolwuulema wokanona. Shoka otandi shi pandulile elelo lyondolopa,” osho a popi ngaaka.

Okwa popi kutya omolwombepo ondhigu ndjoka ya kala komukulofuta omasiku ga zi ko, okwa tokola a popye namayola opo ye endeleleke okutula aanegumbo mboka megumbo ndyoka, molwashoka oye li muudhigu wombepo ndjoka tayi hanagula.

“Ombepo ndjoka okwa li tayi hanagula omapunga gaJohny. Okwa li oshiwanawa okumona iipala yawo sho nda thiki puyo noku ya lombwela onkundana ombwanawa,” osho Tegako a hokolola ngaaka.

Omusamene John Amutenya (53) okwa yelitha enyanyu ndyoka lye ya adha esiku ya lombwelwa kombinga yonkundana ndjoka.

“Ondi li menyanyu nonda pandula noonkondo. Kalunga oko e li. Onde shi mona. Okwa li oshidhigu okukala ngaashi twa li. Okwa li nda kambadhala uule woomvula opo ndi mone hala lyolukalwa naanegumbo yandje. Onda manguluka sho kansela e ya ethimbo lyongula, molwashoka ongulohi ya piti otwa li muudhigu. Olukalwa lwetu olwa kala talu teka po omolwombepo onene, nondu uhala uusiku awuhe tandi tondoka okutula kumwe ayihe opo kaatu gwilwe. Omukulukadhi gwandje sho a zi kiilonga ethimbo lyongula kali ta vulu okudhimbulula ndje molwashoka okwa li nda tsima. Otandi pandula aasamaria aanamutimahenda yomomudhingolo mboka ya kala haye tu kwathele uundjugo, osho wo omeya niikulya,” osho a popi ngaaka.

Tegako okwa popi kutya elelo lyoshitopolwa osho wo lyondolopa otaya longele pamwe nokukundathana opo ku taliwe nkene ye na okufuta egumbo ndyoka tali pula ooN$452 000.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.