Aanawino miipambele yiiyenditho oya gandja uusama wetokolo lya ningwa okutula omayinda gokushunitha pevi ondapo yiihauto moopate oonene dhomOvenduka, noya londodha kutya omainda ngoka otashi vulika ge keete iiponga oyindji osho wo omangundumano giihauto peha lyokuhwepopeka onkalo yegameno moopate.
Ehangano lyokutonatela oopate moshilongo lyedhina Roads Authority, melongelokumwe nUuministili wIilonga nIiyenditho okwa li ya tsu kumwe okutula omayinda gokushunitha pevi ondapo yiihauto mopate onene yooshambali ndjoka ya tseyika nawa nedhina B1 Western Bypass.
Opate ndjoka yoB1 Western Bypass oya andjuka nohayi longithwa wo kiihauto mbyoka tayi ya moshilandopangelo nenge tayi zi mo.
Omayinda taga nyenyetwa otaga adhika pokati komudhingoloko gwoshipangelo shaKatutura noLafrenz moWestern Bypass, mopate yoA1 pokati kaProsperita nohotela yoWindhoek Country Club Resort, pauyelele wolopota ndjoka ya pitithwa momasiku 4 Juni.
Ashike nando ongaaka, aanawino miipambele yoopate oya popi kutya otashi kala nawa ngele uuministili owa tungitha po oontopa peha lyomayinda.
Oshilyo shongundu yo-Independent Patriots for Change megumbo lyopashigwana Nelson Kalangula okwiindile opo pu tungwe oontopa dhaayendi yokoompadhi, nokwa popi kutya okutula omayinda moopate oonene otashi eta engundumano lyiihauto oyindji mopate.
Okwa popi kutya onkalo ndjoka otayi vulu okweetitha iiponga yomoopate molwashoka omayinda ngoka ga tulwa po ihaga monikila kokule.
“Opate onene ohayi eta emanguluko lyomalweendo, okweendelela kwiihauto osho wo okushunitha pevi omangundumano.
Okutula po omayinda gokushunitha pevi ondapo koopate oonene otashi yi moshipala elalakano lyoopate oonene,” osho a popi ngaaka.
Okwa popi kutya opuna omikalo dhilwe omihwepo dhokushunitha pevi iiponga yiihauto moopate.
“Gumwe gwomomikalo ndhoka, okutunga po ontopa yaayendi yokoompadhi,” osho a popi ngaaka.
Moonkundathana noradio yoDesert FM, minista gwiiyenditho Veikko Nekundi okwa popi kutya etokolo lyokutula omayinda mopate olyopakathimbo, nomathaneko opo ge li nale opo ku ka tungwe oontopa dhaayendi yokoompadhi monakuyiwa.
Minista okwa popi kutya uuna pwa monika oshimaliwa, otaku ka tungwa oontopa pomahala ga tothwa mo nale.
Ontopa yimwe otayi ka tungwa pokati koWindhoek Country Club noProsperita, onkwawo opopepi noshipangelo shaKatutura, yimwe okuza moShandumbala ya thinda koChina Town, nonkwawo otayi ka kala pokati kopate yaEneas Peter Nanyemba osho wo oNatis.
“Mongashingeyi omayinda gokushunitha pevi ondapo otaga ningwa opo ku hupithwe oomwenyo dhaantu yetu,” osho a popi ngaaka.
Nekundi okwa popi kutya etokolo lyokutulapo omayinda olya ningwa sho kwa taliwa komwaalu gu li pombanda gwaantu taya pumwa kiihauto mopate ndjoka.
Okwa popi kutya aaniihauto olundji ohaya hingi uukodhi tawu ka lala pethimbo lyongula nenge pomazimbukilo, itaaya dhiladhila oomwenyo dhaayendi yokoompadhi mboka taya taaguluka opate.
Okwa popi kutya numvo okwa lopotwa iiponga oyindji yaantu ya lyatwa kiihauto.
“Ongepangelo, otuna oshinakugwanithwa okushilipaleka kutya oomwenyo dhaakwashigwana odha gamenwa.
Etokolo ndyoka lyokutulapo omayinda okushilipaleka kutya otwa kondolola ondapo yaahingi opo ku hupithwe oomwenyo,” osho a popi ngaaka.
Okuza nkene omayinda ngoka ga tulwa mopate ndjoka onene, iihauto oya monika nkene ya tsa omutete noyangundumana mopate, shoka sha geyitha oyendji unene tuu aaniihauto.
Ashike nando ongaaka, Nekundi okwa popi kutya omayinda ngoka ihaga thikameke iihauto thilu, ashike ohaga shunitha owala ondapo pevi opo shi gandje ompito kaayendi yokoompadhi ya vule okutaaguluka opate.
“Kapuna nande etompelo lyaaniihauto ya kale ya geya. Shoka twa pumbwa okungungumana nokupandula oonkambadhala tadhi ningwa.
Aahingi oyendji Aanamibia kaye na olukeno nooyakwawo osho wo naayendi yokoompadhi,” osho a popi ngaaka.
“Tse oshilongo shina aakuthimbinga ya yooloka, nonkene kehe uuthemba womuntu owa pumbwa okusimanekwa ethimbo kehe,” osho a popi ngaaka.
Nekundi okwa popi kutya omandhindhiliko gomoopate otaga ka dhikwa po okuwilika iihauto, naashoka otashi ka kala sha manwa pehulilo lyoshiwike shika.
Okwiindile aaniihauto ya hinge nawa nokushunitha pevi ondapo, omanga aayendi yokoompadhi taya tegwa ya taaguluke uuna inaashi nika oshiponga.
Amushangandjayi gwehangano lyootaxi noombesa lyedhina Namibia Bus and Taxi Association, Penda Nakathingo okwa popi kutya okuwete pwa pumbwa tango okuningwa omakonakono gomuule kutaliwe lela kutya oshike tashi etitha iiponga.
Okwa popi kutya okutulapo omayinda gokushunitha pevi ondapo moopate oonene hasho tashi kala ekandulopo lyomukundu.
