Minista gwiipambele yopaigwana Netumbo Nandi-Ndaitwah okwa popi kutya Aanamibia mboka ye li moSudan oye shiwike mpoka ya gama nokwa kolekwa kutya oye li megameno, nonkene okwa gwedha po kutya otaya ka tembudhwa mo moshilongo shoka opo ku shilipalekwe kutya egameno lyawo olya kalekwa po pethimbo ndika mu na omakuyunguto giita.
Moshilandopangelo shaSudan, Khartoum, omasiku ga zi ko omwa tukuka iita pokati ketanga lyegameno lyoshilongo nongunduyambidhidhi yopakwiita ndjoka yi li moshilongo shoka.
Otaku hokololwa kutya sigo oompaka aantu ya konda 412 oya kanithila oomwenyo miiponokela yolugodhi ndoka, naakwashigwana omathele otaya fadhukapo oku ka konga egameno.
“Okuza esiku olugodhi lwa tukuka, otwa kala tuli mekwatathano nombelewakalelipo yetu moAddis Ababa, ndjoka ya kala tayi tu tseyithile kutya moSudan omu na Aanamibia yatatu, noyeli megameno.
“Otu na ekwatathano lyopadiplomate naSudan, notu na ngoka hetu kalele po koSudan, ashike moSudan katu na mo ombelewakalelipo ya kalelwa po komuNamibia. Omukalelipo gwetu ngoka e li moAddis Ababa oye ha kwatakanitha omauyelele pokati kaNamibia naSudan,” osho Nandi-Ndaitwah a popi ngaaka.
Minista okwa popi kutya uuministili womakwatathano gopaigwana otawu longele kumwe nongongahangano yuuyuni yoUnited Nations, okuwaimina okangundu kokutembudha mo aantu moshilongo shoka.
“Aanamibia mboka ye li moSudan opo taya ka tembudhilwa pehala lya gamenwa, ashike otwa kala tatu tonatele onkalo sho ya kala taya tumbudhwa po pomahala ngoka ga nika oshiponga noonkondo nokufalwa mpoka pu li hwepo. Ashike sigo oompaka okushiwike kutya Aanamibia mboka ye li ko oye li megameno,”osho a popi ngaaka.
Nandi-Ndaitwah okwa popi kutya ongenenevi, oye na eitaalo kutya onkalo yaSudan otayi vulu okupotokononwa ashike mongashingeyi aantu oyendji unene mboka taya kanithile mo oomwenyo, omanga yamwe oya thiminikwa konkalo opo ya fadhukepo okuza mo moshilongo shoka.
“Shoka tashi ningwa otashi uvitha nayi noonkondo, ashike itatu sholola okwe ethela ngaaka enenevi lyetu,” osho a popi ngaaka.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
