Aanambelewa yomatembu ya londodhwa kaaya ihumbatele nayi aatalelipo

MINISTA gwiikwameni, omatembu, egameno nepopilo lyoshigwana Albert Kawana okwa gandja elondodho kutya otashi vulika a lundulule oveta opo a vule okutidha mbala miilonga aanambelewa yomatembu mboka haya longele poongamba nokwa konekiwa taya ihumbatele nayi aapashiyoni mboka taye ya moshilongo.

Ndhoka okwe dhi popi pethimbo lyetamekitho pambelewa lyopolohalama ndjoka yokugandja oovisa kaapashiyoni pethimbo taya thiki poongamba, moKatima Mulilo.

Opolohalama ndjoka oya tulwa miilonga pomahala gatatu gopoongamba moshitopolwa shaZambezi.

Aapashiyoni okuza miilongo 27 yomenenevi lyaAfrica osho wo iilongo 29 yopondje ya Africa otaya vulu ngashingeyi okuninga omaindilo gokupewa ovisa uuna ya thiki poongamba dhaKatima Mulilo, poongamba dhaNgoma osho wo dhaImpalila. Kawana okwa popi kutya nonande aaniilonga yomatembu mboka haya longo poongamba oya pewa omadheulo ogendji ga nkene ye na okwiihumbatela ookastoma, onkene opolisi hayi lopotelwa kutya ohaya ihumbatele nayi aatelelipo.

Okwa popi kutya aaniilonga yomatembu poongamba ohaya pewa omaudheulo gokugandja omayakulo ge li nawa hashi ningilwa mOmaruru nomathimbo gamwe ohaya longwa pethimbo ye li miilonga poongamba mpoka haya longele.

“Inatu hala we nande oku uva omahokololo kombinga yaatalelipo taya ningwa nayi kune. Ondiwete kutya ethimbo olya fa lya thika okukonga ongola yi li popepi opo yi tidhe mo omayapula ngoka ge li mo go ola.

Kutya nee otashi pula ndi shi fale komutumba gwopashigwana opo ndi lundulule oveta yi gandje oonkondo komukuluntuwiliki opo a tidhe mo aaniilonga mboka mbala. Ongomuniilonga gwepangelo owa pumbwa okukala wushi kutya aatelelipo ohaya dhana onkandangala momahupilo goshilongo shetu, naashoka ohashi eta opo epangelo li vule okukuta aantu. Oshikondo shomapashiyono ohashi kwathele wo opo oondjambi dhaaniilonga dhi gwedhelwe, ashike mpaka ongaaniilonga yomatembu poongamba omuli po ishewe mwa hala okuya moshipala ehumokomeho lyeliko lyoshilongo. Mboka taya ka monika ondjo otaya ka katukilwa onkatu pwaana uumbanda nenge egamombinga,” osho a londodha ngaaka.

Okwi indile wo iikondo yilwe mbyoka hayi longo poongamba ngaashi aapolisi, aaniilonga yopoongamba osho wo yalwe, yi ihumbatele nawa aatelelipo osho wo aayenda yalwe taye shi ningi pambelewa, paushili nopambili omanga wo taya shilipaleke kutya oya longa iilonga yawo nawa okukalekapo egameno lyoshilongo.

Ngoloneya gwoshitopolwa shaZambezi, Lawrence Sampofu okwa popile Kawana sho a gwedhapo kutya oongamba odha talika ko ongoshipala shoshilongo, nonkene ohadhi gandja oshipala shaashoka aapashiyoni ya tegelela uuna ya pitikilwa moshilongo.

“Ngele oya taambiwa ko nawa, otaya ka popya kutya Aanamibia aantu yehole aantu. Onkene, otatu indile aaniilonga ayehe yopoongamba ya longe iilonga yawo neimemeho kiipala,” osho a popi ngaaka.