Aanambelewa yatatu ye li mondambo yuuleli wopolisi yoshilandopangelo

Aanambelewa yatatu yomopolisi yoshilandopangelo otaku hokololwa oyo ye li mondambo okukutha po oshipundi shuukuluntuwiliki wopolisi yoshilandopangelo okulandula Abraham Kanime, ngoka tayi moshipundi shevululuko pehulilo lyomwedhi nguka.

Kanime okwa kala oye omukuluntu gwopolisi yoshilandopangelo okuza mo2001 sho oshimpungu shopolisi yaVenduka sha totwa po.

Mboka taku fofodholwa oyo taya taliwa opo mu kuthwe gumwe ngoka ta ka landula Kanime, ongaashi Leevi Ileka, ngoka oye omupeha gwaKanime, Adam Eiseb ngoka oye omukuluntu gwoshimpungu shopolisi yomoopate, osho wo omukuluntu gwiipambele yopaveta mopolisi yaVenduka, Eliaser Iiyambo.

Ashike nando ongaaka, onzonkundaneki ndjoka yi na uuyelele kombinga yonkatu ndjoka yuukuluntu wopolisi yoshilandopangelo oya popi kutya opu na natango ookomanda yamwe yomopolisi yaNamibia mboka tashi vulika taya ka nukila mondambo okukondjitha oshipundi shoka shuuleli wopolisi yaVenduka.

Kanime otaku hokololwa e na ondjambi yoomiliyona N$2,2 komvula, naashoka otashi ulike kutya oha kwata komwedhi N$184 000.
Kanime okwa tindi okutya ko sha, sho a pulwa konzonkundaneki ndjika, mOmaandaha.

Ashike nando ongaaka, aapopepi naKanime oya lombwele oThe Namibian kutya oti ihulu miilonga momasiku 28 Apilili.

Omupopiliko gwoshilandopangelo Harold Akwenye okwa lombwele oThe Namibian kutya “elelo lyondolopa yetu olya thaneka okuninga omalongekidho mbala ngaashi tashi vulika nelalakano lyoku ulika omuntu pomwaka ngoka tagu thigwa po kuKanime ngoka tayi moshipundi shevululuko,” osho Akwenye a popi ngaaka.

Pamilandu dhomayakulo gopolisi yoshilandipangelo, elelo lyondolopa yaVenduka olyo hali ulike “omuntu ngoka to opalele” oye a ninge omukuluntu gwopolisi yoshilandopangelo.

Ileka, ngoka ta fofodholwa kutya okuli gumwe gomwaamboka taku taliwa a pewe oshipundi tashi thigwa po kuKanime, uunambo okwa lombwele onzonkundaneki ndjika kutya itati ko sha kombinga ya ngele oku na ohohwe yoshipundi shoka nenge hasho.

“Inandi hala okutya ko sha kwaashoka,” osho a popi ngaaka.

Iiyambo okwa koleke kutya oku na ohokwe yokupewa oshipundi shuukuluntu wopolisi, omanga Eiseb okwa lombwele oThe Namibian kutya ke na owino ya sha ngele Kanime ota thigi po ombelewa omasiku ngaka.

“Shoka tu pula ndje ngame kandishi shi. Ngiika pamwe ombelewa yaakuluntuwiliki, ndjoka oyo yi na oshinakugwanithwa shoku ulika [aantu poonkatu] oyo yi shi uuyelele mboka,” osho Eiseb a popi ngaaka.

Sho Kanime a adha omimvo dhoshipundi shevululuko mo2020, Eiseb oye a li a hogololwa a pingene po Kanime.

Etokolo ndyoka okwa li lya popiwa kokomitiye yokugandja omayele kombinga yegameno moshilandopangelo, ndjoka kwa li ya pewa oshinakugwanithwa opo yi hogolole ngoka to opalele okuningwa omukuluntu gwopolisi.

Eiseb sho kwa li a hogololwa oye a ninge omukuluntu gwopolisi yaVenduka, okwa li a pewa Ileka naElias Mutota ongaapevi ye.
Mutota ngashingeyi oye omupevindjayi gwopolisi yaNamibia.

Ashike nando ongaaka, Eiseb ina ka pewa we onkatu ndjoka yuuleli molwashoka elelo lyondolopa yaVenduka okwa li lya ulikulula Kanime oye a tsikile nuuleli wopolisi muule woomvula ndatu, naIleka okwa li a pewa oshipundi shuupevi waKanime.

Eulikululo lyaKanime okwa li lya nyanwa koyendji mboka ya popi kutya kalya li paveta nopampango.

Okomitiye ndjoka yokugandja omayele kombinga yegameno oya thikama po maakuluntu yiikondo yegameno nepopilo lyoshigwana moshilongo ngaashi omukuluntu gwopolisi yaNamibia, omukuluntu gwopolisi yoondholongo dhomazulonkalo, omukuluntu gwopolisi yetanga lyegameno osho wo omukuluntu gwopolisi yomonanguwi.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.