Aanamapya ya lulilwa kokapuka moZambezi

Aanamapya moshitopolwa shaZambezi oya yemata komapya gawo ngoka ga ponokelwa koshipahu osho wo okapuka nongashingeyi oyena eikwato pomutima kombinga yeteyo ndyoka okwa li ya tegamena li kale lya kola numvo omolwomuloka tagu etitha oonkondo.

Okuza pehulilo lyomumvo gwa zi ko sho shiyenga sha nangombe a tameke oku ga dhenga pevi konyala esiku kehe, aakalimo yomoshitopolwa shoka oya tameke okukuna momapya gawo ngaashi epungu, omahangu osho wo iilyalyaaka.

Omupopiliko gUuministili wUunamapya nUuniimuna, Omeya,Oohi nEtendululo lyEvi, Simon Nghipandulwa okwa koleke etukuko lyoshipahu osho wo okapuka moshitopolwa shoka pethimbo lyoonkundathana noThe Namibian, oshiwike shika.

Okwa popi kutya uuministili owa kala tawu kondjitha iipuka mbyoka okuza muSeptemba omumvo gwa zi ko.

Okwa yelitha kutya omolwomuloka omunene moshitopolwa, iipuka mbyoka vala noonkondo nokutana osho wo okwiihanena omidhingoloko.

Endumbalo lyiipuka mbyoka momudhingoloko gwaLiambezi otali yi pombanda, nomahala giikunomwa osho wo uulithilo oge li moshiponga noonkondo.

Okugwedha kwaashoka, omidhingoloko ngaashi Itomba, Kabbe, Ngoma, Bukalo, Katima Mulilo, Masokotwani, Chinchimani, Linyanti osho wo Sangwali nadho odha gumwa.

“Onkalo ndjika oya nika oshiponga noonkondo kiikunomwa, unene tuu pethimbo ndika lyopetameko lyokulonga momapya, nongele opwa kala inaa pu katukiwa onkatu yoku shi kondolola nena otashi ka hula nayi,” osho a popi ngaaka.

Nghipandulwa okwa popi kutya oyi ipyakidhila noonkambadhala dhokukondolola onkalo ndjoka yoshipahu nokapuka moshitopolwa.

Okwa popi kutya ongundu yaakonakoni oyi ipyakidhila nokutotha mo omahala ngoka ga kwatwa ko unene kiipuka mbyoka, omanga oongundu ndatu dha thikama po maanambelewa 13 osho wo iihauto itano odhi li nale momidhingoloko ndhoka dha gumwa nelalakano lyokukwathela.

“Aanamapya naaniimuna otaya indilwa ya lopote koosenda dhuunamapya kombinga yomahala galwe ngoka taya mono ga napakana okapuka nenge oshipahu,”osho a popi ngaaka.

Omunafaalama gwomomudhingoloko gwaNgoma, James Lutombi okwa lombwele onzonkundaneki ndjika kutya okwa li a pululitha nokulonga oohekta ntano ashike ngashingeyi oohekta ashike mbali dhi li nawa oshoka oshipahu osha kwata ko epya lye noonkondo.

“Kandi shi nokuli ngele oohekta mbali ndhoka dha hupu ko otadhi shi pondola ngaa molwashoka oshipahu osha tandela noonkondo.

Sigo oompaka uuministili wuunamapya nuuniimuna owa pombela epya lyandje lwiikando iyali okuza omumvo gwa zi ko.

Ashike natango oshipahu osha galuka nonkene onda tegelela aanambelewa ya galuke natango ya pombele,” osho a popi ngaaka.

Lutumbi okwa popi kutya ngele okwa mono mo sha meteyo nena ota ka landitha po oolaata dhontumba opo a mone mo oshimaliwa shoka kwa li a longitha mokupulula.

Omunampya gulwe ngoka a gumwa momudhingoloko gwaLinyanti, Matengu Simasiku, okwa popi kutya epangelo olya pumbwa okumona ekandulopo lyuupyakadhi mboka tali kalele molwashoka konyala omumvo kehe ohaya kala ya taalela kuupyakadhi womapya gawo taga hanagulwa po kokapuka nenge koshipahu.

“Ohatu longitha uusenda mboka tu na po okupululitha netegameno lyokumona eteyo lya kola nokwiimonena iiyemo.

Ashike nando ongaaka, kehe omumvo iimaliwa yetu ohayi hepa owala. Ando epangelo nali kale ngaa hali gandja sha kwaamboka ya dhengwa pevi koshipahu nokokapuka,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.