Aalongi 17 taya ningilwa omakonakono gokuya miihulo naanasikola

Uuministeili wElongo, Uunkulungu nOmithigululwakalo owa tseyitha kutya aalongi ye li 17 okuza moosikola dha yooloka moshilongo, otaya ningilwa omakonakono ge na sha nomaihumbatonayi ga pamba okuya miihulo naanasikola.

Uuministili owa lopota kutya iipotha ashike yi li ine ya manwa, omanga ayihe yilwe onkene yi li momake gomakonakono gokomisi yomayakulo gaaniilonga yepangelo.

Omukuluntuwiliki gwoshimpungu shomapendulopo gelongo shedhina National Institute for Educational Development, Patrick Simalumba, omasiku ga zi ko moonkundathana noDesert Radio okwa popi kutya opelesenda yimwe yomategelelo gaanasikola oge etithwa kaalongisikola, nogendji gomomategelelo ngoka okwa konekiwa haga ningwa pethimbo lyomafudho gaDesemba.

“Opu na iinima ya yooloka mbyoka hayi etitha omwaalu gwaanona ya thige po oosikola noosikola aluhe ohadhi landula oshinima shoka opo dhi tseyithilwe oshe etithi. Oshiholelwa, mo2019, otwa li naanasikola ya konda po4 000 mboka kwa li ya ningi omategelelo. Ngele okwa popiwa kutya opu na omwaalu gwaanasikola ye li 10 000 mboka ya thiga po oosikola nena aanasikola mboka ye li 4 000 oye na okukala ya kwatelwamo,” osho Simalumba a popi ngaaka.

Pokati komumvo gwo2020 no2022, moshilongo omwa ndhindhilikwa omakwatathano gopaihulo ge li 22 pokati kaanasikola naalongi.

Omukuluntuwiliki muuministili welongo, Sanet Steenkamp okwa popi kutya uuministili welongo owu na omulandu gwokuyelithila aalongisikola uuna ya kutwa omanga inaaya tameka niilonga.

“Pethimbo ndyoka, ohaya pewa Omukanda gwOmaihumbato gAalongi ngoka gwa yeleka kutya okuya miihulo naanasikola osha indikwa,” osho Steenkamp a popi ngaaka.

Steenkamp okwa lombwele onzonkundaneki ndjika kutya numvo, uuministili owa ningi omakonakono giipotha 17 yaalongi mboka ya longitha oonkatu dhiilonga yawo pambambo, sho ya yi miihulo naanasikola.

“Oshinima shoka itashi idhidhimikilwa nande noshi li ompinge nomaihumbato gaalongi naanasikola. Iipotha yi li ine yomwaambyoka oya manithwa nale noya lalekwa mo nale miilonga yepangelo, papitikilo lyOmbelewa yOmuprimaminista. Iipotha ya hupa ko yi li 13 oyi li kohi yomakonakono gokomisi yomayakulo gepangelo omanga kwa tegelelwa etokolo okuza komuprimaminista,” osho Steenkamp a popi ngaaka.

“Omanga aalongi oyo ya talika ko ongaavali yaanona, shoka oshi li ongesithahoni okutala kutya onkene tu na iipotha oyindji yaanona taya pewa omategelelo kaalongi. Ohashi uvitha nayi okutala kutya olundji uuna aanasikola ya pulumutha aanona, nena ohaya kutha mo uumbangihokololo, naashoka ohashi dhigupaleke oshipotha shi vule okupotokononwa,” osho a popi ngaaka.

Steenkamp okwa popi kutya uuministili otawu tsikile nokutala ko iikumungu mbyoka ongoshinima oshinene tashi pumbwa eyapukilo lyomeendelelo nomilandu dhomondjila odhi na okulandulwa opo mboka taye shi ningi ya katukilwe onkatu yi li mondjila.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.