Aakwashigwana ya kwathele mokumangitha po ookalyamupombo

Aakwashigwana yaali oya kwathele mokumangithapo ookalyamupombo yane mboka taku hokololwa kwa li ya yugu omukwashigwana gumwe, mOvenduka.

Oshiningwanima shoka osha ningilwa pehala tali ithanwa Zoo Park sho omulumentu ngoka a li ta li iikulya ye a gondja a yapukilwa kaafekelwa yane.

Frans Petrus okwa hokolola kutya aafekelwa mboka oya tono omulumentu ngoka oonkondo noye mu yugu ongodhi yopeke noshimaliwa shoka a li e na.

Petrus okwa popi kutya ye opamwe nakuume ke oya tokola okwi idhopa mo opo ya kwate oombudhi ndhoka dhi galule iinima mbyoka.

“Otwe ya tidha notwi igidha otaxi moka ya yi opo yi thikame, ashike inayi thikama,” osho a hokolola ngaaka.

Aafekelwa mboka oya tulwa miipandeko lwopotundi 15h30 popepi nEgumbo lyEpangelo ekulu ndyoka tali adhika mepandaanda lya Robert Mugabe.

Omupopiliko gwopolisi yOshilandopangelo, Marcelline Murapo, okwa koleke oshiningwanima shoka.

“Opolisi yOshilandopangelo okwa li tayi patolola momudhingoloko noya mono aantu taya matuka. Oya tokola okupula kutya omolwashike taya matuka, nokuza mpoka oya tseyithilwa kombinga yoshiningwanima shoka. Aapolisi oya tameke nolukongo noyi itsu motaxi ndjoka ya tongononwa ya fa naanaa ndjoka ya fadhukapo noombudhi,” osho a popi ngaaka.

Shoka oshe eta aafekelwa yane ya tulwe miipandeko noya falwa koshitaasi shopolisi yaVenduka.
Ongodhi ya nakuninga oshihakanwa oya monika noya gandjwa kumwene.

Murapo okwa popi kutya oya ninga omathaneko gokwe eta egameno lya kola moZoo Park opo mu kale mwa tonatelwa.
“Otwa thaneka okutula uuthano wokamela moZoo Park nomomudhingoloko opo wu kale tawu tonatele ehala ndyoka,”osho a popi ngaaka.

Okwi indile aakwashigwana ya kale aluhe ya lungama yo ya kale omeho nomakutsi gopolisi.

Murapo okwi indile wo aakwashigwana ya kale taya lopotele opolisi uuna ya mono oonkalo tayi limbilike, nopolisi otayi kwatathanwa nayo konomola yongodhi (061)302-302 nenge pakatumwalaka okafupi ko-4444.

Pokati mpoka, omulumentu gwomimvo 21 okwa falwa koshipangelo mOlyomakaya sho taku hokololwa a tsuwa nombele mOngwediva sha landula oshimaliwa anuwa shoka sha yakwa koewallet yongodhi yomufekelwa.

Aalumentu yaali, nakuninga oshihakanwa nomufekelwa, otaku hokololwa kwa li taya nu pamwe pondingosho tayi ithanwa Caritos Bar komatango gesiku ndyoka sho oontamanana dha tukuka sho anuwa omufekelwa a dhimbulula kutya oshimaliwa shoka a li a tuminwa kongodhi pae-wallet osha kuthwa ko.

“Konima yehokololo ndyoka, omufekelwa okwa kutha mo ombeleo nokwa tsu nakuninga oshihakanwa,” osho opolisi ya popi ngaaka.
Nakuninga oshihakanwa okwa tuminwa koshipangelo shaShakati notaku hokololwa kutya okuli monkalo tayi nuwa omeya. Omufekelwa ina tulwa natango miipandeko.

OMAIMANGELEKO
Pokati mpoka, aantu yatatu otaku hokololwa yi imangeleke mehuliloshiwike lya zi ko, mOndangwa, mOshivelo nomOmuthiya.
Pauyelele wolopota yopolisi, oonakusa yaali aalumentu omanga gumwe omukiintu.

Kapiye Johannes (39) okwa mana oondjenda sho i imangeleke momukunda Olungalunga momudhingoloko gwaNdangwa, mOlyomakaya.

Aapambele ye oya tseyithilwa nale onkundana yoluhodhi, nakusa ina thiga po ombapila yetompelo lyeikuthomwenyo nomakonakono gopolisi otaga pula komeho.

Moshiningwanima oshikwawo olutu lwa Ester Thomas (25) olwi itsuwika momudhingoloko gwaShivelo Build Together moshitopolwa shaShikoto, mOlyomakaya.

Otaku hokololwa kutya nakusa okwa adhika i imangelekela momuti, naashoka osha landula sho kwa li anuwa a nyenyeta nohondamati ye, esiku lya tetekele.

Nakusa ina thiga po ombapila yetompelo lyeikuthomwenyo, ishewe kapu na ngoka ta pelwombedhi oshiningwanima shoka. Aapambele yaThomas oya tseyithilwa nale onkundana yoluhodhi nomakonakono gopolisi otaga pula komeho.

Kuku Samuel Stefenus (82) okwa mana oondjenda mOlyomakaya momukunda tagu ithanwa Okapuka momudhingoloko gwaMuthiya.

Ohondakadhona ye otaku hokololwa a adha omudhimba gwomulumentu gwe mondunda ye yomwiidhi.

“Otaku hokololwa kutya nakusa okwa li u uhala esiku ndyoka megumbo ishewe kali nande tu ulike e na uupyakadhi wa sha,” osho opolisi ya popi ngaaka.

Nakusa ina thiga po ombapila ya sha ishewe kapu na ngoka ta pelwombedhi oshiningwanima shoka.
Aapambele yanakusa oya tseyithilwa nale onkundana.