Aakwanezimo yoonakuhulitha kuuzigo otaya pewa ehungomwenyo

UuministiliwUundjolowele nOmayakulo gOnkalonawa owa tumu aahungimwenyo koshitopolwa shaKavango Uuzilo opo ya ka hunge omwenyo aakwanezimo yaapambele 15 mboka ya mana oondjenda ombadhilila okuza mOlyomakaya, sho ya li uuzigo okupitila moshimbombo.

Okupitila momukanda ngoka gwa pitithwa komukuluntuwiliki gUuministili wUundjolowele Ben Nangombe, aanambelewa mboka ya tumwa koshitopolwa shoka oya kwatela mo wo mboka taya ka gandja elongo kombinga yuundjolowele kaakalimo yomomudhingoloko opo ya londodhwe kombinga yuupyakadhi hawu vulu okwe etwa uuna taya longekidha iikulya yawo. “Aanambelewa mboka otaya ka longa aakwashigwana kombinga yelongekidho lyiikulya pamukalo gu na egameno osho wo uupyakadhi mboka tawu vulu okuholoka uuna taya lumbakanitha iikulya naambyoka tashi vulika yi na uuzigo,” osho uuministili wa popi ngaaka. MOlyomakaya ya zi ko, aapambele 18 yomegumbo limwe ndyoka tali adhika momukunda Kayova moshikandjohogololo Ndiyona, otaku hokololwa ya li oshimbombo sha ningwa nuusila wehete lyoshikunwa shomalovu gomundevere nolwanima oya tameke okusa, nomwaalu gwaamboka ya hulitha sigo oompaka ogu li paantu 15.

Oonakusa otaku hokololwa ye li pokati koomvula mbali sigo 33.

Nangombe okwa popi kutya aanegumbo mboka okwa li ya falwa meendelelo koshipangelo shaNyangana momasiku 27 Mei, ye na omandhindhiliko gokukala ya lya iikulya yi na uuzigo.

Shoka she eta ya tameke okuhulitha esiku olyo tuu ndyoka moshipangelo shaNyangana, omanga yalwe oya tuminwa koshipangelo shaRundu oku ka mona uuhaku wa gwedhwa po ashike yamwe natango oya hulitha nokugwedha komwaalu, omanga yamwe onkene ye li moombete. “Onkalo yaavu mboka oyi li metonatelo lela. Okwa li ya kuthwa natango ombinzi opo yi ka konakonwe wo kombinga yuuzigo womalovu . . . Uuministili wUundjolowele nOmayakulo gOnkalonawa otawu gandja omahekeleko koonakuthigwa po” osho Nangombe a popi ngaaka.

Okwa kunkilile aakwashigwana ya kale ya kotoka aluhe uuna taya longekidha iikulya, pakushilipaleka kutya iilongithomwa ngaashi oombiga niipumbiwa nenge iilongitho yopelugo oya yogwa lela nawa nothewa nokutulwa pomahala ga gamenwa, osho wo okwiitulila iikulya mbyoka iiyihu mehala lyi li nawa nolya gamenwa opo kaayi kwatwe kuuzigo.

Kansela gwoshikandjohogololo shaNdiyona, Laurentius Mukoya, okwa popi kutya oshiningwanima shoka “otashi uvitha nayi” nuunene ooshoka kutya oonakuninga oshihakanwa oya za megumbo limwe. Okwa gwedha po kutya aakalimo yomoshikandjohogololo shawo otaya nana nondatu omolwoshikukuta momudhingoloko gwawo.

“[Aakwashigwana] Ohaya kongo iikulya yuukila komahangu mbyoka taya vulu okulya,” osho a popi ngaaka.

Pokati mpoka, ongundu yewawa lyaagundjuka yoSwapo moshitopolwa shaKavango Uuzilo oya popi kutya oya uvithwa nayi noonkondo kekanitho lyoomwenyo dhaantu kaaye na ondjo, moKayova.

Omushanga gwewawa moshitopolwa shoka Anselm Marungu okwa popi kutya oshilongo osha kanitha aagundjuka mboka tashi vulika kwa li ye na oku ka kutha ombinga mehumokomeho lyoshilongo monakuyiwa.

“Onkene otatu gandja etumwalaka lyomahekeleko kaakwanezimo ya thigwa po. Otuli pamwe nayo pethimbo ndika lyuudhigu,” osho Marungu a popi ngaaka.

Okwa popi kutya ewawa lyaagundjuka otali ka ninga omalongekidho gokutalela po ofamili yoonakuthigwa po.

“Otatu shi gandja momake gaKalunga, molwashoka oye awike ha gandja ishewe oye ha kutha po. Otatu galikana wo kuKalunga opo a hupithe oomwenyo dhaamboka taya kondjo nomwenyo dhawo moshipangelo. Otatu indile wo aanambelewa yuuministili wUundjolowele nOmayakulo gOnkalonawa ya longe mpoka taya vulu opo ya hupithe oomwenyo dhaamboka ye li natango moshipangelo,” osho Murungu a popi ngaaka.

Omunyekadhi gwoshilongo Monica Geingos naye okwa gandja omahekeleko kaakwanezimo mboka ya thigwa po, nokwa popi kutya ombelewa ye otayi ka gandja omakwatho gehungomwenyo kakwanezimo omolwonkalo moka ya thigwa koluhodhi. “Ekanitho ndyoka enene noonkondo,”osho Geingos a popi ngaaka mEtiyali.

“Ombelewa yandje otayi ilongekidha okugandja eyambidhidho lyopamadhiladhilo kofamili yoonakuthigwapo nokaakwashigwana mboka ya gumwa . . . opamwe nAanamibia oyendji otandi gandja omahekeleko kuGodfried Shishugho Kangungu osho wo ofamili ayihe yooKangungu pethimbo ndika edhigu,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.