Aakwanezimo ya fumvike omudhimba gwa puka

Akwanezimo yomOshomeya (Tsumeb) omasiku ga zi ko oya thigwa yu uvite nayi noonkondo sho ya nongele kutya oya fumvika omudhimba gwa puka, peha lyokufumvika omudhimba gwomupambele.

Ombedhi yoshiningwanima shoka oye pe opolisi ndjoka oyo anuwa ya gandja omudhimba gwa puka okuza kokila mesiku lyefumviko lyomupambele gwawo.

Nando ongaaka, oonkambadhala dha ningwa konzonkundaneki ndjika okupula opolisi yi yelithe kombinga yehokololo ndyoka, odha hulile mokwena kwa thita.

Omupolisi poshitaasi shopolisi yaTavi okwa koleke kutya oshiningwanima shoka oshoshili, ashike okwa tindi okutya ko sha muule nokwa lombwele onzonkundaneki ndjika yi pule uuyelele okuza kukomanda gwopolisi moshitopolwa osho wo omupopiliko gwopolisi.

Aakwanezimo oya popi kutya mongashingeyi otaya nana nondatu okugongela oshimaliwa shokuninga efumviko ekwawo lyomupambele, Andreas Awaseb, ngoka ya li ye na okukala ya fumvika nale.

Moonkundathana noradio yo-Desert Radio, aakwanezimo ya nakusa Awaseb oya popi kutya ngashingeyi omudhimba gwe ogwa kala mokila uule woomwedhi, nonande okwa li ye wete ye mu fumvika nale – sho ya fumvike omudhimba gwa puka.

Aatekulu yanakusa Awaseb ngaashi Clara Gawases, Lydia naTeckla Thomas, oya yi moonkundathana noDesert Radio, okupitila momutoloki ‘Ricardo’ ngoka kwa li ta kwathele okutoloka elaka lyoshiDamara/Nama okuya mOshiingilisa.

Oya popi kutya Awaseb okwa kala mokila okuza muMei, sha landula sho momasiku 26 Mei ya yi kokila noya pewa omudhimba gwa puka ngoka ye gu fumvike esiku olyo tuu ndyoka.

Gawases okwa popi kutya muAuguste okwa li she ya halutha noonkondo sho ya tseyithilwa kutya oye na okuningulula efumviko molwashoka ngoka ya fumvike muMei keshi omukwanezimo, ano sha hala okutya oya fumvika omuntu a puka.

“Omuniilonga gwokokila oye a dhimbulula oshinima shoka, ashike nando ongaaka tse otwa adhika nale twa fumvika. Okwa lombwele wo opolisi kombinga yoshiningwanima shoka, nopolisi oya kwatathana natse [aakwanezimo yaAwaseb],” osho Gawases a popi ngaaka.

Epuko ndyoka okwa li li na okumonenwa po ando aakwanezimo oya pewelwe ompito yokutala oshipala nenge olutu lwanakusa pethimbo lyoshituthidhimbuluko shanakusa, ashike Gawases okwa popi kutya aakwanezimo okwa li ya lombwelwa kopolisi opo kaaya tale olutu molwashoka olwa yonuka.

Gawases okwa hokolola kutya sho aakwanezimo ya tseyithilwa kutya oya fumvika omuntu a puka, oya yi kokila yaTavi opo ya ka tothe mo omudhimba gwomupambele.

Clara Thomas okwa popi kutya molwashoka otaya nana nondatu pashimaliwa, onkene inaaya fumvika Awaseb.

“Otwa longitha nale oshimaliwa oshindji sho kwa li twa fumvike omudhimba gwa puka, ashike nani omudhimba gwomuntu gwetu natango omo owala gu li mokila,” osho a popi ngaaka.

Clara okwa hokolola kutya mesiku ya ka tala omudhimbwa gwaAwaseb, okwa li ye li pondje yokila ya tegelela opo ya pewe omudhimba gwe, yo ya ka fumvike.

“Aapolisi nani [sho twa tegelela] oya hinga nale nomudhimba ya za mo mOtavi yu uka koTsumeb. Omukaakena gwookilometa 10 okuza mOtavi, opolisi oya tsakanene naanambelewa yomalongekidho gefumviko mboka ya zi koTsumeb.

Opolisi oya gandja omudhimba kaanambelewa yomalongekidho gomafumviko, noya galukile kOtavi. Shoka osha ningwa inaa ku nongelwa kutya tse ongaakwanezimo otuli pokila twa tegelela,” osho a Clara a popi ngaaka.

Okwa gwedha po kutya mongashingeyi aakwanezimo oya pumbwa ekwatho opo ya vule okufumvika Awaseb.
Okwa popi kutya opolisi oye ya pe owala ombili.

“Omupolisi ngoka a popi kutya oye inspekta Snewe okwa talelepo ofamili yetu nokwe tu lombwele kutya okwa tumwa kaahona ye, e tu pe ombili.

Opolisi onkene inaayi tu pa ekwatho lya sha. Sigo oompaka otwa pewa oshiketha, nomalongekidho gaanambelewa yomayakulo gomafumviko otwe ya pewa, ashike katushi kutya omakwatho ngoka otwe ga pewa okuza peni,” osho Clara a popi ngaaka.

Komanda gwopolisi yoshitopolwa shaShikoto, komufala Teopoline Kalompo-Nashikaku, okwa popi kutya ina tseyithilwa sha natango kombinga yoshiningwanima shoka.

“Piindje ethimbo opo ndi shi pulaapule, notandi ke mu galukila,” osho a yamukula ngaaka. Kalompo-Nashikaku lwanima okwa lombwele onzonkundaneki ndjika yi pule uuyelele kombinga yoshinima shoka kukomanda gwoshitopolwa shaTjozondjupa, komufala Henrich Tjiveze, ashike ongodhi ye ineyi yamukula.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.