Omukuluntu gwetanga lyegameno moshilongo, Martin Pinehas, okwa popi kutya iilyo yetanga lyegameno oyindji mwa kwatelwa naamboka ye na oonkatu dhopombanda, kaye na omagumbo nohaya zi moohotela uuna ya yi momafudho.
“Shoka otashi sitha ohoni. Ohotela kayi shi egumbo kaya. Alikana kambadhaleni mu tunge omagumbo, kutya nee egumbo lyondunda yimwe olyi li owala nawa,” osho Pinehas a popi ngaaka.
Ndhoka kakukutu gwetanga lyegameno okwe dhi popi pethimbo lyoshituthidhimbuluko shaangoka a li brigadia-ndjayi, Blasius Ainima, momukunda Onawa moshitopolwa shaMusati, oshiwike sha zi ko.
Ngoka a li omukuluntu gwetanga lyegameno, Martin Shalli, pethimbo ta popi poshituthidhimbuluko shoka, okwa zi mokalungu kutya opu na aakwiita yamwe mboka aakuluntu metanga lyegameno haya vulu okukala taya hingi iihauto yondilo ashike kaye na omagumbo.
Okwa popi kutya yamwe yomaakwiita mboka, oya kala taya longo metanga lyegameno okuza mo1990 pethimbo oshilongo sha manguluka.
Shalli okwa popi kutya okwe enda pomahala ogendji hapu zi aakwiita nokwa nongele kutya oyendji ohaya zi owala moombashu.
“Kamu na omeya nolusheno momagumbo gawo, ashike ngele owa tala omagumbo ngoka ge li momukunda ngoka agehe oge na omeya nolusheno. Epuko olya zi peni? Oshinima oshikwawo omuntu ngoka otashi vulika inaa hokana nokuli, otashi sitha ohoni,” osho Shalli a popi ngaaka.
Sho a pulwa konzonkundaneki ndjika oshiwike sha zi ko, ngele pamwe aakwiita yamwe kaye na omagumbo omolwoondjambi dhawo ndhoka oonshona, Shalli okwa yamukula tati “mbyoka iipolopolo”.
“Oto vulu ngaa okukala to longo mepangelo uule woomvula dha konda po30 ashike ku na egumbo noshihauto; oshe ende ngiini wu kale kuuna sha? Iimaliwa yoye ohayi ningi shike omanga yakweni yamwe ye na iinima yawo? Aaniilonga pamwe mboka otashi vulika ye na oonkatu dha faathana dhopailonga, ya tamekela oshita miilonga, noye na oonzapo dha faathana, noondjambi dhi thike pamwe, oshili nashi popiwe!’
Shalli okwa popi kutya aakwashigwana yamwe uuna ya mono aakwiita ye li momizalo dhawo, ohaya tameke okupula kutya ohaya longo shike sho ihaaya kala taya tonatele omudhingoloko nokutidha oombudhi ndhoka tadhi tyakaleke moshigwana.
Nokwa popi kutya edhiladhilo ndyoka olya puka molwashoka aakwiita inaya dheulilwa okutidha oombotsotso, ashike oya dheulilwa okudhipaga.
“Tse otwa dheulilwa okudhipaga. Omwa tegelela shike okuza kutse? Omwa hala twa ninga shike? Otamu tu etele uupyakadhi. Dheuleni owala aapolisi oyendji oyo ya kale taya tidha ookalyamupombo momilamba. Aakwiita hayo yokutidha aantu momilamba. Inandi shi uva we nokuli,” osho Shalli a popi ngaaka.
Ainima okwa mana oondjenda momasiku 2 Septemba mOvenduka nokwa fumvikwa mEtiyali lya zi ko, mOmugulugwombashe moshikandjohogololo shaTsandi, moshitopolwa shaMusati. Okwa thigi ko omukulukadhi gwe, omwanakadhona noyanamati yaali.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
