Aakalimo 50 000 mOshikoto taya si ondjala

Aakalimo ya konda po50 000 moshitopolwa shaShikoto oya taalelwa konkalo yondjala ya yaga kegonga omolweteyo lya nkundipala lye etwa komuloka ngoka kwa li tagu nyangwaanyangwa numvo.

Uuyelele mboka owu li oshitopolwa sholopota yaNamibia yo2023/24 yiimbapele yomapekapeko nendjandjukununo lyoonkalo dha yaga kegonga ndjoka ya ndulukwa po kombelewa yelelo lyoshitopolwa shaShikoto melongelokumwe nOmbelewa yOmuprimaminista, noya ningwa numvo.

• 

Oshizemo shomapekapeko ngoka oshu ulike kutya oopelesenda 25 dhaakalimo yomoshitopolwa shoka otaya hupu shokadhila, noku wetike kutya oya taalela onkalo ya nayipala okuza muKotoba numvo sigo omuMaalitsa 2024.

Onkalo yoshikukuta nondjala moshitopolwa shaShikoto omolwomuloka gwa nkundipala numvo, oye eta aakalimo ye li po54 000 nomagumbo ge li po13 500 ya kale mompumbwe onene yekwatho lyiipalutha momukokomoko gwoomwedhi twa taalela.

Omupopiliko gwelelo lyoshitopolwa shaShikoto, Peter Nehale, okwa popi kutya mEtine lyoshiwike sha zi ko oya ningi oshigongi shelelo lyokomitiye tayi ungaunganga noonkalo dha yaga kegonga moshitopolwa, moka ya kundathana pamwe naakalelipo okuza kiikondo ya yooloka kombinga yomatokolo ye na okutula miilonga opo ku yapukilwe onkalo ndjoka yondjala.

Moshigongi shoka, aakalelipo yiikondo ya yooloka oya kundathana kombinga yomilandu noonkantu ndhoka ye wete dhi na okukatukwa kepangelo opo ku kwathelwe aakwashigwana mboka ya dhengwa koshikukuta.

“Moshitopolwa shetu, inatu mona omuloka gwa gwana numvo, onkene omahala ogendji oga dhengwa koshikukuta,” osho a popi ngaaka.

Nehale okwa popi kutya onkalo yoshikukuta shonumvo oya nayipaleka oshitopolwa noonkondo, molwashoka oya gwedha owala komutengi guupyakadhi womeya ngoka ga kala taga lilwa koyendji muule woomimvo dha piti.

“[Ongombelewa ya ngoloneya] Otse tu na oshinakugwanithwa shokutulitha miilonga opolohalama yehawalo lyoshikukuta . . . ndjoka olundji hayi pewa mboka ya dhengwa noonkondo konkalo osho wo aakwashigwana mboka taya nana nondatu pankalathano,” osho a popi ngaaka.

Nehale okwa popi kutya elelo lyoshitopolwa shaShikoto, opamwe noshimpungu shomeya nuuyogoki, melongelokumwe nUuministili wOmeya nEtendululo lyEvi otaya shilipaleke kutya oya tula miilonga omulandu gu li nawa ngoka tagu vulu okukwathela mekandulopo lyompumbwe yomeya.

Nehale okwa popi kutya omulandu ngoka otaye gu tula miilonga opo ya shilipaleke kutya aakalimo mboka taya lili enota ngaashi miikandjohogololo shaKankolo, shEengodi noshaNehale Lya Mpingana oya mona omeya gokunwa pethimbo ndika lyoshikukuta osho wo monakuyiwa.

“Shoka otashi kala nee sha kwatela mo okuninga nawa nokwe eta po oomboola nenge omahala gomeya moshitopolwa, okukutha mo nokugwedhela ominino ndhoka omifupi, osho wo okukala taku gandjwa ootenga dhomeya kaakwashigwana,” osho a popi ngaaka.

EHAWALO LYOSHIKUKUTA

Pauyelele wepangelo aakalimo mboka ye li monkugo yi na onkambe oya tameka nale okupewa ekwatho lyiikulya okuza kepangelo.

Nehale okwa popi kutya opo omuntu a pewe iikulya yoshikukuta, megumbo lyaandjawo inamu kala nande hamu pewa nale omakwatho ga sha giikulya okuza palwe, naakalimo mboka hazi megumbo limwe naya kale ihaa ya mono ekwatho okuza kepangelo lyoshimaliwa kumwe sha konda pooN$2 600.

Ngoloneya gwoshitopolwa shaShikoto, Penda ya Ndakolo okwa popi kutya aakalimo oyendji oya gumwa koshikukuta – unene tuu aaniimuna.

“Onkene, otwa pumbwa okuninga po omalongekidho taga pumbiwa okuhupitha iimuna. Itashi holekwa kutya oshitopolwa shetu onkene sha taalelwa komashongo gompumbwe yomeya, unene tuu momikunda ndhoka dhi li kokule, hoka oshimoko hashi nyengwa okuthikitha ko omeya, nenge komikunda ndhoka dhi na omeya goshimongwa.

Onkalo ya yaga kegonga ndjoka tuna ngashingeyi oya gwedhele owala uupyakadhi womeya mboka twa kala twa taalela nale,” osho a popi ngaaka.

Omukuluntuwiliki mOmbelewa yOmuprimaminista, I-Ben Nashandi, okwa popi kutya epangelo okupitila mOmbelewa yOmuprimaminista, olya gandja oshimaliwa shi li poomiliyona N$100, sha nuninwa ekondjitho lyuupyakadhi wompumbwe yomeya miitopolwa mbyoka ya dhengwa kenota moshilongo ashihe.

Okwa popi kutya epangelo otali ka gandja wo iikulya yoshikukuta kaakwashigwana miitopolwa ya yooloka okuza momasiku 1 Kotoba sigo omomasiku 31 Juni 2024, omanga aaniimuna nayo otaya ka pewa omakwatho giikulya yiimuna yawo pokati kaKotoba numvo sigo omomasiku 1 Maalitsa omumvo twa taalela.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.