Aahingi yaali yomaloli Aazambia taya tamanekelwa onkambadhala yedhipago

AAHINGI yomaloli ye li yaali oomvalele dhaZambia, mboka ya tulwa miipandeko oshiwike sha zi ko sho taku hokololwa ya dhenge eshenge mOmbaye, oya taalela oshipotha shonkambadhala yedhipago.

Shabome Shiaimense (27) naJonathan Kamfwa (40) oya holoka mOmpangu yaMangestrata gwaMbaye, mOmaandaha.

Omutamaneki gwepangelo Victoria Shikesho okwa lombwele ompangu kutya nakuninga oshihakanwa okuli monkalo ombwinayi nokwa taambelwa mokoma moshipangelo shi li mOvenduka.

Pauyelele woodokumente dhomompangu kombinga yoshipotha shoka, aafekelwa mboka yaali oya dhenge eshenge Brian Araeb noshilwitho molutu osho wo momutse, naashoka oshe eta e ehamekwe noonkondo momutse noku mu thiga wo niilalo oyindji.

Mangestrata John Sindano oku undulile oshipotha shoka komasiku 27 Maalitsa opo ku gandjwe ompito yomakonakono gopolisi.

Okwa lombwele aafekelwa kutya oye na uuthemba wokuninga eindilo lyoboloha, ashike nando ongaaka omutamaneki ita popile ya pewe ompito yokwiifutilamo.

Araeb, ngoka i ininga omukiintu, okwa adhika ke ena oonkondo moondundu dhi li popepi nomatungo goositola dhoDunes Mall momasiku 4 Januali konima sho aafekelwa mboka kwa li ya hala okuya miihulo naye ya dhimbulula kutya nani [Araeb] omulumentu.

Otaku hokololwa kutya aalumentu mboka yaali oya tokelwa pamwe naAraeb osho wo yalwe pehala lyomaloli tali adhika momudhingoloko gwaNarraville mOmbaye ongulohi yEtitatu sigo okoongulasha dhEtine.

Naashoka oshe eta nakuninga oshihakanwa a hulile momake gAazambia mboka lwanima ye ke mu dhenga noku mu hula iikutu sho ya dhimbulula kutya eshenge.

Araeb okwa taambelwa moshipangelo shomOmbaye ashike lwanima okwa tuminwa koshipangelo shaKatutura omolwuuwehame we nepango lya gwedhwapo ndyoka ta pumbwa.

Nakuninga oshihakanwa ngashingeyi otaku hokololwa e li monkalo tayi nuwa omeya.