Aafekelwa yoFishrot ya gandja omanyenyeto komukonakonindjayi

Basilius Dyakugha

Omukonakonindjayi Basilius Dyakugha, ngoka wo e na oshinakugwanithwa shokugamenenapo uuthemba womuntu, okwa popi kutya ombelewa ye itayi vulu nande okukwathela aafekelwa yoFishrot, Sacky Shanghala naBernhard Esau mboka taya nyenyeta kombinga yomulandu gwoveta, ndjoka ye ya kaleka mondjeedhililo sigo onena.

Dyakugha, mEtiyali, okwa kutha onkatu a ka talelepo ondholongo yezulonkalo yaVenduka moka mwe edhililwa aafekelwa mboka ya tega iipotha yawo yi li momake gompangu.

Bernhard Esau

Mondholongo yezulonkalo yaVenduka omu na aanandholongo ye li 123 mboka ye na iipotha yi li mompangu.

Shanghala okwa nyenyeta kuDyakugha kutya oya kala mondjeedhililo uule woomvula ne ngashingeyi ashike sigo oompaka inaya pewa oboloha, nenyenyeto ekwawo oondyoka kutya okwa hala ya pewa iipundi niitaafula mondholongo opo ya vule okulonga nuupu sho taya lesha muule oodokumente dhuuyelele wiipotha ya taalela.

“Omuntu a dhipaga aantu yane nenge yatano, a monika ondjo, nokwa pewa egeelo lyoomvula 15 konima yekumba, oha vulu okupewa okompiyuta osho wo okukala ta lesha. Ashike ngame ngoka anuwa kaandi na ondjo [inee monika ondjo], itaandi mono nokuli oboloha. Itandi yi mono,” osho Shanghala a lombwele Dyakugha ngaaka.

Sacky-Shanghala

Shanghala okwa popi kutya okwa hala ya pewa ehala mondholongo lyokulesha oodokumente dhiipotha ya taalela.

Omukonakonindjayi okwa lombwele oThe Namibian uunambo kutya ota vulu owala okukwathela aafekelwa mboka kombinga yekemo lyokupewa ehala lyokuleshela sho taya ilongekidhile iihokolola yawo mbyoka ya taalela.

Okwa popi kutya kombinga yomanyenyeto galwe, oohahende yaafekelwa mboka oyo naya ka gandje omakemo galwe gaayakulwa yawo kompangu.

Okwa popi kutya sho a talelepo ondholongo ndjoka, Esau naShanghala oya longitha ompito ndjoka oku mu lombwela omakemo gaashoka inaaya nyanyukilwa sho ye li mondjeedhililo.

“Oya lombwele ndje kombinga yokukala itaaya pewa oboloha. Oboloha oye etwa po koshipotha shaS V Acheson mo1991. Kayeshi uvite ko kutya omolwashike itaaya kangulwa noshikangule sha faathana noshipotha shoka, sho ngashingeyi aantu ya kalekwa mondjeedhililo kaaye na ondjo uule woomvula dhi li ne omanga iihokolola inaayi tameka mompangu. Shoka osho taya nyenyeta,” osho Dyakugha a popi ngaaka.

Okwa popi kutya oshikumungu shaShanghala oshi li kombinga yiikwambelewa.

“Otaya nyenyeta kombinga yehala mpoka taya vulu okukala taya ilongekidhile oshipotha opo ya vule okukiipopila [mompangu] molwashoka ngashingeyi oya pewa oodokumente dhuuyelele wiipotha mbyoka taya tamanekelwa.

Ondi wete ya tula oodokumente komapeleta giipilangi, [ashike] shoka kashi shi oshitaafula. Kamu na iitaafula. Kamu na iipundi. Oya popi kutya ‘ahawe, otwa pumbwa ehala mpoka tu na oshitaafula noshipundi tatu vulu okushangela. Otwa pumbwa okwe enda moodokumente ndhoka adhihe,” osho a popi ngaaka.

Moonkambadhala dhokukwathela Shanghala a pewe ehala lyi li nawa lyokuleshela omikanda dhomatameneko giipotha a taalela, Dyakugha okwa pula aanambelewa yondholongo, mboka ye mu tseyithile kutya oyi ipyakidhila nokuya kongela ehala li li nawa.

“Oya popi kutya oshinima shoka oyeshi shi noyi ipyakidhila nasho. Oye ya nine omahala, ngaashi wushi shi, omu na nale ehala lyompangu. Oye ya monena mo ehala moka,” osho a popi ngaaka.

Oshinima shilwe Shanghala a nyenyeta okombinga yokupewa ompito yokuya komalungula (kointaneta), sho a popi kutya pethimbo ndika ti ilongekidhile iihokolola yomompangu ota lesha muule shoka ta tamanekelwa moFishrot, nota pumbwa wo okuninga omapekapeko komalungula.

Oshiwike sha zi ko, omufekelwa pamwe moFishrot, Ricardo Gustavo, okwa popi kutya okwa hala epitikilo lyokompiyuta, eshina lyokunyanyangidha osho wo okuya komalungula mondholongo opo i ilongekidhile iihokolola yoshipotha a talela.

Dyakugha okwa popi kutya oohahende yaafekelwa oya gandja nale omanyenyeto ngoka mompangu nezulonkalo lyondholongo olyo kwa li lya pewa ombedhi moshinima shoka.

“Kashi li nande miinakugwanithwa yombelewa yandje okupotokonona shoka . . . [ashike] uuna wu li mondjeedhililo, oho kanitha kashona emanguluko lyoye, gamwe gomomamanguluko haga ngambekwa okuukale nekwatathano nuuyuni wopondje yondholongo. Okuya komalungula shimwe shomwaambyoka.” osho omukonakonindjayi a popi ngaaka.

Ashike nando ongaaka okwa popi kutya otashi vulika ya pewe ompito yokuya komalungula mondholongo ashike otashi ningwa kohi yekondololo ano pamangambeko.

Omupevikomufala gwoondholongo dhezulonkalo moshilongo Veikko Armas, ngoka wo oye omukuluntu gwezulonkalo lyondholongo yaVenduka okwa popi kutya oyi ipyakidhila nomalongekidho opo oominista aakulu ya kale ya pewa ookompiyuta dhopeke.

Armas okwa popi kutya omolwomaindilo gelongitho lyopaungomba ge li pombanda, ihaya vulu okukwatelamo kehe gumwe opo i ilongekidhile iihokola ye, naashoka otashi ningwa omolwoshimaliwa shoka kaashipo.

Ashike nando ongaaka okwa popi kutya ondholongo itayi vulu okuya pa ompito yokulongitha omalungula.

“Oshinima shokomalungula, molwashoka oya hala okuninga omapekapeko, osha pumbwa okutaliwa kaakonakoni.

Otwa pumbwa okupopya nayo opo tu ninge oshigongi shoka tashi potokonona oshinima shoka. Molwashoka tse otuli le po owala okuya edhilila, ashike aakonakoni oyo opolisi yaNamibia,” osho a popi ngaaka.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!