Omuniilonga gwiinyangadhalwa yomombelewa posikola yopaumwene Salom Hango (31) osho wo kakadhona gwomimvo 17 gwomondondo 9, mboka ya tulwa miipandeko sho taku hokololwa ya yaka oombapila dhomapulo gekonakono nomayamukulo gadho, itaya ethwa koveta.
Ndhoka odha popiwa komukuluntuwiliki muuministili welongo, uunkulungu nomithigululwakalo Sanet Steenkamp, moonkundathana noDesert Radio, mEtine.
Okwa popi kutya oshipotha sheyako lyoombapila ndhoka dhekonakono otashi vulika shi ka kwatele mo aanambelewa yalwe melongo mwa kwatelwa nomukuluntusikola gwosikola ndjoka, ngoka oye a lopota oshiningwanima shoka.
“Otu na oonkatu hadhi landulwa uuna pwa longwa iilonga inaayu uka kombinga yekonakono, ndhoka hatu landula shi ikwatelela komilandu, nodhi na okutulwa miilonga. Onda nyanyukwa molwashoka oveta oya tameka nale okulonga iilonga yawo [moshinima shoka] nomakonakono gomeni oga manithwa nale. Osikola ndjoka otayi ke shi hokololithwa notatu tala nkene tu na okupatululila oshipotha omulongi.”
Steenkamp okwa popi kutya aakuluntu yaataleli yomakonakono posikola nayo oye na okuningilwa omakonakono.
“Omulandu otagu landulwa notatu kala twa mana ngiika pethimbo tatu ka kala noshigongi shetu shotango shomakonakono muMaalitsa 2024.
“Notatu ka ninga etokolo okukatuka oonkatu dhilwe dhomaihumbato, ndhoka tashi vulika dhi ka kwatele mo omukuluntusikola. Shoka otashi ningwa molwashoka oya kala inaaya sa oshimpwiyu kombinga yegameno lyomakonakono,” osho a popi ngaaka. Hango osho wo omulongwa ngoka oya tulwa miipandeko mOmaandaha konima sho sheya puuyelele kutya oya yaka ekonakono lyopashigwana nolyopashitopolwa.
Ayehe oya pewa oboloha yooN$1 000 sho ya holoka mOmpangu yaMangestrata gwOutapi, mEtitatu.
Oshipotha shawo oshu undulilwa komasiku 26 Febuluali, nomulongwa okwa mangululwa e li kohi yetonatelo lyaakuluntu ye.
EKWATATHANO LYOPAIHOLE
Osheya puuyelele okupitila momakonakono ga ningilwa posikola kutya omuniilonga ngoka gwiinyangadhalwa yomombelewa okuli mekwatathano lyopaihole nomunasikola ngoka, noye na nokuli okanona.
Steenkamp okwa popi kutya shoka osha monika mo kaalongi yaali yoposikola ndjoka.
“Oye shi mono kutya moshikako shotango kakadhona ngoka okwa li a piti lela nawa, nonande pethimbo ndyoka okwa li kegumbo e na etegelelo.
Ishewe okutala elongito lyelaka momakonakono ge olye eta omalimbililo kutya otashi vulika omulongwa ngoka a mona ombapila yomayamukulo,” osho a popi ngaaka.
Steenkamp okwa popi kutya aalongwa ohaya shanga ekonakono miilongwa ihamano, nomapulo gomakonakono opamwe nomayamukulo ohaga tuminwa kiitopolwa ayihe 14.
Iitopolwa oyo nee hayi tokola yoyene kutya openi tapu ningilwa ookopi dhomakonakono moshitopolwa shawo, nohashi ningwa kohi yetonatelo lyelelo lyoshikondo shelongo naanambelewa, osho a popi ngaaka.
“Ndhoka odho omilandu dhi li po, nodhi shi okwiinekelwa. Nandi popye kutya osikola ndjoka oyopaumwene.
Oosikola dhopaumwene odha pula uuministili welongo dhi kale nadho hadhi pewa omapulo gekonakono, notwa zimina, ashike otashi ningwa pwa tulwa miilonga omulandu gwa kwata miiti gwafaathana[nogoosikola dhepangelo] ngoka epangelo lya tula po,” osho Steenkamp a popi ngaaka.
Okwa popi kutya nonande oshiningwanima shoka sha ningwa, egameno kombinga yomakonakono ohali kala lela lya kwata miiti.
Okwa holola eikwato pomutima kombinga yaampoka pwa hulile oombapila dhekonakono ndhoka dha yakwa osho wo kombinga yoomvula dhi li pokati kaHango nomulongwa, okutala kekwatathano lyawo lyopaihole osho wo okukala kutya oye na okanona ngashingeyi.
Okwiindile wo osikola yi patululile omufekelwa ngoka gomulumentu iipotha iyali, shimwe osheyako lyekonakono nokulipa omulongwa osho wo shokugandja etegelelo komunasikola.
*Edhina lyomulongwa itali vulu okutumbulwa molwashoka omushona.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
