Aafekelwa ya holoka mompangu kombinga yeyako lyoshimaliwa shombaanga

YA HOLOKA MOMPANGU … Methano ndika otamu monika aafekelwa yahamano mboka ya holoka mompangu yamangestrata gwaRundu, mEtitano. Ethano: Lya Gandjwa

Aafekelwa yahamano mboka taya tamanekelwa olunyala meyako lyoshimaliwa shomombaanga yoBank Windhoek, oya holoka mOmpangu yaMangestrata gwaRundu, mEtitano.

Ongundu yaafekelwa mboka oyi li oshitopolwa shoshimaliwa shoka sha yakwa komudhaninkandangala gwoshimbuluma shoka, Nico Rebebe (30), ngoka ha longele koshitayi shoBank Windhoek mOpuwo.

Aafekelwa mboka yahamano ya holoka mompangu yamangestra gwaRundu oyo Kamberuka Lucas (19), Lucas Shifwaku (oomvula inadhi tseyika), Mathias Mukuve (29), Lyinyando Kandjimi (29), Daniel Sumwa (23) osho wo Kanyanga Matthias (22).

Mangestrata Sonia Samupofu okwa lombwele aafekelwa mboka kutya oshipotha shawo otashi tuminwa kOpuwo hoka oko kwa patululilwa oshipotha shoka sheyako lyoshimaliwa shomombaanga.

Aafekelwa mboka yahamano oya tulwa miipandeko kopolisi moRundu, Etitatu lya zi ko sha landula omakonakono kombinga yeyako lyoshimaliwa shoka shomombaanga.

Aafekelwa mboka oya gwedha komwaalu gwaafekelwa yaali mboka ya tulwa miipandeko tango mOpuwo noya holoka mompangu yamangestrata gwaPuwo petameko lyoshiwike sha zi ko.

Omadhina gaafekelwa mboka yaali oyo Untag Kamati (34) naFenni Ankoshi (19) notaya tamanekelwa iipotha yuukengeleledhi nuufuthi.

Oshipotha shawo oshu undulilwa komasiku 11 Apilili omanga taku ningwa omakonakono ga gwedhwa po.

Komanda ta kwathele gwopolisi yaKavango Uuzilo, Eino Nambahu okwa lombwele onzonkundaneki ndjika kutya opolisi natango oya tula miipandeko omufekelwa omutimugoyi mEtine sho a adhika molukanda lwaKaisosi moRundu.

Kumwe aafekelwa ye li omugoyi oya kwatwa po mekwatathano neyako lyoshimaliwa shoka shombaanga notaku popiwa kutya ayehe oye li pokati komimvo 22 sigo 30.

Omudhaninkandangala Rebebe otaku hokololwa a li u uvanekele aafekelwa mboka kutya ote ya pe iilonga kofaalama nonkene naya patulule uumbo wombaanga noBank Windhoek hoka ta kala teya tumine oshimaliwa shoondjambi dhawo komwedhi.

Konima sho aafekelwa ya patulula uumbo wombaanga, Rebebe otaku hokololwa a kutha ko uuboba mboka nokwa ndjondjo oshimaliwa mombaanga moka ha longele ta tula kuumbo mboka.

Okwa gwedhapo kutya sigo oompaka oshimaliwa kumwe shoomiliyona N$2,1 osha monika nokugalulwa.

Omukwatakanithi gwomakonakono giimbuluma mopolisi yoshitopolwa shaKunene, omupevikomufala Paavo Iyambo okwa popi kutya uuyelele kombinga yoshimaliwa sha adhika naafekelwa owa gandjwa komupopiliko gwopolisi moshilongo, omupevikomufala Kauna Shikwambi.

“Otatu longo noshipotha oshinene nomakonakono oge li natango petameko lela. Itatu vulu okugandja kutya ingapi ya adhika nayo, molwashoka otatu longo nomakonakono goshimbuluma shongundu yaantu. Ngele otwa tseyitha oshimaliwa shoka, otashi piyaganeka omakonakono,” osho Iyambo a popi ngaaka. Rebebe onkene ta kongwa kopolisi.

“Mongashingeyi, oBank Windhoek oya tula po olupandu lwooN$20 000 kwaangoka ta ka gandja uuyelele tawu vulu okumangitha po Rebebe,” osho Shikwambi a popi ngaaka, mEtitatu.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!