Aafekelwa ya gwedhwa po ya tulwa miipandeko

Aafekelwa yahamano oya tulwa miipandeko kopolisi moRundu uunambo taya tamanekelwa olunyala meyako lyoshimaliwa shombaanga yoBank Windhoek shi li poomiliyona N$2 shoka kwa li sha kana omasiku ga zi ko.

Omwaalu gwaafekelwa mboka ogwa gwedha kaafekelwa yaali mboka ya tulwa miipandeko mekwatathano neyako ndyoka mOmaandaha, mOpuwo.

Aafekelwa mboka yaali oyo ya tulwa tango miipandeko moshitopolwa shaKunene noya holoka nale mOmpangu yaMangestrata gwaPuwo, mEtitatu ashike oya shunwa mondjeedhililo.

Omadhina gaafekelwa mboka yaali oyo Untag Kamati (34) naFenni Ankoshi (19) notaya tamanekelwa iipotha yuukengeleledhi nuufuthi.

Oshipotha shawo oshu undulilwa komasiku 11 Apilili omanga taku ningwa omakonakono ga gwedhwa po.

Omudhaninkandangala meyako lyoshimaliwa shoka, Nico Rebebe, osho wo omufekelwa gulwe onkene taya kongwa komiya dha shinana.

Otaku hokololwa kutya ompangela yeyako lyoshimaliwa shoka oye eta pu totwe uumbo wombaanga uhamano moRundu, hoka lwanima oko kwa tulwa oshimaliwa shoka kwa li tashi ndjondjwa kuRebebe mombaanga.

Otaku hokololwa kutya iimaliwa mbyoka yi li muumbo mboka wombaanga oya tuminwa mo komuniilonga gwomombaanga yoBank Windhoek, Rebebe, ngoka taku fekelwa oye omudhaninkandangala meyako lyoshimaliwa shoka shoomiliyona N$2, anuwa sha kuthwa koshitayi shombaanga mOpuwo, sha ningwa mOlyomakaya.

Komanda ta kwathele gwopolisi yaKavango Uuzilo, Eino Nambahu okwa lombwele onzonkundaneki ndjika uunambo kutya kumwe oshimaliwa shoomiliyona N$1,5 osha galulwa nosha adhika muumbo wombaanga waafekelwa yatatu, omanga oshimaliwa shoN$200 000 osha adhika muumbo wombaanga waafekelwa yalwe ishewe yatatu – aafekelwa mboka ayehe oya kwatelwa moRundu.

Pauyelele wa gandjwa kuNambahu, omufekelwa gwotango okwa tulwa miipandeko pethimbo a li ta kutha oshimaliwa she pokaATM.

Aafekelwa yalwe oya tulwa miipandeko pomahala ga yooloka momalukanda gaRundu.

Omudhaninkandangala Rebebe otaku hokololwa a dhenge mokatoo aafekelwa ya patulule uumbo wombaanga opo a vule okutula ko oshimaliwa shoka ta ndjondjo miilonga.

“Otaku hokololwa kutya Rebebe okwa yapukile aantu mboka yahamano, nokuya uvanekela iilonga kofaalama, nashimwe shomiipumbiwa, oye na okupatulula uumbo wombaanga noBank Windhoek, hoka taku kala haku pitile oondjambi dhawo komwedhi. Konima sho ya patulula uumbo, uuboba owa kuthwa po kuRebebe,” osho Nambahu a popi ngaaka.

Aafekelwa mboka yahamano otaku hokololwa ye li pokati komimvo 22 no30.

“Mongashingeyi, oBank Windhoek oya tula po olupandu lwooN$20 000 kwaangoka ta ka gandja uuyelele tawu vulu okumangitha po Rebebe,” osho omupopiliko gwopolisi moshilongo, omupevikomufala Kauna Shikwambi a popi ngaaka, uunmbo.

Tango sho onkundana ndjoka ya pitithwa mOsoondaha, opolisi oya popi kutya okwa ningwa onkambadhala yokuyakwa oshimaliwa shoomiliyona N$200 mombaanga sha ningwa mOlyomakaya, ashike lwanima omukuluntu gwombaanga yoBank Windhoek, Baronice Hans okwa popi kutya oshimaliwa sha kana oshi li kohi yoomiliyona N$2.

“Oshimaliwa shoka sha yakwa oshi na okukala shi li poomiliyona N$2, otatu pandula aaniilonga mboka ya katuka nondjungu osho wo omulandu gwomuule gwoBank Windhoek,” osho a popi ngaaka.