Aadhanitanga yaali ya hulitha sho ya dhengwa kolwaadhi

Aadhanitanga yaali mboka haya dhana moliha ontiyali nontitatu moshitopolwa shaKavango Uuzilo oya mana oondjenda omanga yalwe yaheyali oya taambelwa moombete sho taku hokololwa ya dhengwa kolwaadhi pethimbo lyuudhano momukunda Kamutjonga moshikandjohogololo shaMukwe, mEtitatu.

Omukwatakanithi gomakonakono giimbuluma mopolisi yaKavango Uuzilo, omupevikomufala Bonifatius Kanyetu okwa koleke oshiningwanima shoka.

“Otaku hokololwa kutya aamati mboka yaali okwa li taya dhana nayakwawo sho ya dhengwa kolwaadhi pokapale kedhina Young Elephantss momukunda Kamutjonga, momudhingoloko gwaDivundu,” osho Kanyetu a popi ngaaka.

Oonakusa oya hololwa kutya oyo omukwati gwosipana yo-Young Elephants, Muharukwe Thikuko (19), osho wo omudhani gwopokati gwosipana yedhina Young Academy, Dennis Muthitu (17).

Mumwayina gwaThikuko, Petronela Nduva okwa hokolola kutya okwa li taku lokwa pethimbo ya kwatwa kolwaadhi ndoka.

Okwa popi kutya aadhani kaya li nande mokapale taya dhana pethimbo lyoshiningwanima, ashike okwa li taya opaleke nokulongekidha okapale opo ye ka longekidhile muudhano mboka kwa li wu na okudhanwa mOlyomakaya ya zi ko.

“Okwa li taku lokwa kashona, ohakula oya dhengwa kolwaadhi,” osho a popi ngaaka.

Aadhani yalwe mboka ya gumwa kolwaadhi oya falwa mbala koshipangelo shaAndara, nomadhina gawo oyo Andreas Dinyando (17), Mukoya Patrick Makoya (23), Muhero Gotfried (17), Christoph Muyambo (17), Mayira Reino (17) osho wo Jonas Mbangu (17).

Omudheuli gwosipanda yo-Young Elephants, Mukuve Thapa, okwa popi kutya onkunda ndjoka oye ya halutha nokwe yi tseyithilwa pethimbo a adhika u uka kokapale hoka a ka dheula aadhani yosipana ye.

“Aadhani ayehe yalwe oya pumbwa okupewa ehungomwenyo molwashoka oya gumwa nayi koshiningwanima shoka.

Mongashingeyi, onda tega aavali yaanona yi indike aanona kaaya dhane we uudhano wetanga. Oshiningwanima shoka osha thiga omwaka mosipana, molwashoka Muharukwe okwa li omudhani ta monika e na onakuyiwa ombwanawa yuukwatitanga,” osho Thapa a popi ngaaka.