A pya komundilo wohasa eshi ya topa ndee ta kanifa oilonga

Martin Gebhard (24) oku li monghalo ya naipala konima eshi a pya komundilo wa etwa kohasa oyo kwa liya topa koilonga yaye.

Gebhard okwa ti vali omuhona waye okwe mu ekelashi konima yoshiponga.

Oshiponga eshi osha ningwa kofaalama koDordabis oko kwa li ha longo petame ko laNovemba odula ya dja ko, osho a ti ngaho.

Oshiponga eshi oshe mu fiya ita dulu vali okulonga shaashi olutu neenyala daye oda lemana, osho a weda po ngaho.

“Okwa li handi longele ehango lokulonga ominino olo nda tameka okulilongela momudo 2017 fiyo efiku loshiponga sha ningwa momafiku 02 Novemba 2023. Okwa li opo16h00 eshi kwa li nda ya kotenda oko hatu tula oilongifo yetu, omo mwa kwatelwa omandini omahooli. Monhele omo omo ngaa natango ovanailonga hava telekele oikulya yavo. Eshi nda ya motenda mbela opu na umwe kwa li a tema ohasa ndee ta fiye okambiya ke li kohasa. Onda enghena popepi ka shona eshi nda mona kutya omandini omahooli ee li popepi nohasa, ashike manga inandi fika po ohasa oya topa ndee handi i koshi yomundilo,” Gebhard osho a ti ngaho.

“Okwa li nda pya nai okudja komutwe fiyo okeemadi ashike kakwa li pu na omeva okutila nge pefimbo lokudima omundilo, onghee nee omundilo owa andjakana nolutu lange alishe.”

Gebhard okwa ti okwa i a twalwa koshipangelo sha Katutura kOvenduka notuwa yopaumwene shaashi kakwa li pu na ambulasa.

“Onda kala omutumba motuwa yobaki nda tulwa ekumbafa la tuta. Oshipa shange okwa li tashi di ko. Okwa li ndi udite nda fa ndi li moheli,” Osho ta dimbuluka ngaho.

Gebhard okwa ti okwa ningwa nai komuhona waye shaashi okwaanya okumufuta nokufuta ngaa nande ouhaku waye.

Gebhard okwa ti omuhona okwa ti nande oshiponga osha ningilwa mofaalama yaye osha ningwa konima keshe umwe kwa li a dimbuka.

Natango, okwa ti vali omuhona waye okwa li ta dengelwa koondokotola ashike ina kufa po nande eengodi davo.

“Omuhona wange Cobus Swart okwaanya okuyandja kosha kepango lange. Okwa li pu na nefimbo kwa li puhe na omiti. Kakwa li va li hatu dulu okudilanda ndee mumwamemekadona tai a ka pule oimaliwa moshiwana,” Osho a ti ngaho.

Gebhard oo a ninga eemwedi di dule punhatu moshipangelo okwa ti okwa hala ashike ehangano li mu fute.

“Paife onda ninga oshingudu, eenyala dange inadi ukilila vali, ame noho okwa tiwa itandi dulu vali okulonga. Paife eshi osha etela nge oupyakadi womadilaadilo.”

Mumwainakadona waGebhard, Helena Amagulu, oye a kala te mu file oshisho okudja ngaa poshiponga.

“Onda dengelwa ongodi okudja koshipangelo tai lombwele nge eshi sha ningilwa mumwameme. Eshi nde mu mona, kakwa li nda teelela eshi nda mona. Okwa li ndi shi okwa pya ashike ka shona. Eshi nda fika ekumbafa olo kwa li le mu tuvika ola wa ko kuye. Okwa li nda teka omutima eshi nda mona onghalo omo e li. Okwa li natango nda uda nai neenghono,” Osho a ti ngaho.

“Kakwa li tu na elineekelo kutya ota kala nawa, ashike kefilonghenda laKalunga, okwa xupa. Otwa hala ashike ehangano li ninge osho shi li mondjila ndee tali futu mumwameme,” Osho a weda po ngaho.

Swart eshi a dengelwa petameko loshivike eshi koThe Namibian, mwene wehangano loKairo’s Plumbing, okwa ti oshiponga shaGebhard osha etwa kokuhenako nasha kwayemwene.

Okwa ti vali ehangano loSocial Security nali mu file oshisho.

“Ondi shi shi kutya omulumenhu ou okwa li ta longele ehangano lange ashike oshiponga osha ningwa konima yeevili doilonga. Okwa kufa endini leelita 25 lomahooli ndee tai a ka teme omundilo pondje. Okwe li ningila omahooli ndee ta pi. Ngeno okwa li oshiponga eshi sha ningwa pefimbo loilonga, ngeno opo ashike handi dulu okumufuta,” Swart osho a ti ngaho.