A ponokelwa konghoshi

Ngaashi naana ovanhu vahapu komukunda wedina Chefuzwe, Likando Mambena (44) naye okwa li a hala okutala nawa eenghoshi odo kwa li ta di shikulwa kovanambelewa veameno loushitwe moshitopolwa shavo.

Okwe va shikula e li kokule navo ashike kakwa li nande a dilaadila kutya ota dulu okuponokelwa.

Ovanambelewa vouministili womidingonoko, omifitu nomatalelepo ova kala tava shikula eenghoshi mbali odo da kala ta di tilifa ovakwashiwana moshitopolwa shaKatima Mulilo okudja oshivike sha dja ko.

Eenghoshi odo tadi feekelwa kutya oda dja monhele yoinamwenyo yedina Chobe National Park koBotswana, okwa li da monika peenhele da yooloka.

Omanga inadi ponokela Mambena mOmaandaxa, eenghoshi edi mbali oda dipaya oimuna ihapu.

Mambena eshi a popya noThe Namibian e li moshipangelo shaKatima Mulilo Etivali, okwa li a loloka ndee ta kendabala a shune komukunda wavo lwopo12h30 shaashi eenghoshi natango kakwa li da monika.

Eshi a dja po povanambelewa veameno loushitwe novanhu vamwe vali ovo kwa li tava kongo eenghoshi edi, okwa ti okwa uda onghoshi ta yoono.

“Ponhele okwa li pe yadi oixwa ndee onghoshi kakwa li nande ndi i wete. Onde i uda ashike ta yoono konima yange, ashike mepakumo ashike leisho okwa li nale i li kombuda yange, ndee tai lumata onyala yange. “Onda tokola opo ndi ha faduke po ile ndi keyuke, shaashi ngeno oya monifa nge oshiponga neenghono.

“Eshi nda ninga, onda lombwela ashike ovanambelewa opo ve i yashe. Elao linene, okwa li va endelela opo va nyamukule, ndee tava yashe onghoshi omanga ya ponokela nge. Kakwa li lela ndi udite po sha eshi kwa li ya ponokela nge, onda ka mona ashike konima kutya oya monifa nge oshiponga shaashi ohonde okwa li tai tondoka.

“Oya ehameka natango etundji lange lokolulyo nomakasha ayo. Ohandi pandula Kalunga lela shaashi okwa li ashike ya fiya ya lemaneka okaoko kange,” Osho a ti ngaho.

Mambena okwa ti ke na oweehame uhapu, nande okwa tuminwa koshipangelo kOvenduka opo a ka mone epango.

“Onde lineekela ohandi ka veluka diva shaashi odi na ofamili da pumbwa okwiifila oshisho unene ngaa ovamati vange vavali,” Osho a ti ngaho.

Omupopiliko wouministili womidingonoko, omifitu nomatalelepo, Romeo Muyunda, Etitatu okwa ti eenghoshi edi mbali okwa li da monika tete koshitopolwa shedina Sikanjabuka oshivike sha dja ko, ndee ovanambelewa veameno loushitwe tava tameke okudi shikula.

Kwa ti eshi oshe va twala fiyo okoshitopolwa shaChefuzwe oko Mambena kwa li a ponokelwa.

“Onghoshi ei yonghadi oya faduka po omanga kwa li ovanambelewa tava yashe ei yondume opo va xupife , ashike natango inai monika. Otwa di paya oyo yondume shaashi okwa li tai eta oupyakadi koimuna, ngaashi omhilandu detu tadi ti.

“Otwe lipyakidila natango hatu kongo ei yonghadi, otwa hala tu i kwate nomwenyo opo tu i twale konhele yomatalelepo imwe moshitopolwahoololo,” Osho a ti ngaho.