OKAKOMISI kokulwitha iimbuluma (ACC) oka kwata po aaAngola 16 naaNamibia yaali sho ya kengelele epangelo li ya shunithile oshipambu shoompele, uulingilingi mboka wa pula epangelo oomiliyona odhindji.
Omukuluntuwiliki gwo-ACC Paulus Noa okwa koleke oshiningwa shika.
Nando Noa ina yelitha kondandalunde kutya oshimaliwa sha yugwa epangelo mekengelelo ndika oshithike peni, opolisi oya kundaneke aafekelwa tashi vulika ya yuga uuministeli wiimaliwa oomiliyona N$114 lwaampoka.
Okwa gwedha po ta ti aakonenenwa oye li mondjedhililo ya tegelela iihokolola omasiku ngaka.
Aafekelwa oya mangelwa pombelewa yokufutila oompale popepi nosikola yopaumwene yoDeutshe Hohere moWindhoek, ya adhika ya hala okupula ya galulilwe oshipambu shiifendela yawo.
“Molwaashoka omakonaakono otaga tsikile, kwa tegelelwa ku ka tulwe miipandeko aantu oyendji,” Noa ta ti, ta gwedha po kutya oya thaneka okumanga po aaNamibia oyendji mboka taya yambidhidha aakwashigwana yaAngola mokulonga iimbuluma mbika ya longekidhwa.
Oshikonga shoka sha manggitha po aakonenenwa mEtiyali osha landula eindilo lyuuministeli wemona ku konaakonwe iipotha yekengelelo kombelewa yiifendela yepangelo, moka aantu haya nyolulula uumbaapila hawu gandjwa pethimbo lyokufendela opo ya pewe ko oshimaliwa kiifendela mbyoka ya futa.
Gumwe gwomaapolisi okwe tu kundaneke kutya gumwe gwomaaNamibia mboka ya tulwa miipandeko omunongeki koUniversity yaNamibia yuungomba nuunongononi, ha longo moshikondo shuundjolowele.
Pahokololo lyomupolisi nguka, miitili oye a li ha kwathele aakwashigwana yaAngola mokulonga uulingilingi mbuka.
Omuniilonga kendiki lyiifendela oye a mangitha po aaAngola, e ya ithana ya ka tale ko oshimaliwa shawo pethimbo ta longele kumwe naanambelewa yo-ACC, noya mangwa po ethimbo ndyoka.
Omulongi koshiputudhilo shopombanda okwa mangelwa moshiputudhilo lwopethimbo mpoka yakwawo ya mangwa po.
Otwa kundanekwa kutya okakomisi kekondjitho lyiimbuluma oka tameke nomakonaakono gaafekelwa omumvo nguka.
Oshifo shika inashi vula koleka oolopota kutya yatatu yomaaAngola mboka ya mangwa po aakiintu. Inatu vula wo okukoleka shoka sha popiwa kumboka ya li po kutya nakuadhika naafekelwa okwa mangululwa ongulohi yEtiyali.
