Venaani a talela po ofikola mOshikoto

OMUWILIKI wongudu yomhilameno yopambelelwa, PDM (ya li nale DTA), McHenry Venaani, oshivike eshi okwa talela po osekundofikola Emanya moshikandjohoololo Onyaanya moshitukulwa shaShikoto opo a tale nokutya enongelo olo la dopifile ovalihongi valo aveshe vondodo onhi-12 momakonaakono oudwaali, oli li naanaa monghalo ya tya ngahelipi.

Omukulunhufikola Malakia Iileka okwa ti Venaani okwa endaenda mofikola ta tale kutya omatungo noikwa-noipangifo ikwao oi li monghalo ya tya ngahelipi.

Okwa ya meenghundafanana novahongi noilyo yelelo-nongelo moipafi yomuwiliki wehongo moshitukulwa, Lamek Kafidi.

Venaani okwa popya ta ti etalelepo laye olopambelewa, a hala okutala onghalo menonhgelo ye a ka yandje ehokololo kopaliamente, oyo i li oshitai shepangelo shokutota eemhango.

Okwa pewa ouyelele kombinga yeemhumbwe nomashongo mosekundofikola Emanya.

Iileka okwa ti ofikola oya pumbwa omunghandjo wolela shaashi momunghandjo ou wa tungwa kovadali itamu wana ounona aveshe.

Osekundofikola Emanya oi na ovanafikola 375, ovahongifikola 19, hamushanga umwe novawapaleki 2.

Kombinga yedopo lounona aveshe 71 vondodo onhi-12 oudwaali, Iileka okwa ti ounona ova dopa ashike unene oshilongwa shimwe, hano Oshiingilisha, ashike ofikola inaishi endifa unene nai ngaashi tashi popiwa.

“Moilongwa ikwao aishe ofikola yetu oyeshi endifa nawa, ovanafikola vondodo onhi-12 ova dopa ashike Oshiinglisha, ashike onghalo ya tya ngaha otwei wapaleka nohatu longo lela noudiinini opo ounona vetu aveshe neudo va pite nawa,” osho Iileka a popya ngaho.

Iileka okwa popya yo ta ti, ofikola nale oya li o-Combined School naashi nee ya ndjekwa po i ninge osekundofikola oudwaali, oya tambula ashike unene ovanafikola vondodo onhi-12 ava inava dula okutambulwa keefikola dikwao molwaashi oitwa yavo kai li naanaa nawa.

Manga etalelepo laVenaani inali ningwa, moshiwana omwa li tamu linyenge ouyelele tau ti omuwiliki woPDM ote uya okupopifa ovanafikola opo e va twe omukumo ve lihonge noudiinini.

Ouyelele wa tya ngaha owa li wa limbililika unene tuu ovawiliki novayambididi vongudu omhangeli, Swapo, ve udite nokutya omuwiliki womhilameno ite uya shili okutwa ovanafikola omukumo ndee ota ende te likongelele eyambidido pamukalo woineya.

Opa li nokuli pa longekidwa oshoongalele shovadali shomeulumomhumbwe, sha ingidwa kuKansela waNyaanya Petrus Kambala moRadio NBC ongulainene yOmaandaha.

Eshi a pulwa, Kambala okwa lombwela ta ti, ovadali ova ongala opo va topolelafane omaliudo kombinga yetalelepo laVenaani mosekundofikola Emanya.

Kambala okwa ti etalelepo laVenaani inali enda pamukalo wa ufwa shaashi inali shiivifilwa eembelela depangelo ngaashi ombelewa yoshikandjohoololo nombelewa yaNgoloneya, ashike omuwiliki wehongo moshitukulwa shaShikoto, Lamek Kafidi, okwa lombwela ta ti ombelewa yaye oya shiivifilwa pambapila.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.