Uukongo waali paveta woondjambameya moZambezi

UUMINISTILI wOmidhingoloko, Omakuti nOmatalelopo owa tameke omakonakono ge na sha noshiningwanima shuukongo woondjambameya mbali ndhoka kwa ndhindhilikwa dhi itsuwika dha sa miiningwanima iyali ya yooloka numvo momudhingoloko gwaMukako moshitopolwa shaZambezi.

Moshiningwanima oshitalala, ondjambameya oyi itsuwika mOsoondaha kaakwashigwana, mboka lwanima ya tseyithile uuministili.

Omupopiliko guuministili womidhingoloko, Romeo Muyunda, ohela, okwa popi kutya ondjambameya ndjoka oya adhika ya sa noyi na oshilalo tashi ulike kutya oya yahwa notaku fekelwa kutya oya yahwa ongulohi yOlyomakaya.

Okwa popi kutya shoka oshikando oshitiyali momudhingoloko gwaMukako tamu adhika ondjambameya ya sa numvo, nondjambameya yotango okwa li yi itsuwika omwedhi gwa zi ko. “Otatu kondema lela uukongo mboka molwashoka otawu tidha aatelelipo mboka ye na ohokwe yokutalela po momudhingoloko ishewe otashi yono wo onkalo yopaushitwe,” osho a popi ngaaka.

Oondjambameya odha konekwa dha simana molwashoka ohadhi lemene pevi iihwa mbyoka yi li popepi nomulonga, nonkalo ndjoka ohayi kwathele aantu opo ya vule okuthika pomulonga osho wo pomahala galwe ngoka ge li popepi nomulonga.

“Oondjambameya ohadhi kwathele aakalimo, nopethimbo lyo opala nopaindilo lyomukunda, ohaya vulu okupewa onyama tashi ningwa okupitila pamilandu dhomondjila,” osho omupopiliko a popi ngaaka.

Muyunda okwa popi kutya onyama yondjambameya ndjoka oya topolelwa po aakwashigwana yaayeelele yomuhoko gwaKhwe peha lyaakwashigwana yomoMukako, opo owala ku shilipalekwe kutya inashi hwahwameka aakalimo ya kale taya dhipaga oondjambameya.

“Ngele owa gandja onyama, nena owa fa to hwahwameke aakwashigwana [yomomudhingoloko ngoka] ya kale taya yaha oondjambameya uuna ya hala onyama, naashoka itashi kwatele po sha,” osho a popi ngaaka.

Amushanga gwelelo lyopamuthigululwakalo Charles Simasiku okwi indile mboka ye na oshinakugwanithwa ya longe neitulemo opo ya tule miipandeko mboka taya dhipaga oondjambameya moshitopolwa.

“Tse, ongelelo lyomukunda gwaMuyako itatu popile onkalo ndjoka yokuya oveta pambambo. Natango, natu kaleni tuli ohanda kombinga yomaipumomumwe giinamwenyo naantu molwashoka iilongomwa yomomapya yaakwashigwana otayi yonagulwa po koondjambameya,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.