Ongudu yoIndependent Patriots for Change (IPC) oya tula pedu oshilyo shayo shipe Kefas Vernandu eshi vati a hala okweeta oita moshilongo.
Ongudu oya ti oukilipa vaVernandu, ovo kwa li tava endaenda nomalungula, okwa li va talika ko kutya otava popi kombinga yaasho ongudu ya hala okuninga.
Ongudu yoIPC oya shiivifa etulopedu laVernandu Oshoondaxa.
Omukanda waye wetulopedu owa ti, Vernandu okwa li a shike oshilyo shongudu oule womafiku ahetatu omanga ina tulwa pedu.
“Oto pulwa opo u xulife po omakwatafano aeshe e na sha nongudu ndee to xulifa po okukalela po ongudu mukeshe shimwe,” Omukanda osho wa ti ngaho.
Ongudu okwa li ya teelela enyamukulo okudja kuVernandu onghela, tali hokolola kutya oshike oukwashilyo waye inau pumbwa okweekelwashi filufilu.
Mokakilipa kamwe, Vernandu okwa pula vati ngee oIPC otai dulu okuyandja omaano, mwa kwatelwa oilwifo, opo va kufe ko epangelo koshipundi.
“Ovanyasha voIPC otava dulu okupewa omaano oilwifo ndee tava kufa ko epangelo. Ohatu i moixwa ngaashi Toivo [Andimba Toivo yaToivo], Nehale lyaMpingana naHendrik Witbooi ndee hatu kufa ko oshilongo kovatilyane ovo va hondama moSwapo,” Osho a ti ngaho.
“Ohatu monifwa oixuna kovanhu ovo vehe shi ovakwashiwana voshilongo shetu. Otu li moshilongo shetu, ashike ohatu monifwa oixuna,” Osho a ti ngaho.
Vernandu natango okwa ningila oSwapo omatilifo oimbuluma ngee emono loixuna ola twikile.
“Ohatu dulu okumona oilwifo nomukalo naana ou twa mona oyeendifo. Omukalo ou Tate Bango [Iitula] a mona oyeendifo oo naana omukalo hatu longifa opo tu mone oilwifo ndee hatu mangulula oshilongo shetu,” Osho a ti ngaho.
Vernandu vati okwa ti ongudu otai mono oilwifo okudja koRussia nokoNorth Korea opo i kufe ko oshilongo koSwapo.
Okwa ti ongudu pamwe naye oya loloka noye lilongekida okukufa oilwifo.
Vernandu okwa ti odjo oyo ya yandja oyeendifo kongudu oi na noilwifo, mwa kwatelwa eendjebo da kula needila odo da pumbiwa okulwifa Swapo.
“Tu peni oshilongo shetu nafye tu lye ngaashi nyee mwa lya,” Osho a pula ngaho.
Vernandu eshi kwa li a dengelwa Omandaaxa okwa koleka kutya oye a kwata oukilipa, ashike okwa li e wete taamene ongudu.
“Okwa li ndi shi ohandi popile ongudu, ashike okwa li handi ningi oshinima sha puka. Omapopyo ange inaa handula ashike ongudu, ashike oshilongo ashishe,” Osho a ti ngaho.
Vernandu okwa lombwela oThe Namibian kutya okwa shangela ongudu omukanda omo a ningulula omapopyo aye.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
