Tu toteni ehangano lyiiputudhilo yo paumwene

OMUKULUNTU gwOkolligi yopaumwene yedhina Community Development for Leadership (CDL-College) tayi adhika lwopo Aiho poAnamulenge moshitopolwa sha Musati, Polycarp Ameya ota ti kutya osha pumbiwa noonkondo pu totwe ehangano lyoonakweetapo iiputudhilo yopaumwene moshilongo opo ya kale tayi igamene kokuliwa iipungo, okuyakulwa shaa li pauyuki, okuthiminikilwa kongudhi nokuningilwa omatilitho uuna ya hala okutota po iiputudhilo yawo yopaumwene.

Ameya ota ti kutya okwa uvithwa nayi kiikondo yepangelo yimwe mbyoka yi na okwi itaala ko iilongwa nOoprograma dhiiputudhilo yopaumwene, sho ya tinda okutaamba ko iilongwa yomaithano gamwe, ngashi mbyoka yomalusheno, uupangi noshowo uhumithokomeho lyUunamapya posikola yawo CDL-College popepi na Anamulenge nOutapi mOmbalantu mOmusati moka. Ameya ota gandja uusama kiikondo mbika kutya aawiliki yawo mokukala ya hala kehe ngoka to toto po oshiputudhilo shoye shopaumwene, wu kale wa egamena kiiputudhilo ya totwa po kaakwiilongo, kashi li mondjila notashi shunitha monima omadhilaadhilo omawanawa gaaNamibia yolela mboka ye hole oshigwana noya hala oku shi tunga po kuyo yene pwaa na omakwathelo okuza pondje. Ano ya ulike kutya nayo otaya vulu okweeta po sha shomupondo noshi na oshilonga koshigwana nokoshilongo shawo Namibia.Ameya ota ti ngele osho tashi yi ngeyi, kwi ikwatelelwa ashike kwaamboka ya etwa po kaazaizai, oyo ya talika yi na oshilonga nongushu shi vulithe mbyoka tayi etwa po kaaNamibia yoyene, nena uukoloni onkee ngaa tau tsikile moshigwana sha Namibia. Ameya ota ti kutya okwa uvithwa nayi noku li ta uvithwa nayi kuyamwe yomaanambelewa aakuluntu mepangelo, mboka oyo ye na oku hwahwameka eithikamenopo ndele inaya hala oku shi ninga notaya tsu omukumo ku igamekwe aluhe kwaambyoka tayi etwa po okuza pondje nenge kwaamboka ye na oshimaliwa. ‘Uunake nee aaNamibia taya ka kala nayo yi itunga po pashimaliwa ngele oompito dhokumona oshimaliwa nokwiihumitha komeho paendondo dhi ili nodhi ili otaye dhi fukwa? Ameya okwa hala okuuva, nokwa tsikile ko nee ta ti kutya ekandulopo lyuupyakadhi mwaashika osho ashike okutota po ehangano enene nolya kola lyaavalelwamo mboka ya tota po nale naamboka ya hala okutota po iiputudhilo yopaumwene moNamibia. Ameya ta ti ngele inashi ningwa nena aaNnamibia mboka ye na ehalo ndika, otaye kiiyadha yaa na sho taya vulu okuninga po nomadhilaadhilo gawo omawanawa taga lyatelwa pevi nokukana po ngawo. Ameya ota indile nee kwaayehe mboka ya holola po nale iiputudhilo yopaumwene naamboka ya hala oku yi tota po, ya hangane medhilaadhilo ndika, a eta po lyokutota po ehangano lyaaetipo yiiputudhilo yopaumwene meendelelo ngashi tashi vulika opo yi ikuthe kohulo yegonga.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.