Swapo u ulike omuhogololwa

OSHIGONGI shaawiliki yoSwapo, ya za kiitayi yi ili noyi ili moshikandjo shaNyaanya moshitopolwa shaShikoto, osha hogolola omugundjuka Petrus Kambala oye a kale omuhogololwa gwongundu yoSwapo momahogololo ngoka taga ka ningwa moshikandjohogololo shaNyaanya meti 9 Juli 2015.

Omohogololo o ge na sha nokuhogolola kaansela omupe pehala lyakaansela omukulu gwoshikandjohogololo shoka tate Henock Kankoshi, ngoka u ulikwa komupresidente Hage Geingob a ninge ngavena gwoshitopowla shaShikoto pehala lyangavena omukulu gwaShikoto tate Penda yaNdakolo, ngoka u uliklwa komupresidente Geingob a ninge oministeli yegameno kuyele nuumvo.

Oshigongi shika, sha li mewiliko lyomuhwahwameki gwoSwapo moshikandjo shaNayena, tate David Quito Mulunga, osha ningilwe nee mOmaandaha geti 25 Meyi 2015, mesiku lyokudhimbulukwa uukumwe waAfrica, sha ningilwa pombelewa yoSwapo yopashikandjo pOnyaanya.

Momahogololo ngoka, Kambala, ngoka a kala omuunganeki gwoswapo moshikandjo shaNyaanya, okwa li mo na meme Natalia Shikongo, Sacky Alugodhi naGideon Shikomba. Job Immanuel, Mathew Hango nosho wo meme Sophia Kalume nayo omo ya li petamekolela, ashike oya ka gwa mo nopwa kala ashike mboka yane, mboka nee ya tumwa kewilikongundu loOpombandambanda lyoSwapo kOvenduka, hoka nee ya ziminwa ya ye momahogololo ngoka gOmaandaha geti 25 Mei 2015, moka mwa hogololwa Kambala nomake ogendji oye a ka thikame momahogololo guukansela mOnyaanya.

Sigo oompaka, Swapo oye ashike a tula mo omuhogololwa gwe, Kambala.

Oongundu oonkwawo sigo Omaandaha kapu na yimwe ya tula po omuhogololwa gwayo momahogololo.

Ngavena Kankoshi, ngoka wo a li a kwathele mewiliko lyomahogololo ngoka, okwa ti oongundu dhopolotika ndhoka inaadhi tula mo natango aahogololwa yadho, odhi na ompito yoku shi ninga omanga otundi ontimulongonayimwe (11H00) yomEtitano lyeti 29 Meyi 2015, inayi dhenga.

Taye ke ya gandje kaanambelewa yokomisi yomahogololo moNamibia pombelewa yakaansela gwaNyaanya pOnyaanya.

Yo nayo yoSwapo, tate Kankoshi ta ti, mesiku olyo tuu ndyoka lyeti 29 Meyi 2015, omo tayi ku ulika omuhogololwa gwawo Petrus Kambala kokommissi yomahogololo yaNamibia. Tate Kankoshi ta gwedha po ta ti ngoka a hala okukathikama kuye mwene momahogololo moka ongomuhogololwa e li kuye mwene, okwa li e na okushininga meti 26 Meyi 2015, omanga otundi ontimulongonayimwe (11H00) inayi dhenga, pombelewa yaKaansela pOnyaanya tuu mpoka.

Momahogololo goSwapo mOmaandaha ngoka ga zi ko moka mwa li aahogololi omilongohetatu nayahetatu lwaampoka, Kambala okwa zi mo nomake omilongone nagatatu (43), a landulwa ku Gideon Shikomba ngoka a zi mo nomake omilongombali nagatatu (23). Sakaria Alugodhi ta zimo nomake omilongombali (20) ye meme Natalia Shikongo ta zi mo neke limwe (1). Tate Mulunga ayehe nangavena Kankoshi oya ti omahogololo oge enda palandulathano, paushili nopauyuuki lela, nokapu na ngoka e ga pataneke. Taya ti kutya ngele inapu holoka ongundu yimwe yopolotika ye eta po omuhogololwa gwawo nenge inapu holoka ngoka a hala okukathikama kuye mwene, nena osha yela kutya okommissi yomahogololo moNamibia mEtitano ndyoka lyeti 29 Meyi 2015, otayi ka hokolola omuhogololwa gwoSwapo, tate Petrus Kambala oye a hogololwa nota ningi kaansela omupe gwoshikandjohogololo shaNyaanya, pehala lya tate Henock. Kambala okwa ti ngele okwa hogololwa, otaka yakula oshigwana shomoshikandjohogololo shaNyaanya nawa, ngashi ngaa a kala nale te shi yakula sho a kala omuunganeki gwoSwapo moshikandjo shika nokutsikila nooprojeka ndhoka dha tulwa po ku Kaansela omukulu gwoshikandjohogololo shika tate Kankoshi, ndhoka ye naye ya kala taye dhi kwatele komeho.

Kambala ta indile nee koshigwana ashihe shomoshikandjohogololo shaNyaanya shi kale kumwe ngashi sha kala mewiliko lyatate Kankoshi noshi longele kumwe naye meyambulopo lyoshikandjohogololo shawo shika.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.