Swapo oku shi okwiidhidhimika: Geingob ta ti

SWAPO kumwe nAaleli ye na pandulwe nokusimanekwa molwashoka okwa eta emanguluko, ombili, engungumano nedhiminathanepo moshilongo sha li sha kolonyekwa nayi, sha topagulwa kOmukolonyeki nosha li shuudha uukwamuhokoi, Omupresidende gwOpevi gwoSwap,Hage Geingob – ngoka wo e li oministeli yiipindi nIikwafaabulika ta ti ngawo pethimbo ta popitha oshigongi oshinene shAakwaSwapo pOnethindi mOlyomakaya ga zi ko.

Geingob, ngoka tango a tameke noshipopiwa she ta pandula Omushiti Omukombandambanda, ta ti ota pandula wo Aanapolotika yOswapo, ngashi OoSam Nujoma mboka nayakwawo noshowo Oongeleka ndhoka dha kondja okuhanganitha oshigwana sha Namibia nokuthika mpoka shi li nena shi na ombili, uumkumwe notashi lumbu mombepo yedhiminathanepo. Ashike Geingob okwa ti okuuvitithwe nayi kAanamibia yamwe inaya hala ombili ndjoka ya etwa po koSwapo. Taya uhala ngaa taye yi nyonyodhola nokutya Oswapo oya kanitha ondjila na inayi hala okwiidhidhimikila onkalo yUudemokoli. ‘Swapo ongundu ndjoka yi shi kwiidhidhimika nokudhiminapo, oshoka oyi na iilyo yawo kumwe naawiliki yayo, ya monithwa iihuna kwali kOmukolonyeki. Ya dhengwa, ya dhipagwa, ya fikwa nomalusheno, ngashi Ooministeli Jerry Ekandjo mboka, ashike nande ongawo, Oswapo oyi idhidhimikila iinima ayihe mbyoka nokudhiminapo. Oya hala ano Swapo yi kale ngiini? Tala wo kutya Omupresidende omukulu Sam Nujoma, sho a zi koshipundi nokwa yi omusamane Hifikepunye Pohamba, osha ningwa pamukalo gwoshikuluntu, gweuvathano, gweidhidhimikilathano. Oshinima shoka ito adha miilongo oyindji mo Africa. Hashi kala nokuli nonande kwaq ningwa ehogololo, nakudhengwa mo ke shi itaala. Oha eta mo omatompelo gokutya omahogololo inaga enda nawa. Kaga li ga manguluka, na kaga li pauyuki. Shoka moNamibia hasho. Swapo ngoka tav lele oshilongo shika oku shi okwiidhidhimikila onkalo noha longo Paudemokoli, mboka wo yamwe ya hala kutya Swapo ke wu shi,’ Geingob ta ti ngawo nokwiindila koshigwana sha Namibia kaashi yone ombili, engungumano nombepo yedhiminathanepo ndjoka yi li po pethimbo ndika. Okwa indile koshigwana shi ka hogolole nawa momahogololo gOpaupresidende nogOshigongi shOpashigwana ngoka taga ka kala ko mu Novemba omvula ndjika oshilongo ashihe, ano shi ka hogolole Swapo ya Namibia, Omupresidende gwOswapo noshowo iilyo yOshigongi shOpashigwana yongundu yoSwapo. ‘Ka hogololeni ongundu yeni yOswapo ndjoka ye mu lela nawa nombili uule woomvula omilongombali dha pita. Tamu yi pe natango oonkondo nuuthemba woku mu lela methimbo twa thinda mo,’ Geingob ta ti ngawo.’Mboka haya ti kutya Swapo ngele ota ti, shigwana ka hogolole Swapo noku mu pa omawi Ooperesenda ethele nenge shi vule po, aniwa ke shi Omwiidhidhimiki, oya hala okutya shike? Taya ti wo kutya sho ta zala omizalo dhe okwa hala okutilitha aantu. Okutilitha oolye. Ngoka ina hala Swapo a popye kutya oshigwana nashi ke mu hogolole nomake ge vulithe pooperesenda ethele nenge na zale omalwaala ge, naya tale sho taya ningi. Tseni tuyeni komeho nomalalakano getu. Natu ke ya talitheni puuketha womahogololo pehulilo mlyomvula ndjika. Oya tameka nale okulila nokulila oondila dhuunona, dhomahoya, ya hala ya ka ete po iinima oyindji opo aniwa kukatiwe kutya omahogololo kaga li ga manguluka na inaga enda pauyuki. Ya tameka nale okutya aniwa otaku ningwa iikonga yOmahogololo niimaliwa yoonakufuta Iifendela. Kandi shi kutya Oopapeta dha Afrika odhi li ngiini, shampa ashike omuntu a kana momahogololo ye ota ti kutya kaga li ga manguluka na kaga li pauyuki aniwa. Oshike shoka naanaa ano? Omundohotola Geingob a hala okushiwana nota lombwele nokugwedha ko ta lombwele Oshigwana shOswapo mpoka ta ti; ‘Ya etheni kaye shi sho taya ningi. Tatu ke ya ulikileni shito kuuketha womahogololo pehulilo lyomvula ndjika,’ Geingob ta ti ngawo nokwiindila kAakwaswapo yi ishangithe uukalata womahogololo, unene tuu mboka opo ya gwanitha oomvula omulongonahetatu.Geingob ta ti kutya Epangelo lyoSwapo olya hala okulonga neitulomo, li kuthe po iiyimbi mondjila yehumokomeho, ashike onkee li liwe mondjila kiinima mbyoka ya yama kUukoloni. Ta gandja oshiholelwa ngashi okamusinda okatiligane hoka taka kelele oongombe, iimuna nonyama yi lumbakane n oshowo yilwe ya yama kombepo yedhiminathanepo. Omupresidende gwOpevi gOswapo ta ti Namibia oshilongo oshiyamba ashike oshi na aantu aathigona. Ihe nande ongawo pauyuni mpeyaka, Namibia naantu ye okwa talika ko omuyamba, nonando hasho, oshoka uuyamba we inau longwa mo wu tyapulwe koshigwana nokoshilongo ashihe, omolu omainda gamwe taga tulwa po pauyuni.Nande ongawo, Geingob ta ti, Swapo okwa kondja, ota kondjo notaka kondja okuyambula po oshigwana noshilongo sha Namibia. Ta ti opu na yamwe taya ti inatu popya kombinga yondjokonona yetu. ‘Ondjokonona yetu otu na oku yi popya ngaashi yi li. Otse twa mangulula oshilongo shika. Otse twa eta mo Uudemokoli muka. Mboka yOopapeta, yOoDTA, yOoVilioen nOoMudge, oya eta mo shike muka, kashi shi ashike okuthiminika kwali Aanamibia nosha eta ya thige po oshilongo nokukakondjela emanguluko, ngashi twe li eta ngeyi. Ooministeli dhODTA dha li mu na odha ninga po shike? Geingob ta lombwele nokupula ngawo. Ta indile kOmawawa agehe gOswapo gi itulemo mehwahwameko lyomahogololo opo oshigwana ashihe shi ka hogolole Oswapo yi ka mone Ooperesenda ethele nomulongo. Omupresidende gwOpevi gwOswapo ta indile kwaayehe ya pukithwa, unene ku RDP ya galukile kegumbo kOswapo yawo. ‘Oye li ko taya ti kutya Swapo okwa kanitha ondjila. Ondi ya uvitile ohenda. Galukeni. Ileni kOswapo, kegumbo oshoka okukala pondje yOswapo oto ikalekelwa ndele to isi uunye. Galukeni manga omahogololo ga Novemba inaga thika, oshoka ngele omwa etha ga pite inamu galuka, otamu ka sa ohoni. Ne yamwe otwiisheni nawa, aamwameme aamati naakadhona, twa kaleni pamwe, galukeni , ileni moshigunda manga inaku toka. Ondi mu uvitile ohenda onene, ileni, galukeni,’ Geingob ta ti ngawo.