Shigwana takamitha okatoo, Opolisi tayi ti

OPOLISI ya Shana, oya tseyitha kutya opu na omuntu nenge aantu taya ende taya tula aantu mOkatoo, ano taye ya kengelele noku ya kutha iimaliwa yawo.

Pamupopiliko gwOpolisi mOshitopolwa sha Shana Shisaande Thomas Aiyambo, omuntu nenge aantu mbaka otaya lombwele aantu kutya aniwa oye na iilonga mEhangano nenge mOmahangano gawo ngashi taye ge ku pe. Taye ku lombwele nee kutya manga ino tameka iilonga oto futu po manga oshimaliwa shooN$200 sigo N$400 lwaampoka. Shoka taya ti kutya oshekwashilipaleko lyoye aniwa mEhangano lyontumba lyEkwashilipaleko mOshitopolwa. Taye ku lombwele nee kutya oto tameke iilonga uunake. Otaye ku pe wo Oakaunda yawo yOmbaanga, unene yOmbaanga ya Standard noyOpoosa moka omo wu na okutula oshimaliwa shoka shOoN$200 sigo N$400. Taye ku pe wo ongodhi hoka wu na okumonathana nayo. Shisaande Aiyambo ota ti kutya aantu mbaka aantu yiifundja. Taya tula aakwashigwana mOkatoo nokulya po iimaliwa yawo. Aiyambo ta ti opu na nale aantu ya likila oshimaliwa shawo shika pamukalo nguka, molwashoka aantu mboka ookawalala/oombudhi na kapu na sha shoshili shegandjo lyiilonga. Aantu nee mboka ya tulwa nale mokatoo ngeyi, sho ya kala taya dhenge onomola yongodhi nenge yoongodhi ndhoka ya pewa, itadhi ya mukula. Omasiku ngoka ya li ya lombwelwa ya katameke iilonga oga thika, ashike poima kapu na we uuyelele washa. Okatoo ashike ka ningwa po. Opolisi ya Shana otayi indile nee kukehe ngoka wa tulilwe mOkatoo. Wa futa nale iimaliwa yotye kOmbaanga nenge kOpoosa, inda wu ka lopote oshinima shika meendelelo ngashi tashi vulika kOpolisi mOshakati. Taku tiwa wu faalele wo Okadeposito slip, ano okambapila kOmbaanga kokutula mo iimaliwa. Opolisi, otayi ti kutya pamakonaakono ngoka ya ninga po sigo oompaka, oya mona po oonomola dhEeakaunda ngashi ndyoka yOmbaanga ya Standard naandjoka yokOpoosa, hoka oonakutulwamokatoo, ya lombwelwa oko ya tule iimaliwa yawo mbyoka. ‘ Shigwana kotoka, oshilongo oshuudha aakengeleli,’ Opolisi tayi ti ngawo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.